20
Gäheo i dausini afädëgi mugabe Saidani galabaia negeila säi
1 Na aso, beaha nebegi, selesaia fii afädë selesaia mosöala digasio. Ïe naaboeada sege uli nafade mia made dibe amoïe idi gai dogelo giige, igi ëfë edefadege, gaula digasio.
2 Game gadoi, nuba siiba dilo mugabe busa ëi Saidani amo, ea e gaula igi ëfë amea gäheo i dausini afädë namiäia, nafodola negesisio.
3 Gäheo i dausini afädë amo, aso, made baagia, mugabe amea udia dolö sege elö elölagi nefolalebe amoli, bu elö made dahila nimäia, selesaia fii amea mugabe amo sege uli nafade mia made dibea ami sogobala sadia idogolahilä, idi gasise amo dogeloea, nofe negela gasisio. Gäheo i dausini afädë baagilahilä, mugabe amo segeyo ede made nawesa namiäia, hä, fisigäla ifosimolö dialeamelë.
4 Na aso, beaha nea beahamelebe, beaha aligilo filo difolalebeo. Amolidaia fifigila asi sefolalebe amolia, gudi mogelo namiäia, Godea ilima geloi ïasio. Na aso, beahaleamelebe, udia dolö yafie Yesuïe ëi ulufala säla olelelo nefolaloge, Godeïe ado mala neala gaui nefolaloge, mugi damusebegi baagoi amolile gesami amoli nefolalebeo. Iliada, sugua ilaba amoge, ïe ausulubo amoge, ilibiala made gauia adala, ïe magi odagiage naabogige, made negei amoli gabio. Amoli baagoi amo nowela maalahilä, gini hamola, Gelesobalä gäheo i dausini afädëgi beaha aligisio.
5-6 Amo hamoi amoda, baagoi amoli mi gäwila bauia amila nowela ifosisio. Udia dolö mi gäwila nowela ifosi amolida, Godeïe odala ï neebe amoge, obeägïsa neebe amoge, agedu baagomolö amea ili neala nafademolöïe geloida, maade gabio. Ilida, Godeïege, Gelesoïege, odala ï neala ïlo nea, ebalä gäheo i dausini afädëgi beaha aligilo namolömelë. Gäheo i dausini afädë baagi amole, udia dolö odoa baagoi amoli sulubadela nowela ifosisio.
Saidani nufuda salala baagila asi
7 Gäheo i dausini afädë amo hä, baagiseda, mugabe Saidani e galabaia negei dilo amo fisigäla ifosimolömelë.
8 E doadigila awälahilä, sege föi sulubadelagi udia dolö elö elöla fäfü biyidiagi nefolalebe amoli dahila neaha namolömelë. Sosogo amoleda, Gogole Magogolela sälo. Ili sulubadelaea nudusa namiäia Saidania neala gegedolasimolömelë. Ilile näbada, nidemolö asusugai, ödä duhulu agesugi bose dibe amo gadoi namolömelë.
9 Amoli sege dibe sulubadelagi afufusa maadelahilä, Godeïe gaamu hï boba hamoi dilo amoge, ïe udia dolö sege amogi sefolalebe amoge, nogöla amalesa maadesio. Ami amolia amala nogöla neëgi, selesaia mosöala nulo wisa neebe amo sadia idogoi amea, ili naha maadela su digasio.
10 Amalahilä, udia dolö sege elö elölagi nefolalebe amoli dahila nelo mugabe busa Saidani amo gaulahilä, nulo söage igi gadoi ëi salobage neebe oeabo gadoi dibea ami sadia idogosio. Amo sadia idogoi amoda, sugua ilaba gadoi amole, wäfalï bea sälo amole, sadia idogoi neebea amimu sadia idogosio. Ili yoba gasigige, së naha namolöi namolömelë.
Edefademalä gudila wagamolö
11 Na aso, beahaleamelebe, beaha aligilo filo falei edefade dibe amoge, afädë amodaia sebe amoge melï. Naga föige mu giwige ebalä fisäla moholöi asi amo, na bu made melïmelë.
12 Na beahamelebe, udia dolö ëi säloge, ëi sälo madege, dafidi baagoi amoli, beaha aligilo filo amoïe odagiamadi nowela nefolalebeo. Amida, beba odoa hogala negelahilä, beba elöge hogala negei dibeo. Beba amoligida, udia dolö baagoi nowela nefolalebe amolia dafidi hamosa nelo amo beba amoligi dëdëla negei dibe amo gadola, ili mogesio. Beba elö amoda, namolöi namolö beba gabio.
13 Ödä duhulugi baagoi amolige, nowela mafula aliligisio. Baagoia amilage, uguli mosöa amilage, baagoi amoli maaha maadesio. Amala hamosebegi, ili hïdo hïdolaea hamosa nelo amo gadola, gudila mogesio.
14 Amalahilä, baagoge, uguli mosöge, nulo söa oeabo gadoi dibea ami sadia idogosio. Oeabo gadoi wisa neebe amoda, agedu baagomolö amoïe gabio.
15 Afädëïe ëi namolöi namolö bebagi dëdëla negei made beaseda, eda nulo söa oeabo gadoi dibea ami sogobala sadia idogosio.