22
Yonea namolö ïlo ödäge namolö ïlo iige melï
1 Selesaia fii amea nema bu elö olesalea, namolö ïlo ödä ulufala bimolöi galasi hahalogalai gadoi, Godele Sugua Sibi Malölele beaha aligilo filo dibea amila besela galala,
2 gaamu amogi aulo idi amoïe mogogila, awäha neebe amo olesio. Ödä amoïe agesu näiadoge näiadoge namolö ïlo i neebeo. Gäheo i sulubadelaïe aube afädë afädëlagi, i amolia gägä negesamu aligilo gabio. I amolile bäu ameada, udia dolö fifi asi sefolalebe amoli wahimolöïe neebeo.
3 Godea habobala nelebo nafadesa maademolöla säi amoli sulubadelada, gaamu amogi dofä made namolö gabio.
Godele Sugua Sibi Malölele beaha aligilo filo gaamu amogi negesegi, ïe hamoi hamolasilo nefolalebe amolia ïe hamoi hamosamu nea, ïe ëi gauia adaha namolömelë.
4 Iliada ïe odagi bimolömelë. Amase, ïe ëi ilile odagia dëdëla negei namolömelë.
5 Amida, gasimolö maademelë. Dafidilo Geloi Godea ilima yo digalasimolö ameada, gamali yoeage, eso neëage, ilima yo digamolöi mademelë. Ilida, beaha aligilo gini nea namolöi namolömelë.
Yesu bu moholö ga made
6 Selesaia fii amea, aso, nema sähalea, Ado gowe ilida, dofämelë. Dofä gabula helësëmolöi galea. Dafidilo Geloia, bea sälo nefolalo amolile gesamima aligilo Gode amea, ïe hamoi hamolasilo nefolalo amolima nelebo aabela besela galamolö ga made dibe amoli ulufala olemäia, ïe selesaia fii afädë fisiga weimelëla säsio.
7 Wae! Ne moholö amoda, hä, ga made gabumelë. Afädëa ado bea säi amoïe, beba gowegi dëdëla negei dibe amea säse amo gadola bëgëla hamosa neebe amoda, obeägïsa neamelë.
8 Neda Yone. Ado säse amolige na nabala, nelebo amolige nïe siiage melïmelë. Ado säse amoli na nabala, nelebo amoli nïe siia beaha maadelahilä, nema nelebo olelo selesaia fii amoïe emo mia gumusula dia digalahilä, e ilibiadelä hamosebegi,
9 ea nema sähalea, A! Amala hamomabio. Neda, dibaläge, didoolali bea sälo nefolalebe amolibaläge, udia dolö sulubadelaea beba gowegi ado säla dëdëla negei dibe amo gadola bëgëla hamosa nefolalebe dilibalä, hamoi gaalu afädëdi hamolasilo neawe. Gode emu ilibiamalola säsio.
10 Ea aso, nema sähamu nea sähalea, Godea nelebo amoli hamomolö segeyo daiai amo ga madesebe ameada, ado bea säi amoïe, beba gowegi dëdëla negei dibe amolida, dia musügä negemabio.
11 Afädëa nafade hamosa neebe amoda, nafade hahamola awäha namialo. Afädëa nigime baai mala hamosa neebe amoda, nigime baai mala hahamola awäha namialo. Amase, afädëa mala mogoi hamosa neebe amoda, mala mogoi hahamola awäha namialo. Gode hï memelelahilä, eleloi hïle neebe amoda, eleloi amo wälasi namialola säsio.
12 Wae! Ne moholö amoda, hä, ga made gabumelë. Na bidi gaula maase amoda, udia dolö hïdo hïdolaea hamoi hamoi amo gadola, bidi ïmolömelë.
13 A-ge nihï ne, Ya-ge nihï ne. Dafidilage ne nea, hobealage ne nea. Mi gäwi amoge nihï ne, wagamolö amoge nihï ne.
14 Amaimo, udia dolö ilile fagulo sedade nigime hësa nefolalebe amolia, obeägïsa nea. Amala hësa nefolalebe ameada, ilima namolö ïlo i amoïe gägä faila molöïe geloi ïasegi, gaamu amoïe idi galo difolalebe amogi nogila digamolöi bimolömelë.
15 Udia dolö mala nafade hïdo elöla hamolo amolige, golë hamolo amolige, susugu hamolo amolige, udia dolö baagomäia nufidelo amolige, amase, wäfalï gode naaboea hamoi amoma göa nelegelo amolige, wäfalï sämolömu hamela wäfalï sälo amoli sulubadelage, gaamu amoïe yala baagido namolömelë.
16 Neda Yesu. Na nïe selesaia fii afädë dili neebea fisiga gai amoda, dilia sesi amolima nelebo amoli säla ïmäiaïe mosaloimelë. Nihï neda, Gini Debidiïe yaua mi nefolalo amogila dulu fedai. Neda Debidiïe malömelë. Neda sege yose gaalu gasumilï dagäsiögöla hïdo elöi neë melëlo amo neawemelëla säsio.
17 Eleloi Gesamile, Sugua Sibi Malöea udia nimolö amolea sähalea, Di misiëla säsebe. Amase, ado gowe ili nabase ameage, Di misiëla sämo. Di nowë ödä haläha neebe amoda, misië. Amase, namolö ïlo ödä amo molö helësësa neebe amoda, di memalä molö misië.
Beba gowegi ado säi nabase udia dolö amolima Yonea ado geloi säla ï
18 Ado bea säla beba gowegi dëdëla negei nabase udia dolö sulubadelama, na ado gowe ulufala säsisago. Ado säla negei dibe gowegi, afädëa säla baaseda, Godea neala nafadelasilo geloi beba gowegi säla negei dibe amo gadola, ema baala ïmolömelë.
19 Amase, ado bea säla beba gowegi dëdëla negei dibe amogi, afädëa neadigiseda, namolö ïlo i gägäge, gaamu Godea hïle nafolai amoge, beba gowegi säla dëdëla negei dibe amo gadola, Godea nelebo egali mogela ïmolö negei dilo amo, haila fisimolömelë.
20 Ado amoli dibe amo dofä dialeala säla ulufalo amea sähalea, Ä. Ne moholö amoda, ga made gabumelëla säsio.
Dofä amala hamomäiamelë. Dafidilo Geloi Yesu-o, di misië.
21 Dafidilo Geloi Yesuïe ugila negelasilo amo udia dolö sulubadelabalä diamiäiamelë.
Hä amo.