Na Kekedee Fua Wane Jiu Ki
Hibru
Tani wane ne kera nao lau wane famamana ki, kera malimae ana wane famamana ki. Nia 'urinai kera ka to to'ona si lea, ma kera ka karangi lukasi faburi na fasia famamanae kera ki ana sa Christ. Kera doria ka oli ana falafala Jiu ki. Wane ne ka kedea na kekedee ne fuada ma ka saea fua kera ka inau ana dau ngasilae ana fitoe kera ki. Nia saea fuada ka 'uri, sa Jesus Christ go ne fatai madakwa ana God fua kulu. Sa Jesus na ne uu ngasi kada nia nonifi 'asiana, ma nia na ne Wele God toto firi. Sa Jesus nia tasa ka liufia lau profet 'i nao ki. Nia ka liufia lau 'ainsel ki, ma ka liufia lau sa Moses laugo. 'Urinai, na wane famamana ki kera kai uu ngasi laona fitoe kera, ma nao kera si oli faburi 'uria falafala Jiu ki.
Ma God saea ka suina ne sa Jesus ne na 'inita fataabu ne nia toto firi, ma ka tasa liufia lau fataabu 'i nao ki. Ma na raoe nia ana fataabu, sa Jesus nia saitamana famaurilana wane ki, fua ne kera ka aluge dangalu fasia ta'alae fainia maea. Na afafue 'i nao ki fatainia go nununa ru sa Jesus sasia. Na wane ne kedea buko ne, nia ka saea fuana wane famamana ki fua kera ka uu ngasi firi ana fitolada, dia wane fanaonao be 'i nao ki. Sui boroi kada wane ki ka famalagaigaida, nia saea kera ka uu ngasi ana fitoe kera ki.
Na ru talingai ki laona buko ne:
Sa Jesus tasa ka liufia na 'ainsel ki 1:1–2:18
Sa Jesus tasa ka liufia sa Moses ma sa Josua 3:1–4:13
Sa Jesus na 'inita fataabu mamana 4:14–7:28
Fata alangaie sa Jesus nia baita 'asiana 8:1–9:22
Afafue sa Jesus nia baita 'asiana 9:23–10:18
Wane famamana ki kera kai uu ngasi ana fitoe 10:19-30
Wane 'i nao mai ki ne fito lea ana God 11:1-40
Leka sulia maurilana sa Jesus 12:1–13:19
Fatae 'isi ki 13:20-25
1
God fata fua kulu ana Wele nia
1 'Ua na mai 'i nao, God fata fuana kobora kia ki ana kada 'oro ma ana ru 'e'ete ki ana profet ki.
2 Boroi ma ana maedangi 'isi ne ki, nia fata na fua kulu ana na Wele nia. Ma ana Wele nia ne, God ka saungainia ru ki tafau, ma nia laugo ne God ka fili nia fua ka too ana ru ki tafau.
3 Na Wele God nia ka fatainia madakwalae God 'initoa, ma keroa bobola go. Ma sulia laugo na nikilalae ana fatalana Wele God ne, nia dau fangasia ru ki tafau fuana nao si sui. Ma 'i buri'ana nia lafua na abulo ta'alae kia ki, nia ka fi oli 'uria 'i langi, ma ka to ana kula ni 'initoa ana bali 'o'olo ana God ne nia 'initoa ka tasa.
Na Wele God nia 'initoa ka tasa
4 God fa'initoa na Wele nia ka tasa liufi na 'ainsel ki, dia laugo na sataeru ne nia kwatea fuana Wele nia 'initoa ka liufia na sataeru ne nia kwatea fuada na 'ainsel ki.
5 Sulia God be fata 'uri fuana Wele nia,
“'Oe na Wele nau, ma 'i ta'ena nau na ne Maa 'oe.”
Boroi ma 'ua na mai God nao si fata go 'urinai fuana ta 'ainsel.
Ma tau 'ua na mai, God ka fata laugo 'uri sulia na Wele nia,
“Nau kai Maa nia, ma nia kai Wele nau.”
Boroi ma God nao si fata go 'urinai sulia ta 'ainsel.
6 Ma ana kada ne karangi fuana God ka kwatea mai na Wele 'initoa nia 'uria na molagali, nia ka fata 'uri,
“Na 'ainsel nau ki tafau kera ka fosia.”
7 Boroi ma sulia 'ainsel ki, God ka fata 'uri,
“Na 'ainsel nau ki ne kera rao fuaku, nau ku kwate ma kera ka dia na sasaule ki ma na ere ki.”
8 Ma sulia na Wele nia, God ka fata 'uri,
“'Oe ne God, ma na 'Initoe 'oe nia kai toto firi.
Ma 'oe gwaungai fafida na wane 'oe ki ana 'o'oloe.
9 'Oe eele fainia ru ne 'o'olo ki, ma 'oe sisikona ana ru ta'a ki.
Ma sulia ru nai, nau God 'oe, nau ku fili 'oe, ma nau ku kwatea laugo na eelelae baita fuamu ana fabaitalae liufia ne nau ku kwatea fuana wane kwaimani 'oe ki.”
10 Ma God ka fata laugo 'uri fuana Wele nia,
“'Aofia 'ae, ana safalilana mai, 'oe saungainia na ano ana 'abamu talamu, ma 'oe saungainia na mamanga.
11 Ma sui boroi 'ana ru nai ki kai sui, 'oe mauri toto firi.
Kera kai ta'a dia ta maku 'ua.
12 Ma 'oe lumida dia ta wane be lumia ta maku 'ua.
'Oe rokisida dia ta maku.
Boroi ma 'oe ne, nao 'oe si rokisi, ma na maurilamu nao si sui.”
13 Aia, ma God ka fata 'uri lau fuana Wele nia,
“'Oe gouru 'i bali 'o'olo aku, ma 'oe gwaungai fai nau, makwalia kada nau kai alua malimae 'oe ki farana gwaungaie 'oe.”
Boroi ma God nao si fata go 'urinai fuana ta 'ainsel.
14 Aia, na te ne na 'ainsel ki? 'Ainsel ki kera ne anoeru ne kera rao fuana God. God odua na 'ainsel ki fuana kwai'adomie ana wane ne nia famaurida ki.