Surat verin tamata Ibrani ra
Tbas afa ovi veki
Ita wol tkaꞌa ne, tamata iki ntulis surat ini, tevek ia wol ntulis naran a naꞌa surat ini. Lyawan verin ita ne, tamata i ntulis surat ini, ia tamata i nban-ulu verin tamata ovi rorang Yesus. Ia nkaꞌa urun Perjanjian Mnanat ihin a, naꞌuk ia wol ntali Yesus Ni tamata ovi rarenar ovu rsiꞌik lahir Ia (Ibrani 2:3).
Tali lalan a rfanara surat ini ne, “Surat verin tamata Ibrani ra.” “Tamata Ibrani” ihin a ne, tamata Yahudi te tamata Israel ra. Velik aba, ita wol tkaꞌa ne, rtulis surat ini verin tamata aba, ovu vali wol tkaꞌa ne, ira rnaꞌa inba. Wean i tbas surat ini ihin a, na lyawan urun ne, surat ini verin tamata ovi rorang Yesus rira sidovung, ovu tamata ra rwi-rwa ira, tevek rira inorang a. Boku tali ira, tamata ra rfalak sian ira, boku raꞌabuꞌi ira ovu boku vali tamata ktufan ra rwi-rwa ira ma rbori rira metan ra (10:32-34; 13:3, 13). Tali susa ovi rtuan ra, na boku tali ira ralarira kakoꞌu (12:12). Boku tali ira wol rti roak rira sidovung a (10:25). Boku vali tali ira inar ma rorang ewal rira inorang lan a. Ira sarseri mane rafla talik rira inorang a verin Duilaꞌa Yesus.
Tamata i ntulis surat ini nfalak afa itelu, wean ini: Ia inan ma nair ira, ia inan ma nfaloling ovu nfangrebat ralarira ra, ovu vali ia inan ma ntabu te nsurak a nair ira. Ia nair ira ne, Ubu Yanan i nfamalik Ubu Ni vaivatul ra verin tamata ra, inyai Yesus. Ia Ni dawan a nlia Ubu Ni sansinir ra naꞌa lanit ratan, ovu vali nabi Musa (1:1—4:13). Yesus neluk Mela Falurut ilaꞌa, ovu Ni dawan nlia Yahudi rira Mela Falurut Ilaꞌa ovu rira mela falurut ra (4:14—7:28). Yesus nkarya ma lolin lia Yahudi rira Mela Falurut Ilaꞌa ovu rira mela falurut ra, tevek Ni karya nti naran lanit ratan, ovu Ia nfamalik Ubu Ni tnorung i lolin lia tnorung i Ubu nala verin Musa (8:1—10:18).
Tamata i ntulis surat ini nfangrebat ralarira ra, ma rorang watan Duilaꞌa Yesus, ovu rtahang nal ralarira naꞌa rira susa ra. Ia nfangrebat ira ma deka rbobar ma rdiri Ubu wahan ralan, tevek Yesus nasusan roak lingaꞌan verin ita ma tatuan Ia (4:16; 6:20; 10:19-23). Ia nfangrebat vali ira ma “ryari ira ovu Ubu” (3:10—4:11). Ryari ira ovu Ubu ihin aka? Tamata boku rfalak ne, wean i tmata roak ma tati lanit ratan, na wol tkarya roak dida karya ovi rnaꞌa lanit ivavan a. Boku vali rfalak ne, tala munuk dida vavaꞌat ra verin Ubu, ovu inadida ma Ia nsikat ita tali dida salasilan ra, ma dida vavaꞌat kakiwal, ovu deka mane tfakloꞌi watan dida vava'at ra naꞌa dida afa ovi totu ra.
Tamata i ntulis surat ini nsurak ira, boma deka rafla talik rira inorang a verin Duilaꞌa Yesus. Naꞌa surat ini, na ia nsurak te ntabu falima ira ovu ni vaivatul ovi aleman ra (2:1-4; 3:7-19; 5:11—6:12; 10:26-39; 12:18-29). Ia nfalyawang verin ira ne, Ubu veka nukun tamata ovi rafla talik tali rira inorang a verin Yesus.
Surat ini ihin a
Vaivatul ovi rban-ulu: Yesus Ni dawan nlia tamata ovi lan rban-ulu verin tamata Yahudi ra naꞌa Ubu Ni Perjanjian Mnanat. (pasal 1:1—10:18)
a. Ni vaivatul ovi nfalak lan ra (1:1-4)
b. Yesus Ni dawan nlia Ubu Ni sansinir ra tali lanit ratan. (pasal 1:5—2:18)
c. Yesus Ni dawan nlia nabi Musa (pasal 3:1—4:13)
d. Yesus Mela Falurut Ilaꞌa Ia, ovu Ni dawan a nlia Yahudi rira Mela Falurut Ilaꞌa ovu rira mela falurut ra. (pasal 4:14—7:28)
e. Yesus, dida Mela Falurut Ilaꞌa Ia, Ni karya a lolin lia Yahudi rira Mela Falurut Ilaꞌa ovu mela falurut ra. (pasal 8:1—10:18)
Vaivatul ovi rorang vaivatul ovi rban-ulu: Deka tafla talik tali dida inorang a (pasal 10:19—12:29)
Tamata i ntulis Ibrani ni afa ovi nair marmuri ra (pasal 13)
1
Yesus Ni dawan a nlia nabi ra
1 Terang a valing averi, lalan ana Ubu nangrihi ma rivun roak verin ubud-nusid ra nahu Ni nabi ra. Ia nala lingaꞌan rivun ma nangrihi verin ira.
2 Naꞌuk naꞌa amar ovi lanit ivavan a mane namwear roak ini, na Ubu nangrihi roak verin ita nahu Yanan a. Ubu nfalak ma Yanan a notu lanit a ovu afa ovi rnaꞌa lanit ivavan munuk. Ia nfadoku roak ma Yanan a veka Ni munuk afakataka.
3 Ia nfaturu lahir Ubu vanan i nfitik a nyadat, ovu vali Ubu felan mngaꞌun a. Ia Ni ngrebat ma nwanar afakataka munuk naꞌa lanit ovu lanit ivavan ovu Ni vaivatul ra. Ia naꞌi vatuk tamata rira salasilan ra munuk roak, beti ndoku Ubu i Ni dawan nlia munuk afakataka Ni lihir mela a, naꞌa lanit ratan ma nfareta vali.
4 Ubu Yanan ini Ni fareta a nlia munuk Ubu Ni sansinir ovi rnaꞌa lanit ratan rira fareta. Inyai wean watan Ubu nala naran i lolin urun verin Ia ma al nalang Ia, ma nlia tali Ni sansinir ovi rnaꞌa lanit ratan, nararira ra.
Ubu Yanan a Ni ngrebat a nlia Ni sansinir ovi rnaꞌa lanit ratan ra
5 Ubu wol mane nangrihi verin Ni sansinir ovi rnaꞌa lanit ratan, wean i nangrihi verin Yanan, ma nfalak ne,
“Yaꞌa Yanak Oa!
Amar ini lahir, na ufalak verin Oa ne, Yamam Yaꞌa.”
Ubu nfalak vali ne,
“Ia Yaman Yaꞌa,
ovu Yaꞌa Yanak Ia.”
6 Naꞌut amar i Ubu novun Yanan i ula lalean a nma lanit ivavan a, na Ia nfalak ne,
“Sansinir ovi rnaꞌa lanit ratan munuk musti rsoak ma raraning Ia.”
7 Ubu nfamalik Ni sansinir ovi rnaꞌa lanit ratan a ne,
“Yaꞌa otu ma Ning sansinir naꞌa lanit ratan ra wearira lahir nait a,
ovu vali Ning sansinir ra wearira yafu ongan a.”
8 Naꞌuk Ubu nfalak naꞌa Yanan a wean ini,
“Oa ini Ubu i fwareta lalawatan, nata ti wol ni wahan,
ovu Oa fwareta ovu Ni malolan a.
9 Wean i tamata ra rotu afa ovi kena ra, na Oa ralam a lolin urun,
naꞌuk wean i rotu afa ovi sian ra, na Oa wol inam lahir.
Ba Ubu, Duilaꞌa i morang Ia yai, nalang Oa nlia tali Mu kida liak ra: Ia nliꞌi ngul naꞌa Oa ma neluk faneak ne, nalang Oa ma notu ma ralam lolin urun.”
10 Ubu nfalak vali verin Yanan ne,
“Oa ini Duilaꞌa Oa! Tali lalan a, na Oa motu lanit ivavan ini,
ovu motu vali lanit a.
11 Afa avyai munuk veka rmamu, naꞌuk Oa veka mnaꞌa, nata ti wol ni wahan,
ovu vali afa avyai munuk veka wearira kadaravit ovi viar roak a.
12 Oa veka motu ma lanit ivavan namwear munuk, wean i rdulan ravit blawat vian i wol reluk roak ia.
Motu roak wean inyai, beti motu lanit ivavan ngorvaꞌan. Naꞌuk Oa veka weam watan lan a, ovu Mu vavaꞌat a wol ni wahan.”
13 Ubu wol nangrihi verin Ni sansinir ovi rnaꞌa lanit ratan, wean Ia nangrihi verin Yanan ne,
“Mdoku Ning lihir mela a,
ti naran i otu ma tamata ovi rira sian Oa rsoak nulu Oa.”
14 Ba ita tanovak aka naꞌa Ubu Ni sansinir ovi rnaꞌa lanit ratan a? Sansinir avyai, roh ovi Ubu nsinir roak ira ma rlobang tamata ovi Ia nsikat roak ira tali rira salasilan ra, ma rira vavaꞌat kakiwal.