2
Fhe Bakɨme taagia nza ndigine, ne guigira bigɨna bakɨme ma.
Fhe Bakɨmen Kam, ana guigira zɨ bakɨme ndigi. Nza ne nzuav, nza mba mbararagi buna vhuueŋ, nza tuituigip ne ndɨkndɨk suirav, nza tuituigip ne zɨn ŋgɨrga. Nza muuŋv kɨrim, bigɨn thueŋ nza ŋgɨrgɨrim, nza fhura ne kuegɨp, za ne tha rivgi. +Fhe Bakɨme fhum wo bunin won enseri ga ndɨɨim, mbe mba bunin nzan nzɨgi ga suaŋgi. Mba buni, nta guigi guarara. Mba buni zɨn vui fhuv gumgi, mbe tɨvi mbatɨgi ga mbui, mbe mba mbui tɨvi mbatɨgi tugɨra tɨgap vheza mbatɨga ndi.a +Fhe Bakɨme Zisas ntigem fhura taagia nza ndir zav ŋaara bakɨme muuŋgi. Ana mba muuŋgi ŋaar, ana guigi guarara bigɨna bakɨme ma. Maaŋ muuŋgip, nza kɨrir Fhe Bakɨme muuŋgi ŋaara bakɨme segɨrga, nza ram muuŋgip wari wo muuŋgi tɨvi mbatɨgi vheza ndi thav rɨv ŋgegɨrie? Nza maaŋ muuŋgirga tuktɨgi fhuvara. Zakɨra fhuvara!
Guma Bakɨme fharav, nduara taagiap nza ndirgane bun suaŋgi. Ana ne bun nzuaim, gumgi mbari ne mbararagiap, mbe khaŋ nza nzuai, “Mba kameŋ, ne guigi guarara kameŋ ma.” +Fhe Bakɨme ana mbarkɨrga mirikori, ana nta mbuav vhɨra ŋaari bakɨvi ana nta mbuav won ŋkasŋka bakɨme ndi khɨvigi. Ana nta mbuav, ana vhɨra ana Ŋina Ŋaar won ŋaarar muun zav fhura ndɨɨi ndɨkndɨgi vhuuiŋ gum ŋkasŋka ana wo vuzvugar, ana ntan gumgi gu mbigi mbari ga nɨɨŋgi. Ana mba tɨva muuŋgim, nza ne gangiap kaŋgi, ana Kama buni, nta guigi guarara buni guari ma.
Zisas, ana fhara guarara nza ndigi guma ma.
+Nza Fhe Bakɨme zumgum nza ndi muuŋgirga ŋgu, nza khar ana kaŋgiap ana nzuai. Mba ŋgu, Fhe Bakɨme won enseri ndi farim, mbe mba ŋgu gangirga tuktɨgi fhuvara. Zakɨra fhuvara! ++Fhe Bakɨme buni vhuuiŋ ki gavar, guma mbe khaŋ suaŋgi,
 
“Nza ram muuŋgi gumgi, maaŋ muuŋgiap ndu nza ndɨkndɨgi?
Nza fhura ki ntɨɨri ma.
Ndu thaaŋ nzuav tuituigiap nza gari?
Ndu nza muuŋgiap, ndu kha tuga tɨvaneŋra ndu nzan won enserir piiŋ khɨngi.
Ndu nza vun fegap, zɨ bakɨmen nza nɨɨŋgi.
+Ndu wo muuŋgi bigi, ndu za nta gangi zav, nza farasegi.
Ndu kha bigi, ndu za ntan nzan piin khɨngim, nta nzan piin ki.
Fhe Bakɨme kha suaŋgi kameŋ, ana za mba bigir nza piin khɨngim, nta nzan piin ki.”
 
Ana maaŋ muuŋgiap, ana khuen nza khɨvigi, ana fhura bigɨn the garim, ana fhura kav ana piin kɨ thagi fhuvara. Nza ntigem za mba bigi garim, nta nza piin ki fhuvara. Zakɨra fhuvara! b +Nza Zisas garim, ana guigira zɨ bakɨme ndigi. Ana fhum, tuga tɨvaneŋra, ana mba Fhe Bakɨme enseri piin kegi. Ana kɨv, ana Fhe Bakɨme fhura kora mbui kora muumbarar panan, ana za kha gumgi gu mbigi ŋana ndigip rimgirga. Zisas ana zaa bakɨme ndiav rimgi. Maaŋ muuŋgiap, Fhe Bakɨme ntige ana suirav, ana vun fegap, zɨ bakɨme gu ŋkasŋka bakɨmen ana nɨɨŋgi.
10  +Fhe Bakɨme, ana za mba bigi nɨɨŋge ma. Ana vhɨra za mba bigi ga muuŋgim, mbe wo ŋaari ga mbui. Ana won tari vhɨrve ndigip, Hevenan ndarim, mbe guigira nzerara kɨrga. Fhe Bakɨme khueŋ vuzvugi, Zisas taagip kha gumgi gu mbigi ndi ŋaara khavgirga. Ana maaŋ muuŋgiap, ana fhura Zisas garim, ana zaa ndigi. Ana mba zaar panan, ana Zisas ga muuŋgim, ana guigira Fhe Bakɨme vuzvuga vhɨzgi. Fhe Bakɨme maaŋ Zisas ga muuŋgi, ana fharav za kha gumgi gu mbigir kurkurigi guman vhari ki. Fhe Bakɨme mba tɨva muuŋgim, ne guigira nzerigi. 11  +Nza kaŋgi, Zisas za kha gumgi gu mbigi ga mbuim, mbe Fhe Bakɨmen gumgi gu mbigi ki guma, ana vhɨra ŋgarigi. Ana mba mbui ŋgarigi gumgi gu mbigi, mbe ana phorgap, mbe Ndia bavira ki. Maaŋ muuŋgiap, ana kha kakaman mbe mbui, “Fegi gu ŋgugi,” ana mben mberav mba kakaman mbe mbui fhuvara. 12  +Ana khaŋ nzuai,
 
“Gu ndu zɨ bun won fegi gu ŋgugi ga suanga.
Mbe rotur muun saŋv wari fugɨrga, gu mbe rɨgar ndu zɨ ndiv vun kuamkuav ŋgavar muunga.”
 
13  +Ana wom khaŋ nzuai, “Gu Fhe Bakɨmera rargɨrga, ana wo muun za suaŋgi bigi, ana ntan muunga.” Ana wom khaŋ nzuai, “Ndu ganɨ, gu Fhe Bakɨme na nɨɨŋgi gumgi, gu mbe phorga ki.” c
Zisas nzan kurkurar zav guma guara gegi.
14  +Zisas mba nzuai tari, ana kha nuianan ki gumgi gu mbigira nzuai. Maaŋ muuŋgiap, Zisas vhɨra mbera fara muuŋgiap guma guar ki. Ana kɨv rimgirga. Ana mba tɨvar muuŋgip, ana Satanan ŋkasŋka farfagirga. Kha guma Satan, ana kha gumgi gu mbigi ga mbuim, mbe vhɨzi ŋkasŋka ki. 15  +Kha nuianan ki gumgi gu mbigi, mbe za vhɨzɨrganen rɨvi. Mbe vhɨzi nen rivgiap, fhura Satanan ŋaara khɨna mbui gumgi gu mbigi ki. Zisas rimgiap, mbe muuŋgim, mbe bɨkbɨɨgi.
16  +Ne guigi guarara, Zisas Fhe Bakɨme enserir kurkurar zav, kha ŋaara muuŋgi fhuvara. Ana Abrahaman nzɨgir kurkurar zav mba ŋaara muuŋgi. 17  +Maaŋ muuŋgiap, ana won fegi gu ŋgugira farar muuŋgirga. Ana mben Fhe Bakɨmen rotu gari gumgi guman pan kɨv, Fhe Bakɨmen ŋaarar muunga. Ana mben Fhe Bakɨme rotu gari guman pan kɨv, mben gumgi gu mbigi korar muunga. Ana Fhe Bakɨme buni, ana za nta zɨn ŋgɨp, won ŋaarar muuŋv, wo tumara fekhɨngip, rimgirga, kha gumgi gu mbigi muuŋgi tɨvi mbatɨgi vhɨzɨrga. 18  +Mparmparei anan hi, ana nduara vhɨra zaagi ndigi. Maaŋ muuŋgiap, mparmparei gumgi gu mbigir hɨrga, ana mben kurkurarga.
+ 2:2 Sng 68.17 a 2:2 Kha ves, ana Fhe Bakɨme Moses ga nɨɨŋgi tɨvi ga nzuai. Ndu Taagia Ndi o, Kisim Bek 19.20 ganɨri. Ndu taagia ndi gavar ki buni, nta Fhe Bakɨme enseri ga nzuai fhuvara. Mbe Zudaiŋ, mbe khueŋ khothɨgi, Fhe Bakɨme Moses ga nɨɨŋgi tɨvi, ana ntan won enser mbe nɨɨŋgim, ana ntan Moses ga nɨɨŋgi. Ndu FG 7.53 ganɨri. Ndu vhɨra Ga 3.19 ganɨri. + 2:3 Mt 4.17; Mk 1.14; Ru 1.2; Hi 10.28-29; 12.25 + 2:4 Mk 16.20; FG 2.22; 14.3; 1 Ko 2.4; 12.4; 12.7; 12.11; Ef 1.5; 1.9 + 2:5 Hi 6.5; 2 Pi 3.13 + 2:6 Jop 7.17; Sng 144.3 + 2:6 Sng 8.4-6 + 2:8 Mt 28.18; 1 Ko 15.25-27; Ef 1.22 b 2:8 Kha kameŋ Ŋgavi Ki Gavar ki. Mba kameŋ za kha gumgi gu mbigi ga nzuai. Kha gap, Hibru kheri guma, ana kha ndɨkndɨga mbui, Zisas kha nuianan zergap, guma guara gegap, ana za kha gumgi gu mbigi, ana za mben ŋana ndigi. Maaŋ muuŋgiap, mba Ŋgavi Ki Gap, ana mba Zisasan hɨgi bigi, ana za nta bun nzuai. + 2:9 Zo 3.16; Ro 5.18; Fi 2.7-9; 1 T 2.6; 1 Zo 2.2; VB 5.9 + 2:10 Ru 24.46; Zo 20.17; FG 3.15; Ro 8.29; 11.36; Hi 5.9; 10.10 + 2:11 Mt 25.40; Mk 3.35; Zo 20.17; FG 17.26; Ro 8.29; Hi 10.10 + 2:12 Sng 22.22 + 2:13 Sng 18.2; Ais 12.2; Zo 17.6; 17.9-12 c 2:13 Mba Zisas bun nzuai kameŋ Aisaia 17.18 ki. Mba Hibru gava kheri guma, ana khueŋ ndi khɨvi, Zisas ana mba harigi gumgi gu mbigira fara muuŋgi. Mba ana fegi gu ŋgugi gum ana tari ma. Mba harigi gumgi gu mbigi, mbe Fhe Bakɨme mben muunga bigi, mbe ntan rarga ki. Zisas ana vhɨra rarga ki. + 2:14 Zo 1.14; 12.31; Ro 8.3; Fi 2.7; Kor 2.15; 1 Zo 3.8; VB 12.10 + 2:15 Ro 8.15; 2 T 1.7 + 2:16 Ais 41.8-9 + 2:17 Fi 2.7; Hi 2.14; 4.15; 5.1-2; 1 Zo 2.2; 4.10 + 2:18 Hi 4.15-16; 5.2; 7.25