6
Aa ɗiyar bi yaa dadda gatǝg kǝ ghunja zaraabahatǝr biya
1 Akwama mǝnng dǝgiti dǝm ma taatakagh dǝ zǝraabagha, agha maay ɗiya ghunjaan vak lii maay gǝdza Daadamamazhigǝl kiyava ta shari biya, dlakulvakwaha, agha ɗiig bi kǝ ghunjaan vak yaa dadda gatǝg biya?
2 Mbats, am sǝrga bi taakiya yaa dadda gatǝg wa da tǝtǝr shari kǝ duuni biya? Akwama ba kuram wa da tǝtǝr shari kǝ duuni tsaw tsaa, mbats tlamal bi nǝ uuram kǝ ta shari tǝghǝr kǝ dǝgitahaan hǝɗiikǝnǝn biya?
3 Am sǝrga bi taakiya kǝmiyam wa da tǝtǝr shari kǝ zarhaɓǝlga Daadamazhigǝl biya? Kyakaɗava dǝgitahi ma kwan kǝ duuniyi kaciya?
4 Akwama dzǝghaardzǝg nǝ hulfa kwanahaan kǝ dǝgit ma taatakaruwa, aujilbǝg am langtǝr da vak lii haiyatǝrǝt bi cauc kiyava tǝtǝr shariyi?
5 Taganda mbakyarvad ǝn tsǝkura kǝ zhǝru nai kwan kǝ ǝlbǝga, aitsa, maay aanji pall ma kuram wa dǝ dabari kwa tǝgatǝg kǝ shari ma taataka zaraabah biya?
6 Ɗlakulvakwaha, zǝraab ɗiya ghunja zǝraabaan ma guda ta shariya, baz tǝvuukwa lii maay gatǝg biya!
7 Ɗiya ghunja zaraabaharuwǝn am ɓag nǝ uuramna, maradamarǝg taakiya hǝtsǝgalhǝtsǝg wahiin vakaruwa, abi ngulǝm ɓagkura nǝ uud kǝ dǝgit ghwaɗ? Ɗlaɓa ngulǝm zǝkuru nǝ uud?
8 Dlakulvakwaha, ba kuram dǝ ghǝraru am ɓagtǝr dǝgit ghwaɗ kǝ zaraabaharuwa, dlaɓa am za zaraabaharuwa!
9 Mbats, am sǝrga bi taakiya lii ɓa dǝgiti ghwaɗ ar da dǝgaa bi damma tlǝkǝsǝra Daadamazhigǝl biya? Aa valkurda bi nǝ uud biya, aɗaba maay lii shalavashalava, kwatǝnahǝr kǝ ghǝlaha, lii ɓa gwaragwara, aanji ghwalvahi hǝnna dǝ vǝgaatǝr ghwalvaha,
10 Bi gǝllaha, bi lii dlǝrmǝga, bi lii hǝɓa kya ɗyakɗyaka, bi lii ghudazha uuda, bi lii pǝrɗa dǝga uuda, maay aanji pallatǝr wa da dǝgaadǝg damma tlǝkǝsǝra Daadamazhigǝla biya.
11 Ndza bandkwan kyalmaru wura, barakurabarǝg nǝ uuda, pǝshakurapǝshig nǝ uuda, dlaɓa nakurdalnǝg nǝ uud ba kalkal tǝvuukwa Daadamazhigǝl ma ɗaaga Yaazhigǝl Yesu Kǝristi, ard Shiɗǝkwa Daadamazhigǝlamiyama.
Galamgalǝg kǝ Daadamazhigǝl dǝ vǝgharuwa
12 “Haighwanthaig nǝ uud kǝ ɓa dǝgitah baɗǝmma,” amma ɗǝm bi dǝgitahi mǝlgaru kǝ uud biya, “Haighwanthaig nǝ uud kǝ ɓa dǝgitah baɗǝmma,” ǝn nǝgal bi kǝ ɛɛvya aanji kwar kǝ dǝgit biya.
13 “Ɓagava mbakyarvad huɗ nǝ dǝgzǝga, huɗ dlaɓa mbakyarvad dǝgzǝga,” Daadamazhigǝl wa da ghyihtǝrghyihga ba bǝrkuɗa. Ɓagava mbakyarvad shalavshalav bi nǝ vǝghǝ biya, bamma mbakyarvad Yaazhigǝla, Yaazhigǝl dlaɓa mbakyarvad vǝgha.
14 Cighantciig Daadamazhigǝl kǝ Yaazhigǝl dǝ shiifǝga, da cikiyam bandkwah dlaɓ kǝskǝmiyam tǝdvad ndzǝɗaana.
15 Mbats, am sǝrga bi taakiya vǝgharu uuɓiya Kǝristi biya? Ən kǝsgant bi kǝ uuɓiya Kǝristi ǝn matlant dǝ uɓiya tand biya. Ən haigant biya!
16 Am sǝrga bi taakiya baɗǝm daddakwa matlǝgant vǝghaan dǝ tand naralnǝg kǝ vǝgh pall biya? Aɗaba vindavavindǝg ma Kakkaɗa Daadamazhigǝl taakiya, “Ba bǝrkuɗaatǝr naralnǝg kǝ vǝgh palla.”
17 Baɗǝm daddakwa matlǝgant ghǝraan dǝ Yaazhigǝl naralnǝg kǝ dǝgit pall dǝ iin ma Shiɗǝkwa.
18 Kuvamkuvǝg kǝ shalavashalava! Baɗǝm haipi ɓag nǝ uud tlǝkǝna bi kǝ vǝghaan biya, amma dadda gwaragwar ɓagar haip kǝ ghǝvaana.
19 Sǝramasǝrǝg taakiya vǝgharu Vǝgya Shiɗǝkwa Daadamazhigǝl kwa ndzǝga ma kurama, dlaɓa iin wa dlǝghama nǝ uuram vak Daadamazhigǝla. Kuram bi wa kwara ghǝraru biya,
20 sǝgwakura dǝ sǝgw nǝ uuda. Mbakyarvad kwah famaarafǝg kǝ Daadamazhigǝl dǝ vǝgharuwa.