10
1 Zaraabahara, dǝgiti ma naag nǝ ǝrviɗmahuɗara, maa tlǝkǝnana yaa Israˈilah kǝ katǝga. Iin dzugwazhiglar vak Daadamazhigǝl mbakyarvad iitǝra.
2 Ən tagkurdatag taakiya ar nagaan kǝ ɓa kwatǝnahǝr kǝ Daadamazhigǝla, amma kwa nǝ iin kǝ dǝgit ar ɓag ba kwal sǝrgasǝrgatǝra.
3 Sǝrara bi tsaw kǝ jiira Daadamzhigǝl biya, dlaɓa ar ɓa kǝlaa ndzǝɗaatǝr kǝ gata ɗuulatǝri tlǝrn kiyava ndzǝga kalkal tǝvuukwa Daadamazhigǝla, mbakyarvad kwana, fardǝm bi kǝ ghǝraatǝr kǝ gata ndzǝgan kalakal tǝvuukwa Daadamazhigǝl biya.
4 Kǝristi ghaala Adzahadzaha Muusa, aɗabad kwaha, baɗǝm daddakwa fadǝghǝrǝtfǝg tǝ iina, da tlaƙǝnatlǝg kǝ ndzǝgan kalkal tǝvuukwa Daadamazhigǝla.
Katǝg dǝga uudah baɗǝmma
5 Vindavindǝg Muus tǝghǝr kǝ ndzǝgan kalkal kwa tlǝvkǝna tǝdvad gata Adzahadzah taakiya, “Baɗǝm daddakwa gata ɗuula Adzahadzaha, da tlǝkǝnatlǝg kǝ shifǝg tǝdvad iina.”
6 Wai nǝ dǝgiti tagaa Kakkaɗa Daadamzhigǝl tǝghǝr kǝ ndzǝgan kalkal kwa tlǝvkǝna tǝdvad fadǝghǝra, “Tag bi ma ǝrviɗmahuɗagh, taaki, ‘War wa dǝgǝtdǝg damma ghǝrazhigǝli?’ ” Da sǝdi kǝ Kǝristi.
7 “Nii agha tagan ha taaki, ‘War wa da daay damma fai vaka ndzǝgana lii ǝmtsaǝmtsani?’ ” Mbakyarvad ciyant kǝ Kǝristi ma gǝtlahi.
8 Dǝgiti tag Kakkaɗa Daadamazhigǝl iin taakiya, “Əlbǝga Daadamazhigǝl ba hǝrz dǝ kǝgha, bamma ghaiyagha, dlaɓa bamma ǝrviɗmahuɗagha.” Əlbǝgiin tǝghǝr kǝ ǝlbǝga fadǝghǝr kwa kǝm tag nǝmnd kǝ ǝlbǝg maraw tǝghǝra.
9 Akwama taghatag ba dǝ ghaiyagh taakiya Yesu Yaazhigǝl nǝ iina, dlaɓa fǝdǝghǝrǝtfǝg ma ǝrviɗmahuɗagh taakiya ciighantciig Daadamazhigǝl ma gǝtlahha, da katakkatǝg nǝ uuda.
10 Aɗaba fǝvdǝghǝrǝt ma ǝrviɗmahuɗ kǝ tlǝkǝna ndzǝgan kwal haip tǝvuukwa Daadamazhigǝla, dlaɓa tagav ba dǝ ghai pǝlaw agha tlǝkǝntlǝg kǝ Katǝga.
11 Bandkwa vindava ma Kakkaɗa Daadamazhigǝl taakiya,
“Baɗem daddakwa fadǝghǝrǝtfǝg tǝ iina,
da tsǝvara bi zhǝru biya.”
12 Aɗaba maay gǝrgǝr ma taataka Yahudaha ard lii ar Yahudah biya, ba Yaazhigǝlǝn pallna iin Yaazhigǝla aanji wara, iin dlaɓ wa vǝla bark ba ɗyak kǝ lii ɗaha ɗaagaan baɗǝmma.
13 Bandkwa vindava ma Kakkaɗa Daadamzhigǝl taakiya, “Baɗǝm daddakwa ɗaha ɗaaga Yaazhigǝla, da tlǝkǝnatlǝg kǝ katǝga.”
14 Ar da ɗaag ndandar kaci kǝ daddakwa fardǝghǝrǝt bi tǝ iin biyi? Ar da fadǝghǝr ndandar kaci tǝ daddakwa taparna bi kǝ cinnga ǝlbǝg tǝghǝr kǝ iin biyi? Ar da cinnga ndandar dlaɓ akwama maay daddakwa da tagtǝr ǝlbǝg maraw biyi?
15 Ar da tag ndandar kaci lii taa ǝlbǝg maraw kǝ ǝlbǝg maraw akwama ɓǝlavtǝrǝt bi da tagaan biyi? Bandkwa vindava taakiya, “Dǝga jappǝr nǝ lii sarda ǝlbǝga Daddamazhigǝl marawa.
16 Ɗǝm bi nǝ Israˈilahi haiyaranthaig dǝ ǝlbǝg marawǝn biya. Bandkwa tagaa nǝ tlayang Ishaya taakiya, “Yaazhigǝla, war wa fadǝghǝrǝtfǝg tǝ ǝlbǝgǝn cinngha nǝ iin vakamnd nii?
17 Mbakyarvad kwaha, fadǝghǝr sagaw tǝdvad cinnga ǝlbǝg marawa, dlaɓa ǝlbǝg maraw sagaw tǝdvad cinnga ǝlbǝga Kǝristi.
18 Ən dǝ ndavǝg naiya, “Bak jiijiir tsa cinngara biya?” Cinngaracinnga. Aɗaba vindavavindǝg ma Kakkaɗa Daadamazhigǝl taakiya, “Cinngalcinng nǝ ghaiyatǝr aanji ta kwar ma duuni baɗǝmma, dlaɓa ǝlbǝgahaatǝr dal da tǝ ghaala duuniya.”
19 Ən gwiya ndavǝga. “Aitsa, nǝgharaaka bi nǝ yaa Israˈilah biya?.” Ngwatǝrangw Muus ba zunngw taakiya, am Daadamazhigǝla, “Ən da fǝkurafǝg kǝ shilga dlamaakǝlaaw kwar jibah biya, ǝn da fǝkurafǝg kǝ nguɗɗa ǝrviɗmahuɗ dǝ jibah kwar nǝghǝgaaka bi kǝ dǝgitah biya.”
20 Tǝhala kwaha, shughanashuug nǝ Ishaya kǝ gyi baz taakiya, am Daadamazhigǝla, “Lii gatarkwa biya, iitǝr wa tlarkwiitlǝga. Lii ndavarkwa biya, marandamarǝg kǝ ghǝrar vakatǝraa”
21 Gwiya tagaatag Daadamazhigǝl tǝghǝr kǝ yaa Israˈilah taakiya, “Ba kǝlaa hǝnga ba vǝlavǝlan nǝ dǝvvar tǝghǝr kǝ uudahi ar fǝgaara bi kǝ uudah biya, ard lii maay cinnga ǝlɓǝga uud biya.”