1 Ən markur dughwa baabamiyam Fibi, fandǝghǝrǝtfǝg taakiya dughwa jiijiira, dlaɓa ɓa kwatǝnahǝr ma cauc ma Kankiriya. 2 Dlǝghamdlǝghǝg kǝ dughwa baabamiyam ma ɗaaga Yaazhigǝl ba kalkal bandkwa dlǝghav yaa dadda gatǝga, vǝlamarvǝlǝg dlaɓ aanji hulfa kwar kǝ dǝgiti naag nǝ iin vakaruwa, aɗaba iin dǝ ghǝraan mǝlgharumǝlǝg kǝ uudah ba ɗyaka, baz kai dǝ ghǝrara. 3 Tagamtǝrtag kǝ uus kǝ Biriskila ard Akila, tsaghwaha tlǝrar ma Kǝristi Yesu. 4 Vǝlaruvǝlǝg kǝ ghǝraatǝr kǝ ǝmtsǝg mbakyarvad kaiya. Kai pall bi wa dlaig biya, baz cauca lii Yahudahǝn bi baɗǝmma. 5 Tagamtǝrtag kǝ uus kǝ yaa dadda gatǝg kwa dzahav ma vǝgyaatǝra. Tagamartag kǝ uus kǝ Afanitus, tsaghwar ba vaivaiya, kwa nal kǝ dadda gata Kǝristi ba zunngw ma haaya Asiya baɗǝmma. 6 Tagamartag kǝ uus kǝ Maryam kwa tlakǝntlǝg ɓa tlǝr ba vaivai mbakyarvad kurama. 7 Tagamtǝrtag kǝ uus kǝ Andaronikus ard Yuniya, zaraabahar Yahudah band kaiya, lii ɗiyavtǝrdǝm damma guda bǝrfing ǝmtaɗ dǝ kaiya. Sǝrvǝtǝrsǝrǝg nǝ iitǝr ba vaivai ma zarha ɓǝlga Yesu, dlaɓa dlǝghara nǝ iitǝr kǝ Kǝristi tǝghǝr kǝskaiya. 8 Tagamartag kǝ uus kǝ Amfiliyatus, tsaghwar ba vaivai ma Yaazhigǝla. 9 Tagamartag kǝ uus kǝ Urbanus tsaghwa tlǝra miyam ma Kǝristi, ard tsaghwar Sitakis. 10 Tagamartag kǝ uus kǝ Afalis kwa marada ghǝraan taakiya dadda gata Kǝristi nǝ iin ba vaivaiya. Tagamartag kǝ uus kǝ yahha Aristobulus. 11 Tagamartag kǝ uus kǝ Hirudiyan kwa iin ndakwani zhiil Yahuda. Tagamtǝrtag kǝ uus kǝ yaa dadda gata Yaazhigǝl ma vǝgya Narkisus. 12 Tagamtǝrtag kǝ uus kǝ Tirayifina ard Tirayifusa, kwan kǝ ǝnghwasah ar ɓagar tlǝr ba vaivai kǝ Yaazhigǝla. Tagamartag kǝ uus kǝ Farsis, kwanǝn kǝ uus uuda yaa uuda, tlakǝntlǝg ɓa tlǝr ba vaivai mbakyarvad Yaazhigǝla. 13 Tagamartag kǝ uus kǝ Rufus pall ma lii kǝsghaaka Yaazhigǝla. Am tagar dlaɓ kǝ uus kǝ babbaan kwa kǝsakut band zǝra huɗaana. 14 Tagamtǝrtag kǝ uus kǝ Asinkiritus, ard Filigona, ard Hermes, ard Faturobas, ard Harmas ard zaraabah baɗǝm kwa ǝmtaɗ dǝ iitǝra. 15 Tagamtǝrtag kǝ uus kǝ Filologus, ard Yuliya ard Niriyus ard dughwa babaana, ard Olimfas ard yaa dadda gatǝgi ǝmtaɗ dǝ iitǝra. 16 Tagamtǝrtag kǝ uus kǝ zaraabaharu dǝ burhwakǝva waiyava. Ar tagkur uus yaa dadda gata Kǝristi baɗǝmma.

17 Ən ghala kuram zaraabahara, famfǝg kǝ hyimi dǝ lii saa dǝ tagwazha tagwazh ma taatakaruwa, ard lii tǝrɗa kuram tǝ ɗuula, ar ɓa tlǝghum dǝ dǝgiti tsagamu nǝ uurama. Dam bi da tǝvǝgh kǝ iitǝr biya. 18 Aɗaba hulfa kwan kǝ uudah ar ɓagar kǝ Kǝristi Yaazhigǝlamiyam bi nǝ iitǝr kǝ kwatǝnahǝr biya. Ar sǝra ba huɗaatǝra. Ar valla uudahi cinngtǝrcinnga tǝdvad mǝɗmǝɗa ghaiyahaatǝr ard fiidaha. Lii cinngtǝrcinngǝn ar dǝ ghǝrtla zarhǝra. 19 Aanji ba war cinnghacinng kǝ ɗuuli am fǝgaara nǝ uuram kǝ uuda, fǝghwaafǝg wan kǝ dlaig mbakyarvad kurama. Ən naagaan mamaa nal kǝ yaa dadda dabari tǝghǝr kǝ dǝgit marawa, dlaɓa am ndzan kwal haip tǝghǝr kǝ dǝgaha kǝlaadǝr baɗǝmma. 20 Daadamazhigǝl kwa vǝla gabǝrǝr da hapǝgaan kǝ shatanaha, da vǝlkur dlaɓ kǝ ndzǝɗ tǝghǝr kǝ iina, ba kwal badza sarta. Hɛrǝrra Yaazhigǝlamiyam Yesu aa ndzandzǝg ǝmtaɗ dǝ kurama. 21 Tagkur uus Timoti, tsaghwa ɓa tlǝrara, bandkwah dlaɓ Lushiyus, ard Yason, ard Sosifata, kwa ghǝravaatǝr ndakwani ar Yahudaha. 22 Kai, Tartiyus, kwa vinda kwan kǝ wakita, ǝn tagkur uus ma ɗaaga Yaazhigǝla. 23 Gayus, kwa dlǝghakwi ma vǝgyaana, dlaɓa dlǝghǝgaan kǝ yaa dadda gatǝg baɗǝm ma vǝgyaana, iin ndakwani tagkur uusa. Erastus, kwa hǝkya kwaɓa kǝsa, ard zǝraabamiyam Kwartus ar tagkur uusa. 24 Aa ndzandzǝg hɛrǝrra Yaazhigǝl Kǝristi tǝghǝr kǝskuram baɗǝmma. Aandz bandkwaha.

25 Ndangǝr baɗǝm kǝ Daadamazhigǝl kwa fǝkurnaa ndzǝɗ ma fadǝghǝr tǝdvad ǝlbǝg marawǝn kwan tag nai kǝ ǝlbǝg tǝghǝr kǝ Yesu Kǝristi. Kwan kǝ ǝlbǝg marawa, dǝgiti ndza shiɓavnan sagalaan bamma dati. 26 Ndakwan savdasǝg da tǝ ɓalaɓal ma vindǝga tlayanngaha, tǝdvad ǝlbǝgi vǝlada Daadamazhigǝl ǝmkyaɗaka, dlaɓa maravtǝrdamarǝg kǝ jibah baɗǝmma, mbakyarvad ar fǝdǝghǝrǝt tǝ iina, dlaɓa ar faaraana. 27 Ndanngǝr kǝ Daadamazhigǝla, kwa pall ba nǝ iin dadda dabariya, tǝdvad Yesu Kǝristi tanngw damma zǝrazǝra! Aandz bandkwaha.