37
Ŋarakanydja mäḏirriny'tja balayi roŋiyina walŋathinayi
37:1–14 (The Valley of Dry Bones)
1 Yo, waŋganymirrinydja Garray marrtjina, bala ŋayi mulkanana ŋarranha, bala ŋayi djaw'yurrunanydja ŋarranha, bala nherrara ḻaparra'lilina dhikana wäŋalilinydja. Yo, ŋunhiyi wäŋanydja gungaŋala warrpam' dhika ŋuriŋi mäḏirriny'thunydja ŋarakayunydja malaŋuyu, birrka'mirrina walala marrtjina ŋorrananydja ŋunhiyi ŋarakanydja.
2 Yo, ŋayi Garrayyu ŋarranha gäŋala marrtjina, ŋarranydja yukurrana marrtjinana ŋuliwitjarrayi ŋarakakurrunydja malaŋukurru; nhäŋalanydja ŋarra marrtjina mirithirri warray dhika guḻku' warray, biyapul warray wal'ŋu, yurru warrpam' ŋunhi yulŋunydja baṉḏany, räwak yana ŋarakanydja, walŋamiriw.
3 Bala ŋayi waŋana ŋarrakala, dhä‐wirrka'yurruna bitjarra, “Way yolŋu, dhuwalanydja ŋuli ŋaraka biyapul walŋathi?” bitjarra ŋayi Garraynydja.
Ga ŋarranydja buku‐wakmaraŋala waŋana balanydja bitjarra, “Garray, waŋganynha nhepina marŋginydja dhiyakuyi.”
4 Bala ŋayi waŋana ŋarrakala bitjarrana, “Waŋiya ŋunhiyi ŋarakanhanydja mäḏirriny'nhanydja malaŋunha, waŋiya biyaka, ‘Nhuma ŋaraka malanha mäḏirriny', ŋäka dhuwala dhäruk Garraynha.
5 Garraynydja yukurra waŋa nhumalaŋgu, dhiyaku walalaŋgu ŋarakawunydja bitjan gam'. Ŋarranydja yurru ŋir'yunna nhumalaŋgala, ga ŋarraku ŋirny'tja yurru gulŋiyirrina‐wala yana nhumalaŋgala, ga nhumanydja yurru walŋamirrina ḏurryundja.
6 Ŋarra yurru nherraṉ nhumalaŋgala gurrkurrnha malanha, ga ŋanak, ga barrwaṉ'mirriyamana ŋarra yurru nhumalanha yulŋunydja, bala nhuma yurru rumbalyirrina yolŋuthirrina. Bala ŋarra yurru ŋir'yunna nhumalaŋgala; ŋarrakuway ŋarra yurru walŋana gulŋiyinyamarama nhumalaŋgala, ga nhumanydja yurru walŋathirrina ḏurryunna. Bala nhuma yurru marŋgiyirrina, ŋunhi ŋarranydja ŋarrapi Garray God.’ ” Ga bitjarra ŋayi Garray waŋananydja yukurrana.
7 Bala ŋarra waŋananydja ŋuriki ŋarakawunydja malanyŋuwu ŋunhi yana liŋgu dhäruktja ŋunhi ŋayipi ŋarrakala waŋana ḻakaranharawu waŋanharawu, ga dhunupana ŋarra ŋäkulanydja rirrakaynha, walala marrtjina waŋgany‐mana'manapanmina rirrakaymirriyinana, giṯthu'‐giṯthurrunana marrtjina dhambay‐mana'‐manapanminana, ga dhä‐manapanminanydja walala marrtjina ŋunhiyi ŋarakanydja malanha dhapirrk yana dhunupa'ŋulili dhaḻakarrlilinydja.
8 Bala ŋarra nhäŋalana yukurrana ŋunhinhayi malaŋunha ŋarakanhanydja, bala ŋarra nhäŋala ŋunhiyina gurrkurrnha, ga biyapul barrwaṉ'thu marrtjina monyguŋala ŋunhiyi, yurru rumbalnydja malanha ŋunhiyi ŋorrananydja marrtjina munatha'ŋuranydja ŋunhili walŋamiriw yana, liŋgu bäyŋu muka yana walalaŋgala ŋunhi ŋirny'tja.
9 Ga biyapul ŋayi waŋana ŋarrakala bitjarra, “Way yolŋu, waŋiya ŋuruku watawu ya', biyaka waŋiyanydja gam'. Garraynydja Godtja waŋana nhokala watawala, nhe yurru marrtjinydja birrka'mirriŋuru yana, bala nhe yurru ŋir'yunna dhiyakalanydja malaŋuwala ŋunhi rakunymirri dhuwala rumbal ŋorra marrtji, märr yurru walala walŋathirrina yukurra.”
10 Bala ŋarra waŋanana ŋuriki watawunydja ŋunhi yana liŋgu ŋupanayŋu dhäruk ŋunhi ŋayi Garrayyu ŋarrakala ḻakaraŋala waŋanharawu. Ga dhunupana yana ŋunhiyi watanydja marrtjina gulŋiyinana ŋunhiwalayinydja rumballilinydja malaŋulili rakunymirriwalanydja, bala walala walŋathinana marrtjina. Bala walala gaŋga'‐gaŋgathinana ŋunhiyi malanha, walŋamirrina dhika dhärrana marrtjina ŋula nhämunha'na, bena miṯtji dhärrana, bitjarrana bitjan waŋgany miṯtji miriŋu.
11 Bala ŋayi waŋana biyapul Garray bitjarra, “Ŋarrakunydja yolŋu walala Yitjuralnydja miṯtji balanyarayi, bitjan dhuwalayi ŋaraka malanha. Walala ŋuli waŋa walalanhawuy walala bitjanmirri, ‘Ŋilimurrunydja dhuwala bitjan räwaknha ŋarakana, walŋamiriwnha. Yakana ŋilimurru yurru biyapul nhina walŋamirri yukurra,’ bitjanna walala ŋuli waŋa.
12 Yurru ḻakarama nhenydja yurru ŋuripa yolŋu'‐yulŋuwanydja ŋarrakalaŋuwa biyakayina gam'. Garraynydja ŋilimurruŋgu waŋana bitjarra, ‘Ŋarra yurru ḻapmaramana ŋunha molunydja malanha nhumalaŋgu, bala nhuma yurru dhawa‐yawaṯthunna beŋuruyinydjayi walŋamirrina dhikana wal'ŋu, bala ŋarra yurru roŋinyamaramanydja balayi nhumalanha ŋunhiwalayi wäŋalili Yitjuralliliyi.
13 Bala nhuma yurru yuwalkkumana yana wal'ŋu marŋgiyirrinydja ŋarraku, ŋunhi ŋarranydja ŋarrapi yana Garray God.
14 Yo, yuwalk yana ŋarra yurru ŋarrakuway ŋarra walŋanydja nherraŋ nhumalaŋgala ŋayaŋulilinydja, bala nhuma yurru walŋathirrina, bala nhuma yurru wäŋa‐roŋiyirrina ŋunhiwala nhumalaŋgalaynha wäŋalili, ŋunhi ŋarrapi nhumalaŋgu wekaŋala. Bala nhumanydja yurru marŋgiyirrina, ŋunhi ŋarrapi yana Garrayyu wal'ŋu djämanydja bitjarrayi, ŋunhi yana liŋgu ŋunhi ŋarra dhawu'mirriyaŋala nhumalanha ŋäthili. Yo, ŋarra bitjarrayi dhawu'mirriyaŋalanydja nhumalanha, ga yuwalk yana ŋarra yurru djämanydja bitjandhi.’ ” Ga bitjarra ŋayi Garray waŋananydja.
Djudanydja ga Yitjuralnydja yurru waŋganynha miṯtji
37:15–28 (Judah and Israel will become one kingdom)
15 Ga biyapul ŋayi Garray waŋana ŋarrakala bitjarra,
16 “Yolŋu, märraŋa dhuwali märrma' dharpa maṉḏanha, bala yäkuna wukirrinydja dhipali maṉḏaŋulili; waŋganylilinydja wukirri Djudanha miṯtjinha, ga wiripulilinydja dharpalili nhe yurru wukirri ga Yitjuralnha yäku miṯtjinha.
17 Yo, märraŋa dhuwali dharpanydja maṉḏanha, bala waŋgany‐manaparrana maṉḏanha buku ga buku goŋlilinydja, märr yurru maṉḏa djan'ku yana bitjan waŋganynha rumbalnydja.
18 Ga walala yurru yolŋu'‐yulŋuyunydja dhä‐wirrka'yun bitjanna, ‘Nhä dhuwaliyinydja mayali'?’ bitjanna yurru.
19 Ga nhenydja yurru ḻakarama bitjan, ‘Godthunydja yurru märrama ŋunhi märrma'nha miṯtjinha, Djudanha ga Yitjuralnha, ga walalanydja yurru ŋunhi goŋŋuranydja nhanukalana, bitjan waŋganynha miṯtjinydja.’
20 “Yo, mukthurra yana mulkiya yukirriya ŋunhiyi dharpanydja maṉḏanha goŋdhunydja nhokalay nhe, ga milkuŋa ŋuripa yolŋu'‐yulŋuwanydja,
21 ga ḻakaraŋa walalaŋgu biyakana, gam'. Garrayyu yurru marrtji märrama nhanŋuwaynydja ŋayi yolŋu'‐yulŋunha birrka'mirriŋuru yana wäŋaŋurunydja malaŋuŋuru, bala ŋayi yurru gäma roŋinyamaramana ŋunhiwalayina walalaŋgalaynha walala wäŋalili yirralkalili,
22 bala ŋayi yurru dhä‐manapandja walalanha, dhambay‐manapanna waŋganygumana, märr walala yurru nhina yukurra waŋganyŋurana yana, waŋganynha miṯtji nhanukalana goŋŋura. Ga waŋganynha ŋayipina yurru buŋgawanydja ŋurikiyi walalaŋgu bukmakku yana, ga yakana biyapulnydja walala yurru nhina ganaŋ'thunara barrku'‐barrkuwatj.
23 Yakana biyapul walala yurru yukurra buku‐ŋal'yun waŋarrwu djämawuy goŋbuywunydja, yakana walala yurru biyapul yukurra baḏuwaḏuyunmirri ŋuriŋi be raŋgayunydja, ŋunhi ŋarra yukurra ŋapa‐nherraṉmirri nyinyaŋdhun ŋurikiyi. Yakana biyapulnydja walala yurru djäma yätjkuma, liŋgu ŋarrapi yana walalanha yurru walŋakumanydja be nhäŋurunydja dhawaṯmarama milnyaŋ'mirriŋurunydja romŋuru. Bala ŋarra walalanha yurru ḏarrtjalkkumana, märr yurru walalanydja ŋarrakuwaynha gal'ŋu yolŋu walala, ga ŋarra yurru walalaŋgu Waŋarr God.
24 “Yo, nhinanydja walala yurru yukurra waŋganynha yana miṯtjinydja, ga ŋarrakuna yurru ŋunhi yolŋu djämamirri buŋgawanydja walalaŋgu, ŋunhinayi ŋunhi ŋayinydja balanyarayi bitjan märi'mu nhumalaŋgu Daypit yäku. Bukmakthuna walala yurru dhäruktja yukurra märrama ŋarranha, ga nhinanydja walala yurru ŋarrakalaynha yana wal'ŋu romŋuranydja.
25 Bala walala yurru nhinanydja yukurra ŋunhilinayi wäŋaŋura, ŋunhi ŋarra wekaŋala ŋarrakalaŋuwala djämamirriwala Djaykupkala; walalana yurru yukurra nhina ŋunhiliyinydjayi ga walalaŋgu yumurrku', gupaḏalnha‐wala yana yurru. Ga ŋayinydja ŋunhinydja ŋarraku djämamirrinydja yolŋu walalaŋgu yurru buŋgawana gal'ŋu gupaḏalŋuwuna‐wala yana.
26 Ŋarranydja yurru dhawu'na walalaŋgala nherraṉ, märr walala yurru nhina yukurra ŋayaŋu‐wurrkurrum'thirrina dhikana wal'ŋu, marimiriwnha, mäwaya'na yana, bala ŋuthandja walala yurru bena‐yana gal'ŋu miṯtjinydja.
27 Ga ŋarrapinydja yurru nhina yukurra wäŋaramana ŋunhili walalaŋgala ṉapuŋga' yana dhika wal'ŋu. Ŋarrapi yurru Godtja walalaŋgu, ga walalanydja yurru yolŋu walala ŋarrakuwaynha yana.
28 Yo, bitjanna liŋguna ŋarrakunydja yukurra yurru Buṉbu dhärra ṉapuŋga'na yanana wal'ŋu ŋarrakalaŋuwalana yolŋu'‐yulŋuwala, bala yurru ŋuruŋu ŋunhi yolŋuyu walalay ŋunhi walala yaka marŋgi ŋarraku, walalanydja yurru nhämana, bala marŋgiyirrina, ŋunhi ŋarrapi Garrayyu djarr'yurruna Yitjuralnhanydja miṯtjinha, märr yurru walalanydja ŋarrakuwaynha walala yana gal'ŋu, dhulŋuŋuna yolŋu walala.” Ga bitjarra ŋayi Garray waŋananydja yukurrana.