19
Djudumbuynydja yolŋu walala mirithirrina yana yätjmirri
19:1–11 (The sinfulness of Sodom)
1 Bala ŋunhiyinydja yana märrmany'tja djiwarr'wuy yolŋu maṉḏa marrtjinana‐wala yana bala Djudumlili, yurru balanyara yana rumbalnydja maṉḏa, bitjan yolŋu yana, ga bunananydja maṉḏa ŋunhala Djudumŋuranydja milmitjpana, ḻäy‐wilyunarayuna waluyu. Ŋayi Lottja nhinana‐dharrana galki dhurrwaraŋura ḻoḻuŋura ŋunhili wäŋaŋura buṉbu‐mäypamirriŋura, dharr‐way nhäŋala ŋayi ŋunhiyi märrma'nha yolŋunha maṉḏanha, maṉḏa nhinana lili marrtjina. Dhunupa ŋayi gaŋgathinana Lottja, bala yana gumurr'yurrunana maṉḏaku. Gumurr'yurrunanydja ŋayi ga bunana maṉḏaku,
2 bala waŋanana maṉḏanha bitjarra, “Way maṉḏa, marrtjiyanydja maṉḏa ŋarrakala wäŋalili go. Nhuma yurru nhinanydja ŋarrakala gäthuranydja munhaku, ga goḏarrny'tja, bala nhuma boŋguŋu marrtjina.”
Ga maṉḏanydja waŋana yaka'yurruna bitjarra, “Ŋilinyunydja yurru ŋorra dhiyala bili dhukarrŋura,” bitjarra.
3 Ga ŋayinydja Lottja waŋana dhä‐wuṉḏaŋarryina, “Yaka nhuma yurru ŋorra dhiyala. Nhuma yurru yana marrtjiya ga ŋunhala djinawa' ŋorriya ŋarrakala yana wäŋaŋura.” Ga yuwalkthi maṉḏa marrtjinana malthurruna Lotkuna bala nhanukalana wäŋalili. Ga ŋunhala maṉḏaku ŋathana gurrunhara walala Lotkala djämamirriyunydja walalay, bala maṉḏa ḻukana ŋathana yukurrana.
4 Ŋulinyaramirriyu liŋgu munhaku, yolŋu'‐yulŋunydja ŋurukuy wäŋawuy Djudumbuyŋunydja walala marrtjina lili, bala ḻiw'maraŋalana wäŋanydja ŋunhi Lotkunydja yuḏayuḏana ga ŋaḻapaḻmirrina ḏarramuwurru, walala yukurrana ḏuḏupthurruna wäŋanydja ŋunhi, wutthu'‐wutthurruna dhika,
5 waŋana yatjurruna bitjarra, “Way Lot, wanhaka ŋunhi märrmany'tja yolŋu maṉḏa? Dhawaṯmaraŋa maṉḏanha lili go, ŋanapurru maṉḏaku ḏukṯuk,” bitjarrana yukurrana.
Yo, ŋunhiyi Djudumbuynydja wäŋa mirithirrina yätjnha wal'ŋu, liŋgu walala yukurranha ŋuli ḏarramuwurru ḏukṯukthinyaminya walalawuy märranhaminyarawu walalaŋguway. Ga bitjanarawuyi yana walala ḏukṯukthina ŋurikiyinydja märrma'wunydja mulkuruwunydja yolŋuwu maṉḏaku.
6 Bala yana ŋayi Lottja dhawaṯthurruna, bala dhurrwarana dhaḻ'yurruna,
7 ga waŋana walalanha bitjarra, “Way ḻundu walala, yaka walala biyaka. Yätj dhuwalinydja nhumalaŋgu, mirithirrina yätj.
8 Ŋarra yurru wekama nhumalaŋgu ŋarrakuway gäthu'mirriŋunha maṉḏanha miyalknhana maṉḏanha, yurru yakana ŋarra yurru wekama dhuwala märrma'nhanydja ḏarramunha maṉḏanha nhumalaŋgu. Maṉḏanydja dhuwala ŋarraku yolŋu maṉḏa bunana, ga djäka ŋarra yurru yukurra maṉḏaku ŋamathama.”
9 Yurru walalanydja ŋunhi ḏarramuwurrunydja mirithina ŋaramurryina, bala yiŋgathinana waŋana nhanukala Lotkalanydja bitjarrana, “Way, yol dhuwala nhe yolŋunydja? Mulkuru dhuwala nhe yolŋu be wanhaŋuwuy. Nhäku warray nhe yukurra waŋa ŋanapurrunhanydja nhaltjanarawu djämawu? Gatjuy yarrkthurrana ŋanapurruŋgala; ŋanapurru yurru nhunana djäma yätjkuma.”
Bala yana walala ḏur'yurruna ŋunhiyinydja, walala bini ḏaw'yuna ŋunhiyi dhurrwaranydja buṉbunydja, bala yana märranha bini ŋunhiyi märrma'nhana yolŋunha maṉḏanha.
10 Yurru maṉḏanydja ŋunhi märrma'djiwarr'wuy maṉḏa waṉa‐djarryurruna, ga ḻaw'maraŋala Lotnhana, bala warryurrunana ŋanya lili djinawa'lilina, bala yana dhurrwarana dhaḻ'yurruna.
11 Bala maṉḏa ŋunhi Djudumbuyŋunhanydja yolŋu'‐yulŋunhanydja ḏarramuwurrunhanydja melnha bambaykuŋala, bala walala yakana dhurrwaranydja maḻŋ'maraŋala nhäŋala.
Godthu baḏuwaḏuyurrunana wäŋanha Djudum ga Gumuranydja
19:12–29 (The destruction of Sodom and Gomorrah)
12 Bala ŋunhiyi ḏarramunydja maṉḏa, djiwarr'wuynydja maṉḏa waŋana Lotnha bitjarrana, “Ma' garryu'‐garryurrana nhuŋuway gurruṯu'mirrinhanydja walalanha, nhuma yurru gonha'yunna dhuwalanydja wäŋa,
13 liŋgu ŋanapurru yurru bumana dhuwalanydja, buku‐yupmaramana wäŋanydja. Garrayyunydja liŋguna ŋäkulana dhiyakuy, ŋunhi nhaltjan yolŋuyu walalay yukurra djäma dhiyalami wäŋaŋura mirithirrina yätjnha, bala ŋayi ŋinyalanhana dhuwala djuy'yurrunanydja lili dhiyaku wäŋawu bunharawuna, buku‐yupmaranharawuna.”
14 Bala Lottja marrtjina ŋurikala märrma'walanydja ḏarramuwala maṉḏakala ŋunhi maṉḏa yurru Lotku gäthu'mirriŋunha maṉḏanha märrama, ga ŋayi waŋana maṉḏanha bitjarra, “Waḏutja dhä‐yawaṯthurrana, liŋgu Garrayyunydja yurru baymatthunna dhuwalanydja wäŋa.” Bala maṉḏanydja dharrana gitkitthunmina warray, yana bini ŋunhiyinydja ŋayi maṉḏanha ŋoy‐yawukinya. Yaka walala märr‐yuwalkthina nhanŋu.
15 Munhakumirrina djaḏaw'yunarayuna, bala djiwarr'wuynydja ŋunhi yolŋu maṉḏa waŋana Lotnhana, “Waḏutja gonha'yurrana dhuwala wäŋanydja. Märraŋa nhuŋuway miyalknhanydja ga gäthu'mirriŋunhanydja maṉḏanha, bala gundupuŋana, märr nhumanydja yurru yakana burakirri ŋunhi yurru dhuwalanydja wäŋa buku‐yupthun.”
16 Yurru ŋayinydja Lottja galŋa‐raypinydhina warray, yaka warray ŋayi waḏutja marrtjina. Yurru Garraynydja wuyurruna nhanŋu Lotku, bala ŋuriŋi djiwarr'puyŋuyunydja yolŋuyu maṉḏathu goŋnha walalanha mana'‐manapara waṉana, bala yana warryu'‐warryurrunana ŋuliŋuru dhawaṯmaraŋalana wäŋaŋurunydja ŋanya Lotnha ga nhanŋu miyalknha ga märrma'nha gäthu'mirriŋunha miyalknha maṉḏanha.
17 Ga ŋunhi walala dhawaṯthurrunana liŋguna warraŋullilina, maṉḏa djiwarr'wuynydja yolŋu maṉḏa waŋana bitjarrana, “Ma' gundupuŋana walala ganydjarryuna ŋunhamalana yaŋunhamalana; gundupuŋanydja bukulilina, märr nhuma yurru walŋathirrina. Yaka yana nhuma gulyurra gandarrŋura ŋoyŋura dhiyala bäyma, ga yaka nhäŋa roŋiyiya.”
18-19 Yurru ŋayi Lottja waŋana bitjarra, “Yiw, ŋunha bukunydja dhuwala barrkuna bena‐wala; mak ŋarra ŋuli rakunydhina gandarrŋurana.
20 Nhäma nhe yukurra ŋunha yutjuwaḻa wäŋa gandarrŋuranydja gay, mak ŋarra ŋunhamalana yurru waḻukthun, märr ŋarra yurru walŋathirri ŋunhalayina.”
21 Bala djiwarr'puynydja yolŋu ŋunhi maṉḏa waŋana bitjarra, “Yo manymak. Ŋarra yurru yaka baymatthun ŋunhiyinydja wäŋa.
22 Yurru waṉḏiyanydja waḏutja. Ga ŋunhi nhuma yurru bunanydja ŋunhala wäŋaŋura, bala ŋarra yurru dhunupana baymatthunna dhuwalanydja wäŋa Djudumbuynydja.” Ga yäkunydja ŋayi ŋunhiyi wäŋa yutjuwaḻany'tja Djowana.
23 Bala ŋayi Lottja yana waṉḏinana, yana liŋgu ga mulkanydja ŋayi ŋunhi Djowanydja wäŋa ŋulinyaramirriyuna ŋunhi waluna marrtji lili dhawaṯthun.
24 Ga dhunupana yana ŋayi Godthunydja wutthurrunana baḏuwaḏuyurrunana ŋunhiyi märrma'nhanydja wäŋanha maṉḏaŋunha Djudum ga Gumura; gurthana yarrupthurruna beŋuru djiwarr'ŋurunydja lilinydja, guṉḏa manaparana be nhäna yana butjirina buŋgan. Yo, baduwaḏuyurruna yana warrpam'nha ŋunhiyi wäŋanydja maṉḏanha, ḻiw'maraŋala yana ŋunhiyi yulŋunydja.
25 Bukmakthina ŋunhi yolŋunydja walala murrmurryurruna, ga dharpa nhäranana warrpam'thurrunana yana.
26 Yo, ŋayipina Lotnha walŋathinanydja ŋunhalana wäŋaŋura yutjuwaḻa'ŋurana, yurru dhäykana nhanbala ŋunhili gandarrŋuranydja gulyurruna; ŋayi waṯthurruna roŋiyina Djudumbuynha nhäŋala wäŋa, bala ŋayi ŋulaŋuruyinydja yana monyguŋalana ŋanya, bala ŋayi dhäykanydja ŋunhiyi guṉḏayinana, bitjarrana bitjan wuṉḏaŋarr dje'la.
27 Ŋayi Yipurayimdja munhakumirri yana gaŋgathina, bala yana marrtjina bala bukulilina ŋunhimalana ḏuwaṯthurruna, ŋunhimalana liŋgu wäŋalili ŋunhi maṉḏa yawungu Garray nhina yukurra.
28 Bala ŋayi yarrupthurrunanydja nhäŋala ŋunhi Djudumbuynha; nhämanydja ŋayi ŋawulul'nha waŋganynhana, ŋayi marrtji ṉoluŋdhirri, bitjanna biyaku ŋuli gurtha marrtji nhäri borrk ŋula nhäna, ŋayi marrtji ŋawululny'tja ŋunhi dhawuṯthunna.
29 Yo, ŋayipi Godthu ŋunhiyi bumaranydja yätjnha wäŋanha Djudumbuynhanydja, yurru walŋakuŋalanydja ŋayi ŋanyana Lotnhana, liŋgu Godthu yukurrana guyaŋina ŋanya Yipurayimnha, ga yurruna ŋayi yakanydja bumara Lotnhanydja.