44
Djudanydja dharapullili wapmaranhamina ŋanyapinyaynha ŋayi Bindjamangalanydja
44:1–34 (Judah protected his brother Benjamin)
1 Ga ŋuliŋurunydja dhurrwaraŋuru bala ŋayi Djotjiptja waŋana nhanŋuway djämamirrinha walalanha bitjarra, “Ma' ŋathanydja bathililiyaŋana marrtjiya bukmaklili bathilili malanyŋulili dhiyapanydja walalambala ḏarramuwurrumbala, dhaŋa'‐dhaŋaŋguŋa yana, ga dhälilinydja gurru'‐gurrunhara bathilili malanyŋulili roŋiyinmaraŋayi ŋunhiyi rrupiyanydja malanha walalaŋgu waŋga'‐waŋganygu yana.
2 Yurru ŋunhamala yutjuwaḻa'walanydja ŋathamirrilili bathilili ŋilitjarra ŋarraku dhuwala miḻŋ'‐miḻŋdhunara rupa rrupiya‐guḻku'mirri.” Ga yuwalkthi ŋuriŋiyi djämamirriyunydja bitjarrayi,
3 ga goḏarrny'tja munhakumirrinydja bala ḻaw'yurrunana marrtjinana wäwa'manydjinydja walala.
4 Wäŋgaŋalanydja walala yukurrana‐a‐a, ga märr walala bitjarra wuyupthurruna ya', bala ŋayi Djotjipthunydja djämamirrinhana djuy'yurruna ḻundu‐ŋupanarawuna walalaŋgu, ŋayi waŋananydja ŋanya djuy'yurruna bitjarra, “Gatjuy waḏutja! Wäŋgaŋa ŋuparra ŋunhiyinha walalanha, ga yana liŋgu ga mulkiya walalanha, ga waŋiyanydja biyaka walalaŋgala, ‘Ŋarra nhumalanha wekaŋala ŋamathaŋala, ga nhäku warray nhuma ŋarranhanydja yätjkuŋala liliyi?
5 Nhäku nhuma manaŋina ŋarrakalaŋuwu buŋgawawunydja rupa? Yätjnha mirithirrina dhuwalanydja ŋunhi nhuma bitjarranydja,’ biyaka nhuma yurru waŋiyanydja.”
6 Bala ŋunhi djämamirrinydja waṉḏina, yana liŋgu baṯ‐gay mulkana walalanha, ga waŋana ḻakaraŋala yukurrana Djotjipnhana dhäruk.
7 Ga walalanydja waŋana buku‐ruŋiyinmaraŋala lili bitjarra, “Nhä dhika? Nhaltjan nhuma yukurra waŋanydja? Yaka warray ŋanapurru manaŋina be rupa.
8 Nhäkuna ŋanapurru bini bitjananydja?
9 Ḻarruŋana walala go, ga ŋuli nhuma yurru maḻŋ'marama warray waŋganygala ŋula yolkala bathiŋura, ga ŋunhiyinydja nhuma yurru yolŋunha bumana rakunyguna, ga ŋanapurrunha wiripu‐guḻku'nhanydja yana ŋilitjarra nhumalaŋguway djämamirrinhana walalanha.”
10-12 Bala ŋuriŋi djämamirriyunydja nhäŋa'‐nhaŋalana yup‐yupmaraŋala marrtjina bathinydja malanha, maḻŋ'‐gay maḻŋ'maraŋala nhanukalana Bindjamangalana bathiŋura ŋunhiyi rupany'tja garwarrwarrny'tja.
13 Yurru walala ŋunhi wäwa'mirriŋunydja walala wirrkina dhika buku‐wurana ga warwuyunminana. Ḏutj‐gay roŋi'‐ruŋiyina walala bukmaknha yana balayi Yetjipliliyi.
14 Walala gärrinanydja bunananydja, bala yana walala buku‐nyilŋ'thurruna Djotjipku.
15 Ga ŋayi waŋana walalanha dhä‐wirrka'yurruna bitjarra, “Nhaltjarra dhuwala nhuma yulŋunydja? Nhäku warray nhuma manaŋinanydja ŋarraku rupany'tja? Nhaltjarra nhuma buku‐dhumukthina? . . . ŋarra bini yakana ŋunhi maḻŋ'maranhanydja nhumalaŋgala?”
16 Ga Djudanydja waŋana buku‐ruŋinyamaraŋala Djotjipku bitjarra, “Yakana ŋanapurru yurru waŋa nhokala. Nhaltjanna ŋanapurru yurru milkunharamirrinydja ŋunhi ŋanapurru yaka manaŋina. Ŋanapurru yätjkuŋala djäma ŋäthili, ga dhiyaŋunydja‐wala Godthu yukurra maḻŋ'maramana ŋunhiyi yätj. Bukmaknha ŋanapurru nhinana yurru dhiyalana nhuŋu djämamirrina walala, yakayi yana ŋunhiyi waŋganydja ŋunhi rupa nhanukala maḻŋ'maraŋala.”
17 “Yä‐ä‐äw yaka,” bitjarra ŋayi Djotjiptja. “Ŋunhiyi liŋgu yurru nhinanydja, ŋunhiyi ŋunhi nhanukala rupa yukurrana gärrina, ŋayipi yurru ŋarraku djämamirrinydja, ga wiripu‐guḻkuny'tja nhuma marrtjiya balayi bäpa'mirriŋuwala nhumalaŋgalaŋuwala.”
18 Ga ŋayi Djuda wapthurruna, ga waŋana bitjarra Djotjipkala, “Buŋgawa, yaka ŋarraku mari‐wuniyanydja maḏakarritjthiyanydja. Nhenydja dhuwala yindi buŋgawa, bitjan ŋayipi giŋ, ŋarra nhuŋu yurru ḻakaramana.
19-20 Bili ŋanapurru nhuŋu ŋäthili ḻakaraŋala, ŋunhiyi ŋanapurruŋgu bäpa'mirriŋunydja worruŋuna. Nhanŋu gäthu'mirriŋunydja maṉḏa waŋganybuy yana ŋäṉḏiwuy, yurru waŋganydja ŋuliŋuruyi liŋguna bäyŋuthinana, ga mäḻuny'tja yukurra wirrkina marrkapthun dhiyakunydja Bindjamangunydja.
21-23 Ŋunhi ŋanapurru yurru gonha'yun ŋanya dhipalanydja bäyma, ŋanapurruŋgu bäpa'mirriŋunydja ŋuli rakunydhina.
24-26 “Mäḻuny'tja yaka ḏukṯukmirriyina, ŋayi bini Bindjaman yakaŋga malthuna ŋanapurruŋgu, yurru ŋanapurrunydja waŋana bitjarra, ‘Ŋunhi ŋanapurru yurru yakanydja ŋanya garr'yun, ŋayi yurru ŋuriŋi ḏarramuyu ŋunhalanydja buŋgawayunydja yakana ŋanapurruŋgu ŋatha wekama,’ bitjarra ŋanapurru waŋananydja ŋanya.
27 Ga mäḻuny'tja wirrki yana galŋa‐yätjthina, ga waŋana bitjarra, ‘Miyalkthu ŋarrakala Raytjulyu gurrukaŋala märrma'nha yana waku'mirriŋunha maṉḏanha.
28 Waŋganydja liŋguna bäyŋuthinana; wakinŋuyu wäyindhu ŋanya bumara.
29 Ga ŋuli ŋarra yurru dhuwalanydja ŋurrkama, ŋarranydja yurru wirrkina warwuyun nhanŋu, ga ŋuriŋiyi warwuyunarayu ŋarranha yurru rumbal‐winya'yunmaramana, bili ŋarra dhuwala worruŋuna.’ Bitjarra ŋayi mäḻuny'tja yukurrana waŋana.
30-31 “Yaka ŋarra yurru roŋiyirri bala mäḻu'walanydja goŋ‐wayŋu dhiyakunydja gurrmulwu; ŋayi yurru yana rakunydhirrina ŋuriŋiyi warwuyunarayuna.
32 Ŋarra wäwunguŋala ŋanya djäkawu nhanŋu ga roŋinyamaranharawu liliŋuwu.
33 Buŋgawa buku‐djulŋi, nhinanhamaraŋa ŋarranhana, ŋarra yurru dhiyala yukurra nhina gutha'mirriŋuwala ŋarrakalaŋuwala dharapulŋura; ŋarrana nhuŋu yurru djämamirrinydja, ga ŋanyanydja djuy'yurrana‐wala ŋarrakalaŋuwala bäpawalana.
34 Ŋuli ŋarra yurru roŋiyirri gänanydja bala mäḻu'walanydja, ŋayi yurru mäḻuny'tja wirrkina galŋa‐yätjthirri. Yakana ŋarra ḏukṯuk nhanŋu rakunydhinyarawu.”