5
Yadamguŋuna mala‐wunharawuy
5:1–32 (Adam’s descendants)
1 Yo, ŋunhi ŋayi Godthu djäma ŋurruŋunha wal'ŋu yolŋunha Yadamnha yäkunha, ŋayi djämanydja ŋanya djan'kukuŋala yana dhika bitjarra yana bitjan ŋayipi God;
2 ŋayi djämanydja ḏarramukuŋala ga dhäykakuŋala, bala yana ŋayi waŋanana maṉḏaku, “Ŋarrapi yurru nhumalanha dhika wal'ŋu yana goŋmirriyamanydja,” bitjarra.
3 Bala Yadam nhinananydja yukurrana dhuŋgarranydja ŋupara 130, ga ŋuliŋurunydja dhurrwaraŋuru Yadamgu biyapul walkurnha‐maḻŋ'thurruna, yurru ŋayi ŋunhi gäthu'mirriŋunydja nhanŋu ŋayipiyinyara djan'kuna dhika Yadamdhinyarana, ga yäku nherraranydja ŋayi ŋanya walkurnhanydja nhanŋuway Djap.
4-5 Yadamdja mukthurrunaŋga yana yukurrana nhinana‐a‐a, yumurrkuny'tja nhanŋu marrtjina guḻku'thinana, ḏarramuwurrunydja ga dhäykawurrunydja, yana liŋgu‐u‐u wirrkina wal'ŋu ŋayi worruŋuthina, bala yana ŋayi rakunydhinana, dhuŋgarranydja nhanŋu Yadamgu 930‐na.
6-8 Yadamgunydja ŋunhi walkur Djap ŋuthara wakindhina ḏarramuyinana, bala ŋayi walkurmirriyinana, ga yäku nherraranydja ŋayi ŋanya walkurnhanydja nhanŋuway Yenutj. Ga ŋuliŋuruyinydja bala guḻku'thinana walkurnydja nhanbala marrtjina, ḏarramuwurru ga dhäykawurru, yana liŋgu‐u‐u Djaptja marrtjina worruŋuyinana, bala yana ŋayi ḏalpamdhinana, dhuŋgarranydja nhanŋu Djapku 912‐nha.
9-11 Bala ŋuliŋurunydja Yenutjkuna walkur maḻŋ'thurruna yäku Genan, ga wiripuwurru biyapul nhanŋu yumurrku', bala yana ŋayi rakunydhinana Yenutjtja, dhuŋgarranydja nhanŋu 905‐nha.
12-14 Ga ŋayinydja Genandhunydja walkur‐märraŋala yäkunha Mayalalinhana, ga bitjarrayi yana liŋgu ŋayinydja miṯtji bumara; rakuny gay' ŋayinydja Genandja, dhuŋgarranydja nhanŋu 910‐nha.
15-17 Bala walkurna nhanŋu walŋanydja nhinana yukurrana yäku Mayalalina, ga ŋayinydja walkur‐märraŋala yäkunha Djäritnha, ga bitjarra yana liŋgu wiripuwurrunhanydja ŋayi mala bumara yukurrana yumurrku'nha, yana liŋgu dhuŋgarra nhanŋu 895‐nha, bala yana ŋayi rakunydhinana.
18-20 Ga nhanŋunydja Djäritkunydja walkur maḻŋ'thurruna yäku Yenuk ga wiripuwurru djamarrkuḻi', ga ŋayinydja rakunydhina, dhuŋgarra nhanŋunydja 962‐na.
21-24 Ga nhanŋunydja Yenukkunydja maḻŋ'thurruna walkur ga Mathutjila yäku. Yenuktja yukurrana nhinana waŋganyŋura yana rrambaŋi Godkala, ga biyapul nhanŋu yumurrku' marrtjina maḻŋ'thurruna. Bitjarrana liŋguna yukurrana Yenuktja nhinana galkina yana rrambaŋina wal'ŋu Godkala rom‐dhunupana, yana liŋgu ga dhuŋgarra nhanŋu marrtjina mulkana 365‐nha, bala ŋayinydja marrtjina wiḏi' bitjarra, bili ŋayipina Godthuna ŋanya Yenuknha djaw'yurruna‐wala, bena gonhana.
25-27 Bala ŋuliŋurunydja dhurrwaraŋuru nhanŋuna Mathutjilawuna walkur maḻŋ'thurruna yäku Lamiknha, ga bitjarrayi yana liŋgu wiripuwurru yumurrku' nhanŋunydja marrtjina maḻŋ'thurruna bala, ga ŋayinydja rakunydhina dhuŋgarranydja nhanŋu Mathutjilawu 969‐nha.
28-31 Ga maḻŋ' gay' nhanŋu Lamikkunydja walkur, yäkunydja ŋayi Nowa, ga wiripuwurru biyapul nhanŋu yumurrku' maḻŋ'thurrunayi, bala yana ŋayi rakunydhinana, ga dhuŋgarranydja nhanŋu Lamikku 777‐nha.
32 Ga Nowanydja yukurrana nhinana‐a‐a, maḻŋ' gay' nhanŋunydja walkur walala ḻurrkun', yäku Djim ga Wäm ga Djaypip, yurru nhanŋunydja dhuŋgarra Nowawunydja ga 500‐nha.