58
Dhiyaku ŋayi Garray yuwalktja wal'ŋu ḏukṯuk
58:1–14 (True fasting)
1 Yo, ŋayi Garray waŋana bitjarra, “Wirrki waŋiyanydja, dhä‐warrwar'nha ḻakaraŋa ŋarrakalaŋuwa yolŋu'‐yulŋuwanydja biyaka, ‘Yätjnha wal'ŋu yanana wirrkina nhuma yukurra djäma, yakana ŋamakurru'.
2 Yo, bitjanna liŋgu munhamandhirri walala yukurra ŋuli ḻuŋ'maranhamirri buku‐ŋal'yunarawunydja, milkunhamirri yukurra walalanhawuy walala yanapi walala yukirri ḏukṯukthi ŋänharawu ŋarrakalaŋuwu dhärukku, ga ŋuruŋu yolŋu'‐yulŋuyunydja yukurra guyaŋirri walalanha yanapi walalanydja ŋayaŋu‐dhunupamirri nhina yukurra ŋarrakala gal'ŋu romŋura, yurru yaka warray walala yukurra nhina bitjandhinydja.’ ”
3 Yo, yolŋu walala ŋuli waŋa bitjan, “Ŋilimurrunydja ŋuli dhuwala bukumirriyama yukurra ŋoy‐ŋathamiriwyu, yurru ŋayinydja Garrayyunydja yaka warray yukurra nhäma ŋunhiwalayi. Nhäku ŋunhi ŋilimurru ŋuli bitjandhinydja marrtji ŋoy‐ŋathamiriwnydja, ŋunhi ŋayi yakanydja yukurra mäkiri'‐witjun ŋuli? . . . ga yaka ŋayi ŋuli wekama ŋunhi nhäku ŋilimurru ŋuli ŋäŋ'thun ŋanya?”
Ga ŋayinydja waŋa Garraynydja yukurra bitjan, “Ŋarranydja marŋgi nhumalaŋgu. Yo, bukumirriyamanydja nhe yukurra ŋoy‐ŋathamiriwyu, yurru yuwalktja ŋunhiyi nhinanydja nhe yukurra ŋuriŋi bili nhokalay yana djälyu wal'ŋu, ga bitjandhiyi liŋgu nhe yukurra ŋunhi wiripu‐guḻku'nhanydja muŋdhunna wirrkina wal'ŋu.
4 Yo, bukumirriyamanydja nhe ŋuli bitjandhi warray ŋoy‐ŋathamiriwyu, ŋäŋ'thun ŋarranha ŋula nhäku, yurru bitjan warray liŋgu nhuma yukurra ŋarrtjunmirri warray yulŋunydja, ga mari warray ŋula nhä warray djäma. Yakana ŋarranydja ŋurikiyinydjayi mäkiri'‐witjun yurru bukumirriyanharawuywu.
5 Yo, muḻkurr‐ŋäkirrinydja nhe ŋuli nhunapinya nhe yana milkunharamirri, yanapi nhe yukurra wuyun nhokalayŋu nhe yätjku, yanapi nhe yurru yuwalkkuma gal'ŋu ŋapa‐nherraṉmirri yätjku nhokalay nhe ŋayaŋuŋura. Ŋarranydja yaka ḏukṯuk balanyarawuyi bukumirriyanharawu ŋoy‐ŋathamiriwwunydja; ŋarranydja ḏukṯuk nhuŋu, nhe yurru nhina yukurra ḏarrtjalk yana ŋamakurru' ŋula nhämiriw, yätjmiriw yana.
6 “Nhe yurru rom‐waŋganydhirri yana, ga dhayaḻakumana yurru nhe ŋunhinydja ŋurruwuykmirrinhanydja ga ŋunhi yolŋunha goŋmiriwŋuranydja, ŋunhi nhe ŋuli garrpiṉ walalanha nhokalay nhe romdhu; gulkthurrana nhe yurru ŋunhiyi rakiny'tja, ga ŋoy‐ŋamathirrina nhanŋu, bitjanna nhe yurru bitjan ŋayinydja nhuŋu gurruṯu'mirrina galkiwuynha.
7 Nhe yurru djäka ŋamathama gal'ŋu yolŋuwu nhokalay nhe wäŋalili, ga maranhu‐wekaŋa ŋunhi marrya'nhanydja yolŋunha. Wekaŋa ŋunhi ya' girri'mirriyaŋa yolŋunha ŋunhi ŋayi girri'miriw, ga djäka ŋamathaŋa yana gurrum'thurra ŋuriki nhokalaŋuwu galkiwuywunydja walalaŋgu.
8 “Ga ŋunhi nhe balanyarayinydja ŋayaŋu‐gurruṯu'mirrinydja yolŋu bukmakkunydja gal'ŋu, ŋarranydja yurru nhuna bitjandhi yana liŋgu ŋayaŋu‐gurruṯu'mirriyamayi, goŋmirriyamana manapan nhuna. Djarraṯawun'thunydja nhuna yurru räkukumana, ga waḏutjana yana nhe yurru baḏarraŋ'thirrinydja nhäŋuru malaŋuŋuru rerriŋurunydja, ga mukthunna‐wala yana nhe yurru marrtjina ŋayaŋu‐dhunupana. Ŋayipinydja yurru Garrayyunydja gunganhamaramana nhuna marrtji ŋula nhäŋuru malaŋuru yätjŋuru, ḻiw'maramana yana.
9 Ga ŋunhi nhe yurru ŋäŋ'thun Garraynhanydja ŋula nhäku, ŋayinydja yurru nhuŋu yana wekamana‐wala; ŋunhi nhe yurru wäthun nhanukalanydja märrliliyama, ŋayinydja yurru ŋäma nhuna, ga waŋa yurru bitjanna, ‘Dhuwala ŋarra, galki yana nhokala.’ Yurru ŋäthilinydja nhe yurru ḏaḏawyun dhipuŋuruyi djämaŋuru yätjŋuru, ga djäma ŋamathamana wal'ŋu. Yakana nhe yurru biyapulnydja muŋdhun yukurra ŋunhi ŋurruwuyknhanydja yolŋunha, ga yaka marrtjiya djarrma' waŋa biyaka dhäwu'kuŋa yolŋunha wiripuŋunhanydja, yana nhe yurru ḻakaranhamirri yukurra nhuŋuway nhe gal'ŋu yätj malanha, ga yaka maŋutji‐wulaŋa ŋunha wiripu‐guḻku'nhanydja.
10 Yo, ŋuli nhe yurru wekama ŋatha ŋuriki goŋmiriwŋura ŋunhi yolŋu, ga guŋga'yun marrtji ŋunhinha ŋunhi ŋayi ŋayaŋu‐warwumirri, ŋayinydja yurru ŋunhi buku‐munhany'tja yana winya'yunna‐wala waṉḏirrina, bala nhe yurru nhina yukurra djarraṯawun'ŋurana yanana.
11 Bala ŋayi yurru Garrayyunydja bitjanna liŋguna goŋ‐gulamana yukurra nhuna, wekama marrtji yurru nhuŋu manymaknha nhä malanha; bitjanna liŋguna nhe yurru ḏäwalana yana rerrimiriwnha nhämiriwnha, ga ŋayaŋunydja nhuŋu yurru djinawany'tja yakana ŋula ganbarkthirri, liŋgu ŋunhi ŋayaŋuŋuranydja nhokala yurru yukurra bitjanna liŋguna ŋanbaw'‐ŋanbawyunna ŋunhinayi walŋamirrina wal'ŋu gapu.
12 Weyinŋumirrina wal'ŋu nhuŋu wäŋanydja yukurrana djingaryurruna ḏaw'‐ḏawyunara muṉguykunharana, yurru nhumanydja yurru ŋunhiyi gaŋgathinyamirriyama biyapul yuṯakumayi ŋunhiyi wäŋanha marrtji, märr yurru ŋuruŋu bukmakthunydja yolŋuyu nhämana, bala waŋa yurru bitjanna, ‘Way, nhaltjarra dhuwalanydja djäma ḻatju'kuŋalanydja dhikanydja wal'ŋu, yuṯakuŋalanydja wäŋanha,’ bitjanna yurru.
13 “Ga guyaŋiya ŋunhinydja wal'ŋu walu dhulŋuŋunydja ŋunhi ŋarrakuwaynydja. Ganaŋ'maraŋa gäna gal'ŋu ŋarrakuway yana. Yaka marrtjiya ŋula wanhamala, ga djäma ŋula nhä nhokalaynydja nhe djälyu, ga yaka yukirriya waŋiya dhäpark dhäruk ŋuriŋiyinydjayi waluyu.
14 Ŋuli nhe yurru yana märr‐ŋal'yun yukurra ŋarrakalay, ŋayaŋu‐wurrkurrum'thunydja, bala nhenydja yurru nhina yukurra ŋayaŋu‐wurrkurrum'nha dhikana ŋarrakalaynha nyeyaḻŋura; nhenydja yurru ŋunhi bena‐wala wal'ŋu djuḻkmarama ŋula nhänhanydja, garrwarnha nhe yurru bukmakkala. Yo, yuwalk yana ŋarra yurru nhuna goŋmirriyamanydja wal'ŋu dhika, rarryunna yurru nhuŋunydja ŋamakurru'na nhä malanha, ŋunhi ŋarra dhawu'‐nherrara nhokalaŋuwu märi'muwu Djaykupku. Ŋarranydja dhuwala ŋarrapi wal'ŋu yana Garraynydja, ga ŋarrapi yana dhuwalayi dhäruktja.” Bitjarra ŋayi Garray waŋananydja.