6
Yitjayawala Godku ganaŋ'thunaranydja wal'ŋu nhänharawuynha
6:1–13 Isaiah’s vision of the Lord’s holiness
1 Yo, ŋulinyaramirriyu dhuŋgarrayu ŋunhi buŋgawa Giŋ Yutjaya rakunydhina, ŋarra yukurrana nhäŋala Godku Buṉbu, ŋayi yukurrana dhärrana ḻapthunarana. Bala ŋarra Godnhana ŋanyapinyaynha nhäŋala, ŋayi yukurrana nhinana nhanukalay ŋayi ŋunhili nhinanharawuyŋura, nhinana ŋayi yukurrana ŋunhana bala garrwarnha wal'ŋu, maryakalnydja nhanbala dhikana ŋanyana ḻatju'na, weyinnha ŋanya dhika, warrpam'nha monyguŋala yukurrana wäŋanydja ŋunha.
2 Ga wiripunydja ŋarra ŋurukuy nhäma bäyma wal'ŋu djiwarr'wuynha yolŋunha walalanha, walala yukurra nhina ḻiw'marama ŋanya garrwarkurru, yurru binbarrmirri walala yulŋunydja, 6 binbarrnydja walalaŋgu; märrma'‐marrma'yu binbarryu malaŋuyu yukurra ŋäkirrmarama walalanhawuy walala bukunydja, ga märrma'‐marrmayuyi ŋäkirrmarama walalanha yukurra ḻukunydja malanha, ga märrma'‐marrmayuyi walala yukurra buṯthunmirri binbarryunydja.
3 Ga waŋanhamirrinydja walala yukurra ḻakaranhamirrinydja nhanukalaŋuwuy, wokthundja bitjanna,
“Nhäna dhuwalanydja ḻatju'na wal'ŋu, dhuyuna ŋanya dhika garrkuḻuknha, biyapulnha‐wala dhuyu,
ganydjarr‐ḏumurruna wal'ŋu Garray God, gänana ŋayipina wal'ŋu;
nhanŋu djarraṯawun'tja warrpam'thun yukurra räkukuma ŋunha djiwarr'ŋuranydja,
monyguma yukurra ŋunha munathany'tja wäŋa buku‐ḻiw'marama.”
4 Ga ŋunhi walala waŋa marrtji bitjandja, bala ŋayinydja marrtji ŋunha wäŋanydja gur'kuryunna, ga ŋawululny'tja marrtji buŋbulyun dhawuṯthunna bala, warrpam'nha monyguma ŋunha Buṉbunydja.
5 Nhämanydja ŋarra ŋunhiyi malanha, bala yana ŋarra waŋanydja bitjanna, “Ŋarranydja dhuwala yätjnha yolŋu, yakana ŋamakurru'. Ganaŋ'thun ŋarra yukurra dhuwala Garraywala, barrkuthirri wuyupthun. Ŋarranydja dhuwala ḏarramu yätjnha, waŋa ŋarra ŋuli dhäruk yätjnha, yakana ḏarrtjalk, ga bitjandhiyi ŋarra yukurra nhina dhiyalanydja malaŋura yolŋu'‐yulŋuwalanydja ŋunhi walala yukurra waŋa yätjkuma bitjandhiyi bili bitjan ŋarra. Ŋarra mel‐ŋal'yurruna Garraywala, ŋarrapina maŋutjiyu nhäŋala wal'ŋu ŋurruŋunha buŋgawanhana ŋilimurruŋgu bukmakku, ŋunha ŋayipi yana waŋgany Garray ganydjarr‐ḏumurrunydja,” bitjan ŋarra ḻakaramanydja.
6-7 Ŋuliŋurunydja dhurrwaraŋuru waŋgany djiwarr'wuy yolŋu buṯthun bala barŋlilina, bala märrama gurthamirrina ḻirrwi'na, bala yana buṯthun liliyi ŋarrakalana, gämanydja nhina lili goŋdhu ŋunhiyi ḻirrwi', bala dhurrwaralilina mam'marama ŋarrakala, mam'‐gay, bala waŋa bitjanna, “Dhiyaŋunydja gay Godthu liŋguna nhuna dhurrwaranydja rurrwuyurrunana ḏarrtjalkkuŋalana, liŋguna nhuŋu dhuwurr‐yätjtja ŋäkirrmaraŋala, bäy‐ḻakaraŋalana liŋguna.”
8 Ga ŋuliŋurunydja ŋarra ŋäma rirrakaynha Garraynha, ŋayi bitjan waŋa, “Yolnhana dhika ŋarra yurru djuy'yundja? Yol yurru marrtji balanydja, ga djäma ŋarrakunydja?” Bala ŋarranydja waŋa buku‐ruŋiyinmarama bitjan, “Garray, dhuwalana ŋarranydja. Djuy'yurra ŋarranhana,” bitjan.
9 Bala ŋayi djuy'yurrunana ŋarranha dhäwu'mirrinhana, ga dhuwalana ŋarrakala ŋayi dhäwuny'tja wekaŋala ḻakaranharawu ŋuripa yolŋu'‐yulŋuwanydja gam', “Yo, mäkiri'‐witjun warray nhuma yurru yulŋunydja wirrki warray gal'ŋu, yurru yakana nhuma yurru dharaŋandja ŋämanydja; nhäma warray nhuma yurru yulŋunydja, yurru yakana nhuma yurru dharaŋandja nhäma.”
10 Yo, Godthunydja ḻakaraŋala ŋarrakala bitjarra, “Gatjuy marrtjiya ga ḻakaraŋana biyaka raypirri'yurra walalanha, yurru mäkiriny'tja walalaŋgu yurru dhumukthirrina gungamana, ga maŋutjinydja walalaŋgu yurru bambaythirrina; yakana walala yurru ŋäma ga nhäma, ga yakana walala yurru dharaŋandja. Ŋuli walala yurru yuwalk gal'ŋu ŋäma ga nhäma, mak walalanydja yurru yana bilyunna ŋarrakalana, bala ŋarranydja yurru walalanha walŋakumana yana.” Ga bitjarrayina ŋayi yukurrana Garray God waŋananydja ŋarrakala.
11-12 Bala ŋarra biyapul dhä‐wirrka'yurruna Garraynha bitjarra, “Garray, nhämunha'mirri walala yurru yolŋu'‐yulŋu dhuŋamirrinydja yukurra baḏak nhina ŋänharamiriwnydja ga nhänharamiriwnydja?” Ga ŋayinydja Garraynydja buku‐wakmaraŋala waŋana balanydja bitjarra, “Bäy yurru ga wäŋa dhuwala buku‐yupthun buḻwaŋ'thun yurru, ga yolŋumiriwyirri ŋayi dhuwala yurru wäŋa, liŋgu ŋarra yurru barrkuwatjkuma yolŋu'‐yulŋunhanydja bena‐wala barrkulilina wäŋalili.
13 Yo, ŋarrakunydja yurru yolŋu walala miṯtji balanyarana bitjan dharpa gulkthunara dhuḏi‐wumbunhara, ga ŋunhina liŋgu dhuḏina yukurra yurru djingaryundja. Ga yalalaŋumirrinydja ŋunhiyi dhuḏinydja dharpa yurru ŋuthandhi biyapul walŋathirriyi.”