13
Djämdjin dhawal‐wuyaŋinana
13:1–25 (Samson was born)
1 Ga biyapul ŋunhi Yitjuralpuyŋunydja miṯtji ŋanydjaḻa'yurruna, ga djäma yätjthi ŋunhi rom malanha, gonha'yurrunayi Garraynhanydja. Bala marrtjina miriŋuna bunana Bilitjiyawuy bäpurru' walalaŋgu, ga walalana märraŋala, bala buŋgawayinana walalaŋgu Yitjuralpuyŋuwunydja miṯtjiwu dhuŋgarranydja ŋupara 40.
2 Ŋulinyaramirriyu waluyu ḏarramu yäku Manawa yukurrana nhinana ŋunhalayi Yitjural wäŋaŋura, ga nhanŋu miyalktja ŋunhiyi yothumiriw, yaka yukurrana yothunha gurrukaŋala ŋayi.
3 Waŋganymirriyu waluyu Garraywu djiwarr'wuy yolŋu bunana nhanŋu ŋurikiyi miyalkku, rumbalnydja bitjan yolŋu yana; waŋananydja ŋayi ŋunhi djiwarr'wuynydja yolŋu bitjarra, “Way, dhuwala nhe yothumiriw, yaka nhe ŋula yothunha gurrukanha, yurru galki nhe yurru yothumirriyirrina yulŋunydja, ga yothunydja nhe yurru gurrukama ḏarramunha.
4 Yaka yana nhe yurru ḻukiya gapu ŋänitjiny'tja,
5 ga ŋunhi ŋayi yurru yothu dhuwala dhawal‐wuyaŋirrina nhokuŋu, nhenydja yurru yaka yana ŋanya marwattja gulkthurra, liŋgu ŋayinydja yurru dhuwalayi gänaŋuna wal'ŋu, ganaŋ'maranharana nhanŋuwaynha Godkuna yothu. Ŋayina yurru nhokala gäthu'mirriŋuyuna walŋakumanydja ŋunha Yitjuralpuyŋunhanydja, dhawaṯmarama yurru ŋurukala Bilitjiyapuyŋuwalanydja miriŋuwala, ŋunhi walala yukurra buŋgawayirri ŋuli nhumalaŋgu.”
6 Bala yana ŋayi ŋunhi dhäykanydja marrtjinana, bala ḻakaraŋala dhuway'mirriŋuwunydja bitjarrana, “Way, yolŋu dhuwala ŋarraku bunana dhäwu'mirri, ga rumbalnydja ŋayi ŋunhi balanyara bitjan dhawu'mirri ŋulaŋuru djiwarr'ŋuru, yurru yaka ŋayi ḻakaranhamina ŋarrakala yäkunydja.
7 Ŋayi ḻakaraŋalanydja ŋarrakala ŋunhi ŋarranydja yurru galki yothumirriyirrina, ga gurrukamanydja ŋarra yurru ḏarramunha yothu'nhanydja. Ŋayi ḻakaraŋalanydja ŋarraku, ŋarra yurru yaka ḻuka gapu ŋänitji, bili yothuny'tja dhuwala ḏarramunydja yurru ganaŋ'marama nhanŋuway Godku; ŋayinydja yurru nhanŋuway yana Godku yolŋu nhina yukurra, yana liŋgu ga rakunydhirri ŋayi yurru.”
8 Bala ŋayi Manawanydja nhanŋu dhuway'mirriŋunydja bukumirriyaŋalana Godnha, ga waŋana, “Garray, roŋiyinmaraŋa dhuwali dhäwu'‐gänharamirrinha liliyi, märr ŋayi yurru marŋgikuma ŋinyalanha, ḻakarama nhaltjan dhika ŋilinyu yurru ŋuthanmarama yothu'nha ŋamathamanydja wal'ŋu.”
9 Ga yuwalknha Godthu djuy'yurrunana ŋunhiyi dhäwu'mirrinhanydja liliyi, ŋayi maḻŋ'thurruna biyapul ŋunhala ŋurikala miyalkkala, ŋunhi ŋayi yukurrana nhinana ŋunhala dhulmu‐waṉarra'ŋura wäŋaŋura.
10 Bala yana ŋayi dhunupa ṉaŋ'thurrunana, ga garr'yurruna dhuway'mirriŋunhana nhanŋuway.
11 Ga ŋayinydja Manawanydja marrtjinana, bala waŋana bitjarrana, “Dhuwala nhe ḏarramunydja? . . . ŋunhi nhe dhäwu' gäŋala, ga ḻakaraŋala ŋarrakalaŋuwala miyalkkala?”
Ga ŋayinydja waŋana, “Yo,” bitjarra.
12 Ga ŋayi Manawayunydja waŋana ŋanya bitjarra, “Ŋunhi nhuŋu dhäruk yurru dhawaṯthun yuwalktja wal'ŋu, ga nhä yurru dhiyaŋuyi ḏarramuyunydja djäma? Nhaltjurruna ŋayi boŋguŋu nhininydja yukurri?”
13-14 Ga ŋayinydja ŋuriŋi yolŋuyunydja buku‐ruŋiyinmaraŋala ŋunhi yäna liŋgu dhäruktja dhuḏakthunmina ŋunhi ŋayi ŋäthili ḻakaraŋala, “Dhuwalayi yothu yurru nhanŋuwaynha ganaŋ'maranharana Godkuna,” bitjarra.
15-18 Ga ŋayinydja ŋunhi Manawanydja waṉḏina, ga wäyinnha warray märraŋala nanikutnha ga ŋatha. Yurru ŋuriŋi dhäwu'‐gänharamirriyunydja yaka ḻukananydja ŋunhiyi ŋatha.
19 Bala ŋayi Manawayu gurrunharana yana ŋunhiyi ŋathanydja ŋunhimala guṉḏalilina, bala bathara Godkuna wekaŋala.
20-21 Ga ŋunhi ŋayi marrtjina ṉoluŋdhinana bala ŋatŋatthurrunana, bala ŋayinydja ŋunhiyi Garraywu dhäwu'mirrinydja dhawuṯthurrunana marrtjina djiwarr'lilina ŋulana ŋäṉarrkurruna. Bala ŋayi Manawayunydja dharaŋarana ŋunhi ŋunhiyinydja ḏarramu ŋayipi warray, yuwalktja ŋunhi wal'ŋu, Garray warray. Ga ŋayipi ŋunhi ga nhanŋu miyalk maṉḏa ṉepal‐nyilŋ'thurrunana, ḏupthunminana maṉḏa bukunydja munatha'lilina, bala maṉḏanydja yakana biyapulnydja nhäŋala ŋunhi djiwarr'wuynha yolŋunha.
22 Ga ŋayi Manawanydja waŋana dhäykawala nhanukalaŋuwala bitjarra, “Godthu yurru ŋitjalanha bumana, liŋgu ŋali mel‐ŋal'yurruna Garraywala.”
23 Yurru ŋayinydja dhäykanydja nhanukala waŋana bitjarra, “Yä‐ä‐äw. Yaka warray ŋayi yurru buma ŋitjalanha. Ŋunhinydja ŋayi märraŋala ŋitjalaŋguŋu mundhurr, ga ḻakaraŋala ŋayi ŋitjalaŋgu ŋunhi ḻatju' dhäwu'. Ŋilimurru yurru walŋa nhina, yaka rakunydhirri.”
24-25 Ga yuwalknha dhika ŋunhi miyalktja yothumirriyinana, ga ŋunhi ŋayi nhanukuŋu dhawal‐wuyaŋinanydja ḏarramu, ga yäkunydja ŋayi nherrara ŋanya Djämdjinnha. Ŋunhiyi yothu ŋutharana marrtjina, ga Godthunydja yukurrana gäŋala ḻatju'kuŋalana ŋanya, bala ŋayi ŋutharanydja marrtjina ŋunhi ŋutu'yinana dhikana ganydjarrnydja, ŋunhi ŋanya ganydjarrmirriyaŋala ŋayipi Godthu.