3
Godthu nherrara ŋurru'‐ŋurruŋunha walŋakunharawu Yitjuralpuyŋuwunydja miṯtjiwu ŋurikalaynydja walalaŋgalaŋuwala miriŋuwalanydja
3:1–30 (God appointed leaders to save Israel from their enemies)
3:1–6
Yo, ŋunhi wiripunydja miṯtji malanha yolŋu'‐yulŋu mukthurrunana yukurrana nhinana ŋunhilina bäymana Gaynannha, rrambaŋina ŋunhiyi Yitjuralpuyŋuna, ga dhuwala walala bäpurruny'tja gam', Gaynanbuy ga Yitjpuy ga Yamarpuy, ga wiripu‐guḻku' bäpurru' malanha. Yo, Godtja waŋana bitjarra, “Ŋunhiyinydjayi miriŋu walala yurru yukurra nhinana yana mukthunna ŋunhili Yitjuralnha, märr yurru ŋarrakunydja ŋunhi yolŋu walala marŋgiyirri nhaltjan walala yurru baḏuwaḏuyun miriŋunha. Ga bitjandhi liŋgu walala ŋarrakunydja yurru yolŋu'‐yulŋunha gatjarr'yundhi ŋuriŋiyi miriŋuyunydja, yana yurru maḻŋ'marama walalanha, wanhaka walala yurru dhärukku malthun ŋarraku, mak bäyŋu.” Yurru walalanydja ŋuriŋi Yitjuralpuyŋuyunydja ḏarramuwurruyu märraŋalana marrtjina ŋunhi wiripuŋunhana bäpurru'nha dhäykawurrunha, ga bitjarrayi liŋgu walala rarr'yurrunayi bala walalaŋgunydja gäthu'mirriŋunha walalanha dhäykawurrunha, ŋuriki Gaynanbuyŋuwunydja ḏarramuwurruŋgu märranharawu, bala walala yukurrana rrambaŋina buku‐ŋal'yurrunanydja ŋurikina waŋarrwu walalaŋgu wiripu‐guḻku'wuna Gaynanbuyŋuwuna.
7 Yo, ŋuriŋi Yitjuralpuyŋuyunydja yukurranha ŋuli djäma yätjnha mirithirrina dhika, ŋunhina malanha ŋunhi ŋayi yukurra God Waŋarr ŋaramurryirri ŋuriki malanyŋuwu, nhämunha'wu waŋarrwu walalaŋgu; walala buku‐dhumukthinana meṉguŋalana yuwalkŋunhanydja wal'ŋu waŋarrnha, ga djämanydja walala yukurrana ŋurikina waŋarrwu Bälwuna ga Yatjarawuna.
8 Bala ŋayinydja Garraynydja walalaŋgu wirrkina dhika ŋaramurryina ŋuriki Yitjuralpuyŋuwunydja, bala ŋayi marrtjina wekaŋalana walalanha ŋunhi Yitjuralpuyŋunhanydja miriŋuwalana goŋlili, ga ŋuriŋiyi giŋdhu miriŋuwalanydja yukurrana walalanha ŋayathaŋalanydja 8 dhuŋgarranydja ŋupara.
9 Bala walalanydja ŋunhi Yitjuralpuyŋunydja wäthurruna guŋga'yunarawuna nhanukala Garraywalana, ga ŋayinydja Godthunydja nherrara djarr'yurruna ŋurruŋunha yolŋunha walŋakunharawuna walalaŋgu, ḏarramunha yäkunha Watnilnhana.
10 Bala Garrayyu djuy'yurrunana‐wala nhanŋuwaynha ŋayi Garrkuḻuknhana Birrimbirrnha nhanukala Watnilwalanydja, ga ŋuriŋiyi ganydjarryu ŋanya wuṉḏaŋarrkuŋalana, märr ŋayi yurru walŋakumana nhanŋuwaynha ŋunhi miṯtjinha. Bala walala marrtjina ŋuriŋi Yitjuralpuyŋuyunydja ḏupthurrunana ŋunhi miriŋunhanydja buŋgawanha, ŋunhinhanydja ŋunhi ŋayi yukurrana ŋäthili walalanha mala‐ḏälkuŋala.
11 Bala walala yukurrana nhinana ŋamathaŋalana, marimiriwŋurana, ga yana liŋgu ga Watnil rakunydhina. Yo, nhinananydja walala yukurrana walaŋguŋalana dhika, marimiriwnha yanana weyinnha, 40‐na dhuŋgarranydja.
12-14 Ga ŋunhi ŋayi rakunydhinanydja Watnil, bala yana walalanydja ŋunhi Yitjuralpuyŋunydja dhunupa ŋanydjaḻa'yurrunana balayi yätjliliyi dhukarrlili. Ga ŋayi Garrayyunydja biyapul wekaŋala walalanha wiripuŋuwalana miriŋuwala, ŋurikala Mawappuyŋuwalana giŋgala; ŋayi ŋunhi giŋdja nyäṉ'thurruna lili beŋuru marililina, bala yana märraŋalana, ga djaw'yurrunana ŋunhiyi wäŋanydja ga yolŋu'‐yulŋunha ŋunhi, bala ŋayina buŋgawayina yukurrana walalaŋgu ŋurukuynha Mawappuynha wäŋawuy. Yo, ŋayina buŋgawayina ŋuriki Yitjuralpuyŋuwunydja 18 dhuŋgarranydja ŋupara, yurru bukmaktja galŋa‐yätjthinana yukurrana nhinana, warrpam'nha galŋa‐miḏikinana dhikana yätjthinana.
15-30 Ŋuliŋurunydja dhurrwaraŋuru walala liliyi roŋiyina Garraywalayi, ga waŋananydja walala yukurrana wäthurruna nhanŋu walŋakunharawuna walalaŋgu. Ga ŋayinydja Garrayyunydja ŋäkula walalanha, ga biyapul ŋayi wekaŋala walalaŋgu wiripuŋunhana ŋurruŋunha, märr ŋayina yurru walŋakuma walalanha. Ga ŋuriŋiyinydja ŋurruŋuyu ḏarramuyu yäkuyu Yewutthunydja bumara rakunyguna ŋunhi giŋnha Mawappuyŋunhanydja. Ga ŋuliŋuru dhurrwaraŋuru Yewutthu yurrum'maraŋalana waŋganylilina Yitjuralpuyŋunhanydja yolŋu'‐yulŋunha, bala waŋananydja ŋayi bitjarrana walalaŋgu, “Go malthurrana ŋarraku. Garrayyunydja liŋguna wekaŋala ŋilimurruŋgalana goŋlili Mawappuyŋunhanydja.” Bala walalanydja ŋunhi Yitjuralpuyŋunydja marrtjinana‐wala yana, bumarana marrtjina ŋunhi Mawappuyŋunhanydja yolŋu'‐yulŋunha, ga warrpam'nha ŋunhi ḏarramuwurrunydja burakina, yakana ŋula waŋgany walŋathina. Bala yana Yitjuralpuyŋunydja yukurrana nhinanana ŋamathaŋalana marimiriwnha; weyinŋumirrina walala yukurrana nhinana marimiriwnydja 80‐na dhuŋgarra ŋupara. Yo, nhinananydja walala yukurrana dhika walaŋguŋalana, yana liŋgu‐u‐u ga ŋurruŋu ŋunhi walalaŋgu rakunydhina Yewut yäku.