2
Yitjuralnydja miṯtji dhuwala nhanŋuway dhulŋuŋu Godku
2:1–13 (God’s care for Israel)
1-2 Biyapul ŋayi Garray waŋana ŋarrakala bitjarra, “Ḻakaraŋa ŋarrakalaŋuwa yolŋu'‐yulŋuwa Djurutjalamdja dhuwala dhäruk gam', ‘Ŋarra guyaŋirri yukurra roŋiyirri bala ŋunha ŋurruthanharawuy wal'ŋu, ŋunhi nhuma ŋurruthaŋala wekanhamina yukurrana ŋayaŋu‐nherraṉmina ŋarrakala, ga wirrki nhuma yana märr‐ŋamathinanydja wal'ŋu ŋarraku. Nhumanydja dhuwala ŋarraku, balanyarana bitjan dhäyka ŋunhi ŋarra nhuna märraŋala ŋarrakuwayliliyaŋala. Ŋäthilinydja nhuma ŋunhi malthurruna galki yana ŋarraku, bäythi ŋunhi ŋali yukurrana marrtjina be ŋanhdharkkurrunydja wäŋakurru ŋathamiriwkurrunydja.
3 Nhuma Yitjural, ŋäthilinydja ŋunhinydja nhuma yukurrana nhinana ḏarrtjalk wal'ŋu yana, ganaŋ'thunara ŋuliŋuru yätjŋurunydja, ŋarrakuway wal'ŋu yana dhulŋuŋu ŋunhiyinydja yolŋu walala nhuma, ga ŋunhi nhumalanha ŋuli ŋula yolthu ŋayaŋu‐yätjkunhanydja bunha, ŋarranydja ŋuli bitjanayi liŋgu yana buku‐ruŋinyamaranhayi walalanhanydja bunha.’ Dhuwalayinydja malanha dhäruk yukurrana waŋana ŋayipi yana Garray.”
4-5 Yo, mäkiri'‐witjurrana walala dhiyakuyi Garraywalaŋuwunydja dhärukku nhuma yolŋu'‐yulŋu Yitjuralpuyŋu, ŋayi yukurra waŋanydja bitjanna, “Nhäku ŋunhi walala nhumalaŋgala märi'muyunydja walalay gonha'yurrunanydja ŋarranha? Nhä dhika ŋarranydja? . . . yätj ŋarra waŋarrnydja? Nhäku walala ŋunhi bilyurruna ŋarrakalaŋuŋurunydja wiripuŋuwalanydja waŋarrwala? Yätjnha yana dhuwaliyinydjayi, bawa'mirrina rom, liŋgu ŋunhiyinydja waŋarr malanha ŋula nhäna, rakunynha walŋamiriwnha.
6 “Yo, liŋgu ŋarra ŋunhi märraŋalanydja dhawaṯmaraŋalanydja nhumalaŋgu märi'munhanydja walalanha ŋulaŋuru Yetjipŋurunydja, goŋŋuru miriŋuwalanydja, yurru walalanydja yaka warray ḏukṯukthina ŋarraku. Ŋarra gäŋalanydja walalanha yukurrana ŋula ŋanhdharkkurru wäŋakurru, yolŋumiriwkurru,
7 bala ŋarra wapmaraŋalana walalanha dhipalana dhapirrklilina wäŋalili wal'ŋu, märr walala yurru yukurra märr‐bakthun maranhuyu nhina dhiyalana ŋatha‐guḻku'mirriŋurana wäŋaŋura. Yurru walalanydja yätjkuŋala warray baḏuwaḏuyurruna dhuwalayi wäŋanha ŋuriŋi warray walalaŋgalay yätjthu warray romdhu, dhuwalayinydja wäŋa ŋunhi ŋarra wekaŋala walalaŋgu ŋarrapi.
8 Walalanydja bini ŋunhi ḏalkarra'mirrinydja walala waŋanha bitjana muka, ‘Wanhaka dhika ŋayi Garraynydja? Ŋilimurru yurru roŋiyirriyi nhanukala.’ Yurru walalanydja yaka warray bitjarrayi, liŋgu ŋunhiyinydja walala rom‐dharraymirri walala, yaka walala marŋginydja ŋarraku yuwalktja. Walala ŋunhi ŋurru'‐ŋurruŋunydja yolŋu'‐yulŋu ŋuyulkthina warray ŋarraku, ḏiltji warray wekaŋala, ga walala ŋunhi djawarrkmirri walala yolŋu'‐yulŋu waŋa yukurra be wiripuŋuwala warray waŋarrwala, yäku ḻakarama Bälnha warray, yana walala ḻayḻayyunna yukurra ŋunhilina be nhäŋiniŋ'ŋurana romŋura.
9 “Bala ŋarranydja yurru nhumalanha ŋarrakalaynha ŋarra gäma gumurrlili wapmarama dhä‐wirrka'yunarawuna yukurranharawu mala‐yarr'yunarawuna, nhumalanha ga nhumalaŋgu yumurrku'nha.
10-11 Gatjuy marrtjiyana ḻarruŋana, ga yakana yana nhe yurru ŋula waŋganynha miṯtjinha maḻŋ'maramanydja, ŋunhi walala yurru ganan walalaŋguway wal'ŋu ŋunhi waŋarrnha ga buku‐ŋal'yun ŋunha wiripuŋuwuna waŋarrwu, bäyyi ŋunhi walalaŋgu waŋarr yakanydja walŋa ga yuwalkŋu. Yurru ŋarrakalanydja yolŋu'‐yulŋuyu gonha'yurruna warray, ŋapa warray wekaŋala ŋarraku, ŋunhinhanydja ḻatju'nhanydja walalaŋgu dhikanydja yuwalkŋunhanydja Godnha Waŋarrnha, ga buku‐ŋal'yundja walala yukurra ŋurikinayi nhäŋiniŋ'kuna ŋula nhäkuna waŋarrwu.
12 Ŋunha djiwarr'wuyyunydja walalay yukurra ṉirryunna nhäma, ga bitjanna yukurra waŋa, ‘Nhäku warray ŋunha walala gonha'yurruna ḻatju'nhanydja ŋunhi Godnha wal'ŋu?’ bitjanna, bala walala buku‐djaw'yunminana ŋuliŋuruyi nhänharaŋurunydja.
13 Liŋgu ŋarrakalaynydja yolŋu'‐yulŋuyu djäma märrma' romdja yätj yana wal'ŋu mirithirri. Ŋurruŋunydja walala gatjpaḻ'yurruna ŋarrakalaŋuŋuru, ŋunhi ŋarranydja balanyarana bitjan ŋunhi riyala gapu yukurra dhawaṯthun walŋa wal'ŋu yana, ga ŋuliŋurunydja dhurrwaraŋuru ŋunhi walala bilyurruna ŋapa‐wekaŋala ŋarraku, bala walala djämana yukurrana yaw'yurrunana goŋdhuna walalaŋgalay maḻŋ'maranharawu gapuwuna, yurru ŋarŋganydja ŋunhi walalaŋguŋu yaw'yunara baṉḏanynha gapumiriwnha.”
Yitjuralnydja ḏiltjina wekanhamina Garraywu
2:14–37 (The results of Israel’s unfaithfulness)
14 Yo, Godthu waŋa ŋuli yukurra bitjan, “Nhuma Yitjural miṯtji, nhäku nhuma nhina yukurra garrpiṉarawuynydja? Nhumanydja ŋunhi dhawal‐wuyaŋina yäna warray, yaka warray garrpiṉara ŋula yolkuŋu. Nhaltjarra ŋunhi ŋayi miriŋuyunydja nhumalanha gaṯmaraŋalanydja?
15-16 Yo, ŋayi ŋunhi miriŋunydja marrtjina lili gaya'‐gayaw bitjarra, bala walala baḏuwaḏuyurrunana yana wäŋanydja nhumalaŋgu ga yolŋu'‐yulŋunha.
17-18 Nhumalaŋguway yana ŋunhiyinydja ŋurru; dhuwalayinydjayi mari nhumalaŋgu bunana, liŋgu nhuma gonha'yurruna ŋapa‐wekaŋala Garraywu nhokalaŋuwu Waŋarrwu. Ŋarranydja ŋunhi gäŋala marrtjina nhumalanha ḻatju'kuŋala dhika wal'ŋu, yurru nhumanydja gonha'yurruna warray ŋarranhanydja, bala marrtjina wiripuŋuwala warray yolŋu'‐yulŋuwala guŋga'yunarawu. Ŋuriŋi Yetjippuyŋuyunydja ga Yatjiriyawuyŋuyunydja yakana yurru nhumalanha guŋga'yun; yakana nhe yurru ŋayaŋu‐ḏaw'yun ŋuriŋiyinydjayi gapuyu ŋunhi walalaŋguŋunydja wekanhara.
19 Yo, dhiyaŋiyi nhokalanydja nhe yätjthu yurru nhumalanha dhä‐ḏir'yunna, raypirri'yunna yurru, märr nhe yurru marŋgiyirri ŋunhi nhuŋunydja dhukarr yätjnha yanana mirithirrina; yanana nhe yurru burakirrina yukurra galŋa‐yätjthirrina, ŋunhi nhe ŋuli ŋarranhanydja gonha'yun, ga yaka rom‐wiyaṉiyirri yurru ŋarraku ga dhäruk märrama ŋarranha, ŋunhi ŋarranydja yuwalkŋuna wal'ŋu ŋunhi Garraynha Godnha nhumalaŋgu. Dhuwalanydja dhäruk nherraṉara nininygarrmunarana yanana ŋarrakuŋu ŋurikiŋina Waŋarrwuŋu Garraywuŋu.”
20 Ga biyapul ŋayi Garray God waŋana bitjarra gam', “Yitjural, nhumanydja ŋunhi ŋuli yukurranha nhinanha ŋarrakala yana romŋura, bala nhumanydja waŋana bitjarra warray, ‘Yakana ŋanapurrunydja ḏukṯuk nhanŋu Garraywu, yakana ŋayi yurru ŋanapurruŋgu ŋurruŋu ga buŋgawa. Yaka ŋanapurru yurru dhäruk ŋanya märrama,’ bitjarra nhumanydja yukurrana waŋana, bala nhuma ḏiltjina‐wekaŋala ŋarrakunydja, ga buku‐ŋal'yurruna wiripuŋuwuna waŋarrwu.
21 Nhumanydja dhuwala balanyara bitjan dharpa ŋunhi ŋarrakuŋu ḻämu‐nherraṉara. Ŋarranydja ŋunhi dholkuŋala ḻatju' dhika ŋanya maŋutji, ga nhenydja bilyurruna ŋuliŋuruyi, bitjarrana nhenydja dhiyaŋunydja‐wala bitjan nhäŋiniŋ'nha nhe dharpa.
22 Yätjnha yanana nhenydja, moy'mirrina yana wal'ŋu wirrkina. Bäythi nhe ŋuli ŋunhi rurrwuyunmirri nhunapinyay nhe wirrkinydja wal'ŋu muḻmuḻ'yunydja, ga yakana nhe nhunapinyay nhe yurru ŋunhi ḏarrtjalkkunharamirrinydja; bitjan liŋgu ŋarranydja nhuna yukurra nhäma yätj yana, moy'mirri wal'ŋu mirithirri ŋuriŋi nhokalay yätjthu,” bitjarra ŋayi Garray waŋananydja.
23-24 “Yo, nhenydja ŋuli waŋa ḻakaranhamirri nhunapinyay nhe bitjanmirri, ‘Ŋarranydja dhuwala ḏarrtjalk warray, yaka ŋarra dhukun'mirri ga moy'mirri.’ Ŋunhiyinydjayi bothinyaramirrina nhe ŋuli bitjandhiyinydja dhäruk waŋa. Nhenydja dhuwala balanyara bitjan wuŋgan dhäyka nhäma marrtji ḻarruma ḏarramuwu wuŋgangu. Balanyarayi nhe yulŋunydja, djäl ḏumurru nhe wiripuŋuwu waŋarrwu; yakana nhuna yurru gulmarama ŋula yolthu yolŋuyunydja. Nhenydja ŋuli waṉḏirrina‐wala yana ŋurikalanydja ŋunhi ŋayi yurru wäthun nhuŋu ŋula yol birrka'mirri.
25 Nhätha nhe yurru ŋuliŋuruyi märr‐yawaryundja ḏaḏawyundja romŋuru, ga yakana biyapulnydja djäl‐ḏumurruyiya waŋarrwu wiripuŋuwunydja? Ga nhenydja ŋuli waŋa bitjan warray, ‘Gonha'yurra ŋarranha. Yaka nhe yurru ḻakarama ŋarrakunydja. Ŋarra yurru ŋarrakalay yana ŋarra djälyu marrtji, malthun yukurra yurru ŋurukuyinayi mulkuruwuna waŋarrwu, ŋurukuyina walalaŋgu ŋarra yukurra ḏukṯukthirrinydja.’ ”
26 Ga ŋayinydja Garraynydja waŋana bitjarra, “Yolŋunydja ŋuli gorana ŋunhi ŋuli ŋula yolthu nhämanydja ŋanya ŋula nhälili, maḻŋ'marama manaŋinyaralilinydja, ga bitjandhina yurru Yitjuralnydja miṯtji goramirriyirrina bukmakthirrina walala, buŋgawamirri ga dhika nhä ḏalkarra'mirri walala ga ŋurru'‐ŋurruŋu ŋaḻapaḻmirri, bukmaknha yolŋu walala yurru goramirriyirrina, liŋgu ŋuriŋiyina walalaŋgalay yätjthuna.
27 Yo, nhuma ŋuli waŋa bitjan, ‘Dhuwalanydja gay' dharpa ŋarraku bäpa'mirriŋu,’ ga waŋa nhe ŋuli munatha'nha ga guṉḏanhanydja bitjan, ‘Dhuwalanydja gay'ŋarraku ŋäṉḏi.’ Yo, waŋa nhe ŋuli bitjandhiyinydja, liŋgu nhe ḏiltjina ŋunhiyi wekaŋala ŋarrakunydja. Ga ŋunhi ŋuli nhuŋu marrtji marinydja buna, nhenydja ŋuli ŋarrakalana gawaw'yundja, ‘Garray, walŋakuŋa ŋarranha,’ bitjanna.
28 “Wanhaka ŋunhiyinydja nhumalaŋgu waŋarr malanha ŋunhi nhe walalanha djäma? Ŋuriŋi walalay guŋga'yundja yurru nhumalanha dhipalinydja. Walalana yurru marrtji ga walŋakuma nhumalanha ŋuliŋuruyi mariŋurunydja ga ŋula nhäŋuru rerriŋuru, liŋgu nhuma yukurra ŋayathama mirithirri guḻku' waŋarr malanha.
29 “Nhumanydja ŋuli waŋa ŋarranha bulnha guŋga'yunaramirri bitjanna ŋuli. Nhäku nhuma ŋuli morrumurru' bitjandhi ŋarranhanydja? . . . liŋgu bukmak nhuma ŋuyulkthina ga ŋapa‐wekaŋala ŋarrakunydja,” ga bitjarra ŋayi Garray waŋananydja.
30 “Ŋarranydja nhumalanha dhä‐ḏir'yurrunana yana raypirri'yurruna, yurru nhumanydja yaka warray gulyurruna ga ḏaḏawyurruna ŋuliŋuruyi yätjŋurunydja, mukthun yana nhe ŋunhilimi liŋgu nhina yukurra yätjŋura. Nhumapi ŋunhi bumara murrkay'kuŋala ŋarrakunydja djawarrkmirrinha walalanha, yaka nhuma ḏukṯuk ŋuriki dhäwu'wu ŋunhi walala ŋuli ḻakaranha.”
31 Yolŋu walala, ŋäka dhuwala dhäruk Garraynhanydja, ŋayi yukurra waŋa bitjan, “Nhäthinyara dhika ŋarranydja waŋarr? . . . balanyara bitjan baṉḏany wäŋa? . . . bay' bukumunha' wäŋa ŋunhi barrari‐wukunhamirri? . . . balanyarayi dhika ŋarra yulŋunydja? Nhäku ŋunhi nhe ŋuli waŋa bitjandja, ‘Ŋarranydja yurru marrtji ŋarrakalaynha ŋarra yana djälkurru wal'ŋu? Yakana ŋarranydja ḏukṯuk Godkunydja malthunarawu biyapulnydja.’
32 Nhäku nhe ŋuli buku‐meṉguma Godnhanydja bitjandhi? Yo, miyalkthu ŋuli yakana meṉguma nhanŋuway ḻatjuny'tja girri' mel‐wiḏiny'tja, yurru weyinŋumirri nhuma meṉguŋala ŋarranhanydja.
33 Yo, nhuma marŋgi muka ŋupanarawu waṉḏinyarawu wiripuŋuwunydja waŋarrwu, ŋurikinydja nhäku malaŋuwu ŋunhi nhe nhäku djäl‐ḏumurru mirithirri. Ŋunhanydja ŋunhi dhuwurr‐yätjmirrinydja yolŋu walala yurru marŋgiyirri nhumalaŋgalaŋuwuna.
34 Nhuma ŋuli buma wiripuŋunhanydja yolŋu'‐yulŋunha ŋunhi walala yakana ŋula nhä djäma yätjkuŋala, ga guḻaŋdja walalaŋgu dhuwali goŋŋura nhokalana mam'thun yukurra.
35 Yurru nhenydja ŋuli ḻakaranhamirri bitjanmirri warray, ‘Ŋarranydja dhuwala ḻatju' warray, manymak warray. Yaka ŋarranhanydja yurru Garrayyunydja dhä‐ḏir'yun,’ bitjan nhe ŋuli waŋa.” Ga ŋayinydja Garraynydja waŋa yukurra bitjan, “Yuwalk ŋarra yurru nhuna märr‐yuwalk yana dhä‐ḏir'yundja, liŋgu nhe yukurra ḻakaranhamirri nhunapinyay nhe bitjan, ‘Yaka ŋarranydja djäma yätj,’ bitjanmirri.
36 Yo, bitjan liŋgu nhuma ŋuli yukurra waṉḏirri guŋga'yunarawunydja ḻarruma wiripuŋulili ga wiripuŋulili ga wiripuŋulili bitjan. Ŋäthilinydja ŋunhinydja nhe bilyurruna Yatjiriyalili wäŋalili, yurru walalanydja nhumalanha ŋayaŋu‐yätjkuŋala warray, ga dhiyaŋunydja‐wala nhe guyaŋirri yukurra yanapi nhuma yurru märrama Yetjippuyŋuwuŋu guŋga'yunarawuy.
37 Nhuma yukurra märr‐nherraṉmirri märr‐yuwalkthirri ŋurikiyi Yetjippuyŋuwunydja walalaŋgu, yurru ganandja nhuma yurru ŋunhiyi wäŋanhanydja ŋayaŋu‐yätjthirrina ŋoy‐ganurumirriyuna. Liŋgu Garrayyunydja walalanha gumurr‐nherrarana; yakana nhuma yurru manymakkuma wal'ŋu nhina ŋuriŋi walalaŋgala guŋga'yunarayunydja.” Ga bitjarra ŋayi Garray waŋananydja.