2
Djatjuwayu djuy'yurruna mel'ŋunha maṉḏanha Djarikulili
2:1–24 (Joshua sent spies into Jericho)
1 Bala ŋayi ŋuliŋurunydja dhurrwaraŋuru Djatjuwayu djuy'yurruna märrma'nhana yolŋunha maṉḏanha mel'ŋunhanydja, bitjarrana ŋayi waŋananydja gam' maṉḏanha. “Gatjuy marrtjiya, buḏapthurrana dhiyaku mayaŋ'kunydja, ga nhäŋa marrtjiya ŋunhiyi wäŋa milthurra. Ga biyakayi maḻŋ'maraŋa wäŋanydja ŋunhiyi Djarikunydja yäku.” Bala maṉḏa yana marrtjinana dhunupana yulŋunydja.
Yo, marrtjinanydja maṉḏa ŋunhi Djarikulili, bala yana nhinananydja maṉḏa ŋunhiliyi waŋganygala miyalkkalanydja wäŋaŋura, yäkuwala Rayapkala, yurru dhäykanydja ŋunhi yaka yana ŋamakurru', balanyara ŋayi marramba'‐ḏumurru ŋunhiyi yulŋunydja.
2 Bala walalanydja gonha nhäŋala warray maṉḏanha, bala ḻakaraŋala buŋgawawana yolŋuwa bitjarrana, “Way yolŋu maṉḏa dhuwala bay', mel'ŋu maṉḏa marrtjina lili ŋulaŋuru Yitjuralwala malaŋuru.”
3 Bala ŋayi ŋuriŋi buŋgawayunydja djuy'yurruna dhäruknha djunama Rayapkalanydja bitjarra, “Gäŋa maṉḏanha lili ŋi', ŋunhiyinha mel'ŋunha maṉḏanha, ŋunhi maṉḏa yawungu gärri nhokala wäŋalili, liŋgu maṉḏanydja marrtji yawungu ŋunhi wäŋa milthun ŋilimurruŋgu.”
4 Yurru ŋayinydja ŋuriŋi dhäykayunydja maṉḏanha ŋäthili warray yana djuḻuḻ'maraŋala, bala ŋayi bitjarrana ḻakaraŋalanydja, “Ŋe, yuwalk warray maṉḏa yawungu bunanydja dhiyala ŋarraku, yurru ŋarranydja yaka marŋgi maṉḏaku, wanhaŋuwuy maṉḏa ŋunhi yolŋu maṉḏa.
5 Yurru ŋuriŋiyi bili waluyu maṉḏa ŋarraku wäŋanydja dhuwala gonha'yuna, marrtjinya bala dhawaṯthunanydja bathalakurruna dhurrwarakurru, yurruna dhuwala dhurrwaranydja dhaḻ'yuna. Yakana ŋarra marŋgi wanhawitjarrana dhika maṉḏa marrtjina. Gatjuy marrtjiyana walala, ḻundu‐ŋuparrana maṉḏanha, galki mulka nhuma yurru maṉḏanha dhuwala yana yulŋunydja.”
6 Bitjarrana ŋayi yukurrana ŋuriŋi miyalkthunydja ḻakaraŋala walalaŋgu, yurru ŋunhiyi ḏarramunydja maṉḏanha ŋunhi bäyma nhanukalay wäŋaŋura ŋurikala miyalkkala, yurru ŋunha garrwar wal'ŋu bala'ŋura maṉḏa yukurrana ŋorrananydja, djuḻuḻ'maranhara nhanukuŋu ga ŋäkirrmaranharanydja mulmuwuy.
7 Yo, ŋäkulanydja walala ŋunhi dhäruktja ŋanya ŋunhiyi miyalknha, bala yana gundupuŋalana, ḻundu‐ŋuparana ŋunhiyi mel'ŋunhanydja maṉḏanha, gatjpu'yurrunana bala walala gundupuŋalanydja maḻŋ'maranharawuna maṉḏaku.
8 Yo, ŋorranha warray maṉḏa bini yulŋunydja ŋunhiliyi garrwarnydja, yurru ŋayinydja maṉḏanha ŋuriŋi miyalkthunydja marrtjina, ga waŋana bitjarra warray,
9 “Marŋgi ŋarranydja dhuwala ŋunhi dhuwalanydja wäŋa Garrayyu wekaŋala nhumalaŋguway yana. Bukmak dhuwala yolŋunydja walala dhiyalami barrarirrina yukurra nhumalaŋgu.
10 Bukmakthu ŋanapurru ŋäkulanydja, ŋunhi nhumalaŋgala waŋarryunydja Godthunydja nhumalanha walŋakuŋala warray, dhawaṯmaraŋala nhumalanha beŋuru ŋunhi Yetjipŋurunydja, ga dhukarr warray ŋayi baṉḏany'kuŋala nhumalaŋgu buḏapthunarawu marrtjinyarawu gapukurru, ga biyapul ŋayi nhumalanha guŋga'yurrunanydja ganydjarr‐wekaŋalanydja, bala nhuma djuḻkmaraŋalana wiripu‐guḻku'nhanydja malanha ŋunhi walala ŋuli yukurranha nhinanha ŋunhala bala ḻaypa, wiripuŋura gali'ŋura mayaŋ'ŋura.
11 Liŋguna ŋanapurru ŋäkulanydja yukurrana, bala ŋanapurru dhuwala wirrkina barrarinanydja wal'ŋu, liŋgu nhumalaŋgunydja Waŋarr ŋunhi biyapul warray wal'ŋu, ŋayinydja ŋunhi God ŋuruku djiwarr'wu ga dhiyaku munatha'wu.
12-13 Ŋanapurrunydja dhuwala marŋgina ŋunhi nhumana yurru djuḻkthun dhiyakuyinydja wäŋawu wal'ŋu, ga ŋarranydja djäl nhumalaŋgu, nhuma yurru walŋakuma ŋanapurrunha, ŋarranha ga ŋarraku bäpa'mirriŋunha ga ŋäṉḏi'mirriŋunha ga djamarrkuḻi'nha. Waŋiya maṉḏa ŋarranha dhawu'mirriyaŋa yulŋunydja ŋi', ŋunhi nhuma boŋguŋu ŋanapurrunha yaka buŋunydja, ŋunhi nhuma boŋguŋu lili marrtji baḏuwaḏuyunarawu dhiyakuyi wäŋawu.” Bitjarra ŋayi ŋunhi miyalktja waŋana.
14 Ga maṉḏanydja ŋunhi mel'ŋunydja bitjarra nhanŋu waŋana, “Yaka ḻakaraŋanydja dhiyakuyyi ŋula yolkalanydja walalaŋgala ŋi'. Ŋilinyu boŋguŋu nhumalanha walŋakuŋu, ŋunhi boŋguŋu ŋanapurru Yitjuralpuyŋuyunydja miṯtjiyu marrtji baymatthurru warrpam'thurruna buwayakkuŋuna dhuwalanydja wäŋa, ŋunhi ŋayi boŋguŋu Garrayyu wekaŋu dhuwalayi wäŋa goŋlili ŋanapurruŋgalaynha wal'ŋu.”
15 Yo. Ŋurikiyinydja miyalkkunydja wäŋa galki ḻoḻuŋura wal'ŋu gunganhamirriŋurana, yurru garrwarnha wal'ŋu, bala ŋayi ŋuriŋi miyalkthunydja maṉḏanha ŋunhi mel'ŋunhanydja maṉḏanha dhuryunmaraŋala raki'yuna marrtjina bala, yana liŋgu ga ŋunha gali' warraŋul mulkana wäŋa Djariku.
16 Bala ŋayi waŋana maṉḏanha bitjarra, “Gatjuy marrtjiyana maṉḏa bala, ga djuḻuḻ'yurra bukulili, ga galkurranydja märr‐weyin nhiniyanydja ŋunhili, yana liŋgu‐u‐u, ga ŋunhi walala yurru roŋiyirrina ḻarrunharapuyŋu lili wäŋalilina, bala nhumanydja yurru marrtjina‐wala.”
17-18 Bala maṉḏa ŋunhi mel'ŋunydja maṉḏa waŋana bitjarrana ŋurikala miyalkkalanydja, “Ŋunhi ŋanapurru boŋguŋu marrtjinydja lili dhipala bunharawunydja, ga nhenydja boŋguŋu ḏapmaraŋu raki'yu miny'tjiyunydja miku'yu dhipala gay' windalili, märr boŋguŋu ŋanapurru nhäŋu. Ga märraŋunydja nhe boŋguŋu, ḻuŋ'maraŋunydja gurruṯu'mirrinha warrpam' yana nhuŋuway nhe dhipalayi nhokalay buṉbulilinydja, märr ŋilinyu boŋguŋu nhumalanha walŋakuŋu.
19-20 Ŋunhina liŋgu walala boŋguŋu yolŋu'‐yulŋu walŋathinydja, ŋunhi walala boŋguŋu nhini'‐nhini yukirri dhiyali raki'‐miku'mirriŋura buṉbuŋura.”
21 “Yo, ŋamakurru' dhuwalinydja,” bitjarrana ŋayi miyalktja, bala dhunupana maṉḏanydja marrtjinana yana. Ga dhunupana ŋayi ŋuriŋi miyalkthunydja märraŋala miku'na raki' miny'tji, bala ŋal'‐maraŋala windalili ḏapmaraŋala.
22 Yo, bala maṉḏa mel'ŋunydja maṉḏa waṉḏinana nhinana bala‐a‐a, djuḻuḻ'‐way bukulilina, ga nhinananydja maṉḏa ŋunhiliyi ḻurrkun' walu galkurruna. Walalanydja yukurrana ŋunhi djämamirrina buŋgawawunydja ḻarruŋalana‐a‐a, ga bäyŋuna maḻŋ'maraŋala, bala roŋi'‐ruŋiyina balayi Djarikuliliyi.
23 Bala yana maṉḏa mel'ŋunydja maṉḏa buḏapthurrunana mayaŋ'kuna, bala djar'tjaryurruna Djatjuwawalana, bala bitjarrana ḻakaraŋala,
24 “Way, yuwalk dhuwala yulŋunydja, ŋayi Garrayyunydja wekaŋala bukmaknha yana wäŋanydja ŋilimurruŋgalana goŋlili, liŋgu yulŋunydja walala yukurra ŋunha barrarirrina nhina ŋilimurrumbala, bukmakthirrina yana.”