24
Ma' djarr'yurrana, yol yurru nhuŋunydja waŋarr dhika
24:1–28 (Choose today who will be your God)
1 Bala ŋayi Djatjuwayu buku‐ḻuŋ'maraŋalana yolŋu'‐yulŋunha ŋunhi Yitjuralpuyŋunhanydja bukmakkuŋala yana, walala marrtjina yurrum'thurruna waŋgany‐manapanminanydja gumurrŋura Garraywalana, ŋurru'‐ŋurruŋu gal'ŋu ŋunhi yolŋu walala ga wiripu‐guḻku' yolŋu'‐yulŋu.
2 Bala Djatjuwanydja gaŋgathina, bala waŋana bitjarrana gam'. “Dhuwalanydja gay' dhäruk ŋulaŋuru Garraywuŋu, Yitjuralpuyŋuwalaŋuwuŋu ŋunhi Godkuŋu, dhuwala ŋunhi ŋayi Garray waŋanydja yukurra nhumalaŋgu dhäruktja gam'. Baman'tja benydja wal'ŋu nhumalaŋgu märi'mu walala nhinana yukurrana be‐wala barrku wäŋaŋura, Yipurayimgu ŋunhi bäpa'mirriŋu yäku Dera ga nhanŋu gurruṯu'mirri walala, ga buku‐ŋal'yunanydja walala ŋuli yukurranha wiripuŋuwu waŋarrwunydja.
3 Bala ŋarra ŋunhi märraŋalana nhumalaŋgu märi'munhanydja Yipurayimnhanydja, dhawaṯmaraŋalana ŋarra märraŋalana ŋuliŋuruyi wäŋaŋurunydja, bala ŋarra ŋanya gäŋalanydja dhipalana wäŋalili Gaynanlilina. Gäŋalanydja ŋarra marrtjina ŋanya balakurruyina wäŋakurrunydja, ga miṯtjinydja nhanŋu mirithinana gaŋdhurruna gal'ŋu.
4 Yo, ŋäthilinydja ŋarra Yipurayimgunydja ŋunhi wekaŋala gäthu'mirriŋunha Yitjaknha, ga nhanŋu Yitjakkunydja ŋarra wekaŋala gäthu'mirriŋunha märrma'nhana, Djaykupnhana ga Yetjunhana. Wekaŋala ŋarra ŋunhi buku'‐wukunydja wäŋa nhanŋu Yetjuwu, ga ŋayinydja Djaykuptja ga nhanŋu djamarrkuḻiny'tja marrtjina balayi Yetjiplili wäŋalili.
5 Ga biyapul ŋarra yänguŋala Mawtjitjnhana ga Yärunnhana walalaŋgunydja, ga bitjarra ŋarra yukurrana ŋoy‐wurakina ŋurikala Yetjippuyŋuwalanydja yolŋu'‐yulŋuwala, yurru nhumalanhanydja ŋarra dhawaṯmaraŋala warray ŋuliŋuruyi, walŋakuŋala warray.
6-7 Yo, ŋarra nhumalaŋgu bäpa'mirriŋunhanydja walalanha dhawaṯmaraŋalana beŋuru Yetjipŋurunydja, bala walala marrtjinana yukurrana, yana liŋgu‐u‐u ga bunana walala Miku'ŋurana Gapuŋuranydja. Walalanydja yukurrana ŋuriŋi miriŋuyunydja ŋuparana walalanha bena dhikana miṯtjiyu gal'ŋu, yarraman'mirriyuna nhäyuna ŋupara walalanha, bala nhumalaŋgala ŋuriŋi bäpa'mirriŋuyunydja walalay märrliliyaŋala gawaw'yurruna ŋarrakuna guŋga'yunarawunydja, bala ŋarra ŋunhi maŋutji‐ŋäkirrmaraŋalanydja miriŋunhanydja walalanha warumukthuna maŋandhunydja. Ŋarra ḻapmaraŋalana ŋunhi gapunydja dhukarrkuŋalana, bala nhumanydja marrtjina buḏapthurrunana yukurrana baṉḏany'kurruna wäŋakurru yanana, yurru gapuyunydja ŋuriŋiyi walalanhana dhä‐monyguŋala, bala walala murrmurryurrunana warrpam'nha. Nhuma marŋgi muka yulŋunydja ŋunhi ŋarra walŋakuŋala nhumalanha beŋuruyi miriŋuwala goŋŋuru.
8 “Yo, ŋunhilinydja nhuma yukurrana nhinana ŋanhdharkŋuranydja wäŋaŋura märr‐weyinnha, bala ŋarra nhumalanha gäŋalana yana galkikuŋalana dhipalayinayi wäŋalili, yurru yolŋu'‐yulŋu yukurrana nhinana ŋunhiliyi wäŋaŋura wuṉḏaŋarrmirrina dhika wal'ŋu. Walala ŋunhi guyaŋina yanapi walala yurru nhumalanha baḏuwaḏuyun warrpam'thun, yurru ŋarranydja wekaŋala walalanha nhumalaŋgala warray goŋlili, bala nhumana märraŋala wäŋanydja walalaŋgu. Liŋgu nhuma nhäŋalana ŋunhi yulŋunydja, ŋunhi ŋarra walalanha baḏuwaḏuyurruna warrpam'thurruna nhumalaŋgala milma.
9 Ga wiripunydja buŋgawa ŋurruŋu waŋana Baylamgala bitjarra, ‘Waŋiya buku‐wuykthurrana ŋunhi Yitjuralpuyŋunhanydja,’ bitjarra.
10 Yurru yaka warray ŋayinydja bitjarrayi, yana ŋayi waŋananydja goŋmirri warray dhika wal'ŋu dhäruk nhumalaŋgalaŋuwuy, bala ŋarra nhumalanha dhawaṯmaraŋalana yana beŋuruyinydja buŋgawawalanydja goŋŋuru.
11 “Dhäŋuru ŋuliŋuruyinydjayi nhuma buḏapthurrunana yukurrana ŋurikiyi Djodanbuyŋunydja mayaŋ'ku, bala dhipalayina gali'lili wäŋalili gulŋiyina. Yolŋu'‐yulŋu ŋunhi Djarikupuyŋunydja, ga bukmak yolŋu walala ŋunhi walala yukurrana nhinana dhiyalayi wäŋaŋura, walalanydja yukurrana ŋuyulkthina nhumalaŋgu wirrki yana, walala bini nhumalanha dhawar'maranha muka bunhanydja warrpam'thunna, yurru ŋarrakalanydja ganydjarryu nhuma warray walalanha warray dhawar'maraŋalanydja, warrpam'thurruna warray.
12-13 Yaka ŋunhi nhumapinydja nhumalaŋgalaynydja ganydjarryu walalanha djuḻkthunmaraŋala, liŋgu ŋarrana walalanha ŋunhi beyaṉu‐wukuŋalanydja ŋunhi nhuma marrtjina galkithina, bala walala gundupuŋalana bena‐wala. Yaka ŋunhi nhuma walalanha bumara garayunydja dhika nhäyunydja mandjawakthunydja. Ŋarrapi yana waŋganydhu wekaŋalanydja dhuwalayi nhumalaŋgala goŋlilinydja wäŋanydja, ga dhiyaŋunydja‐wala nhuma yukurra nhina buṉbuŋura malaŋumi wiripu‐guḻku'wuŋuna dhuḻ'yunara, ga ḻuka nhuma yukurra ŋathanydja dholkunhara wiripu‐guḻku'wuŋuna. Ga bitjarrayina ŋayi yukurrana Garraynydja waŋana.”
14 Bala ŋayi Djatjuwanydja mukthurruna yana waŋana yukurrana walalanha bitjarra gam'. “Ga dhiyakuyina märrwu nhuma yurru borrk‐beyaṉiyirrina yukurra Garraywunydja, ga djäma yurru yukurra nhanŋuwaynha wal'ŋu yana yuwalkkumana. Gatjuy ḏupthurrana walala ŋunhiyinydja malanha nhumalaŋguway be nhänydja waŋarrnha malaŋunha, maḏayin'tja dhika nhänydja, ŋunhi nhumalaŋgu yukurrana märi'mu walala buku‐ŋal'yurruna ŋunhala barrku. Biyaka ḏupthurrana, gonha'yurrana warrpam'thurrana, ga buku‐ŋal'yurranydja waŋganyguna, nhanŋuwaynha Garraywuna yana.
15 “Bay', yolku dhika nhe yurru märr‐ŋal'yundja yukurra? Dhiyaŋunydja‐wala nhumapi yurru djarr'yurra. Yol dhika nhumalaŋgu waŋarrnydja? . . . Ŋunhiyi waŋarr malanha ŋunhi nhumalaŋgu bäpa'mirriŋu walala ŋuli yukurranha buku‐ŋal'yuna? . . . ŋunhiyi? Yolku dhika nhe yurru buku‐ŋal'yundja? Ŋurikalaŋuwu walalaŋgalaŋuwu waŋarrwu? . . . ŋunhi walala yukurra nhina dhiyala wäŋaŋura? Yol yurru nhuŋunydja waŋarr? Yolku dhika nhenydja yurru malthun yukurra? Ma' nhepi djarr'yurranydja ga ḻiya‐ŋamaŋamayunmiyanydja. Yo, ŋarrapinydja yurru ga ŋarraku gurruṯu'mirri walala, ŋanapurrunydja yurru buku‐ŋal'yun yukurra waŋganygu yana waŋarrwu Godku, ŋayipi yana waŋgany yurru ŋanapurruŋgunydja Garray God.” Bitjarra ŋayi Djatjuwa waŋana ḻakaranhaminanydja.
16 Ga walala ŋunhi yolŋu'‐yulŋunydja buku‐wakmaraŋala waŋana Djatjuwawala bitjarra, “Ŋanapurrunydja yurru yaka ganan Garraynha, ga buku‐ŋal'yun wiripuŋuwunydja waŋarrwu yakana.
17 Ŋäthilinydja ŋunhinydja ŋanapurru yukurrana nhinana garrpiṉarawuyŋura romŋura, ga ŋayipi yana ŋunhi Godthu Garrayyu walŋakuŋalanydja dhawaṯmaraŋalanydja ŋanapurrunha beŋuruyi miriŋuwalanydja goŋŋuru. Ŋanapurru nhäŋala ŋanya ŋunhi ŋarambiyany'tja, ŋunhi ŋayi djäma yukurrana milma ŋanapurruŋgala ganydjarr‐ḏumurru wal'ŋu dhika rom malanha. Gäŋala ŋayi yukurrana gurrum'thurruna ŋanapurrunha, walŋakuŋala beŋuru liŋgu ga dhipala wapthurruna.
18 Ŋayi gukuŋala miriŋunhanydja warrpam'thurruna ŋunhi yukurrana nhinana dhiyala wäŋaŋura, bitjarrana walala yukurrana gundupuŋalana ŋanapurruŋgalanydja, ŋunhi ŋanapurru marrtjina galkithina. Waŋganyguna yana nhanŋuwaynha ŋanapurru yurru buku‐ŋal'yundja yukurra Garraywuna, liŋgu ŋayipina waŋganynha ŋanapurruŋgunydja God.” Bitjarrayi walala yukurrana ŋunhi yolŋu'‐yulŋunydja waŋanhamina.
19 Bala ŋayi Djatjuwayunydja waŋana walalanha bitjarrana, “Yakana nhuma yurru märr‐ŋal'yun ŋamathamanydja ga yuwalktja gal'ŋu nhanŋu Godku. Godtja dhuwala gäna gal'ŋu ḏarrtjalk, ganaŋ'thun yukurra dhiyakuywala munatha'wuywalanydja nhäkala malaŋuwala. Ŋunhi nhuma yurru rrambaŋikumanydja märr‐ŋal'yun nhanukala Godkala ga wiripuŋuwala waŋarrwala, waŋgany‐manapanmirrinydja yurru, ŋayinydja yurru Godtja ŋaramurryirrina yana nhumalaŋgunydja; yakana ŋayi yurru bäy‐ḻakaramanydja nhumalaŋgu balanyarawuynydjayi yätjpuy.
20 Ŋuli nhuma yurru bilyun ga meṉgumanydja Godnha, ḏiltjinydja wekama ḻayḻayyun ŋula nhäŋuranydja waŋarrŋura malaŋumi, ŋayi yurru Godtja bilyundhi, ŋapana yurru wekama nhuŋunydja, yana ŋayi yurru baḏuwaḏuyunna nhuna, bäyyi ŋunhi ŋäthili ŋayi nhumalanha goŋmirriyaŋala.”
21 Ga walalanydja ŋunhi yolŋu'‐yulŋunydja waŋana Djatjuwawalanydja bitjarrana, “Yaka ŋanapurru yurru yukurra dhuwala ŋayathama baṯ bitjan wiripuŋunhanydja ŋula waŋarrnha. Yuwalk yana ŋanapurru yurru dhuwala märr‐ŋal'yun nhanŋuway yana Godku waŋarrwu, yuwalkkuma gal'ŋu yana buku‐ŋal'yun nhanŋuway yurru.”
22 Bala ŋayi Djatjuwanydja waŋana bitjarrana ŋuriki yolŋu'‐yulŋuwunydja, “Yo, liŋguna nhuma dhuwali ŋänharaminana nhumalanhay nhuma bala‐lili'yunminana, ŋunhi nhuma dhawu'‐nherrara yoranhamina bitjarrayi, ‘Ŋanapurrunydja djarr'yurruna waŋganynha ŋanyapinyay Garraynhana, ŋayi yurru ŋanapurruŋgunydja Waŋarr God. Nhanŋuway yana waŋganygu ŋanapurru yurru yukurra buku‐ŋal'yundja.’ Bitjarra nhuma yukurrana waŋananydja.”
Ga walalanydja waŋana ŋunhi yolŋu'‐yulŋunydja bitjarra, “Yuwalk dhuwalanydja ŋanapurru waŋana dhawu'‐nherrara bitjarrayinydja, ga dhawuny'tja yurru dhuwalayinydjayi djingaryunna yukurra yanana djambimiriwnha nhämiriwnha.”
23 Bala ŋayi Djatjuwanydja waŋana bitjarra, “Yo manymak. Yurru wiripu‐guḻku'yunydja nhuma yukurra baḏak yana ŋayathama maḏayin' malanha, waŋarr malanha. Biyakana warrkuḻuŋuna dhuwaliyinydjayi nhä malanha, warrpam'thurrana baḏuwaḏuyurra, bala wekanhamiya warrpam'thurrana ŋayaŋunydja nhumalaŋguway nhuma Garraywalana, märr nhumanydja yurru nhanŋuwaynha yana walala dhulŋuŋuna.”
24 Bala walala ŋunhi bukmaktja yolŋu walala waŋana Djatjuwawalanydja bitjarrana, “Ŋanapurrunydja yurru dhuwala buku‐ŋal'yun nhanŋuwaynha yana Godkuna waŋganyguna, liŋgu ŋayipina waŋganynha waŋarr ŋunhi ŋanapurruŋgunydja. Ŋanapurru yurru mäkiri'‐witjun ga ŋäma ŋanyapinyay yana dhäruktja, bala djämana; dhäruktja ŋanya yurru märramana yana.”
25 Bala ŋulinyaramirriyunydjayi walala dhawu'na yana nherrara Garraywalanydja, bala ŋayi Djatjuwayu ḻakaraŋala romnha malanha Godku ŋuriki yolŋu'‐yulŋuwunydja, märr yurru walala yuwalkkuma gal'ŋu yana malthundja marrtji nhanŋuway Garraywu yana.
26 Ga biyapul ŋayi wukirrina marrtjina ŋunhiyinydjayi dhawuny'tja, dhäruktja walalanha djorra'lilina. Bala ŋayi märraŋala bathalana ŋanyana guṉḏa, bala nherrara ŋaṉḏarr'maraŋalana ŋunhiwala Garraywalana wäŋalili.
27 Bala ŋayi waŋana yolŋu'‐yulŋuwalanydja bitjarrana, “Dhiyaŋunydja gay' guṉḏayu liŋgu ŋäkulana nhumalanha dhäruktja, ŋunhi nhuma dhawu'‐nherraranydja waŋananydja gäthura, ga djingaryunna yana ŋayi yukurra yurru dhuwala mukthunna yulŋunydja, ga bitjanna liŋguna yurru dhiyaŋuyi nhumalanha guyaŋinyamirriyamanydja yukurra, märr yurru nhuma yakana bilyundja ŋapanydja‐wekama Garraywu.”
28 Bala ŋayi ŋuliŋuruyinydja dhurrwaraŋuru Djatjuwayu djuy'yurrunana yukurrana yolŋu'‐yulŋunhanydja wäŋalilina walalaŋgalay walala.
Djatjuwa rakunydhinana
24:29–33 (Joshua died)
29-30 Bala ŋuliŋuruyi dhäŋuru ŋayi Garraywunydja djämamirri yolŋu ŋunhi Djatjuwanydja rakunydhinana, ga dhuŋgarranydja ŋayi ŋunhi 110‐nha; ga dhalkaraŋalanydja walala ŋanya ŋunhimalayi nhanukiyingalaynha ŋayi wäŋalili.
31 Yo, ŋunhi ŋayi Djatjuwa yukurrana walŋaŋga yana nhinana, ga yolŋu'‐yulŋu ŋunhi Yitjuralpuyŋunydja yukurranha ŋuli malthuna nhanŋuwayŋga yana Garraywuŋga, ga ŋuliŋurunydja dhurrwaraŋuru ŋunhi ŋayi Djatjuwa rakunydhinana, mukthurrunaŋga yana walala buku‐ŋal'yurruna yukurrana Garraywu, liŋgu ŋurru'‐ŋurruŋu walalaŋgu ŋunhi yolŋu'‐yulŋu mel‐marŋgimirri ŋurikiyi ŋunhi nhaltjarra ŋayi Godthu yukurrana gäŋala walalanha manymakkuŋala.
32 Yo, ŋunhi walala dhawaṯthurrunanydja ŋulaŋuru Yetjipŋurunydja ŋäthili, walalanydja ŋuriŋi Yitjuralpuyŋuyunydja yolŋu'‐yulŋuyu djaw'yurrunana ŋanya ŋarakanydja lili Djotjipnha, bala dholkuŋalanydja ŋanya walala ŋunhi Djikamlilina wäŋalili yäkulili.
33 Ga bitjarrayi liŋgu ŋayinydja ŋunhi ŋurruŋunydja ḏalkarra'mirri yolŋu rakunydhina, yäku Layatjanydja, ga dholkuŋalanydja walala ŋanya buku'‐wukulilina wäŋalilinydja.