18
Yelatja ga djawarrkmirri walala Bälwu waŋarrwu
18:1–2, 17–40 (Elijah and the prophets of Baal)
1 Ŋe‐e, marrtjinana yukurrana yana walunydja, ga yaka yana waltjaṉ bunana, yana liŋgu ga ḻurrkun' dhuŋgarranydja ŋupara, ga warrpam'nha wäŋanydja ganbarkthinana. Ga ŋuliŋurunydja dhäŋuru ŋayi Garray waŋana Yelatjawala, waŋana djuy'yurruna ŋanya, “Gatjuy marrtjiya bala Giŋ Wayapkala, ga ŋarranydja yurru djuy'yun waltjaṉnha.”
2 Bala yana ŋayi Yelatjanydja marrtjinana. Marrtjinana nhinana bala ŋayi‐i‐i, yana liŋgu‐u‐u, ga bunana ŋunhala Wayappanydja.
17 Ga ŋunhi ŋayi nhäŋalanydja ŋanya, dhunupa ŋayinydja Wayapthunydja waŋanana, “Dhuwalana nhe yulŋunydja. Nhenydja dhuwalanydja mari‐djämamirrina,” bitjarra.
18 Ga ŋayi Yelatjanydja waŋana bitjarra, “Ŋarranydja dhuwala yaka mari‐djämamirri; nhe dhuwala ga nhipala gurruṯu'mirri mari‐djämamirrinydja walala, liŋgu nhe yaka malthurruna Garraywalaŋuwu dhärukku, ga buku‐ŋal'yurruna nhe yukurrana goŋbuywu waŋarrwu Bälwu.
19 Gäthuranydja ḻakaraŋa marrtjiya yolŋu'‐yulŋuwa bukmakpa dhiyapa Yitjuralpuyŋuwa, ga ŋunhalana nhuma yurru buniyanydja ŋarraku bukuŋurana ŋunha Gämulnha wäŋaŋura. Ga gäŋanydja walala bukmaknha yana ŋunhiyi Bälwunydja dhäwu'‐gänharamirrinha walalanha, ga bukmaknha yana ŋuriki miyalkkunydja waŋarrwu dhäwu'‐gänharamirrinha walalanha, bukmak yana ŋunhinha walalanha ŋunhi walala yukurra djäma Djitjapilwu, nhokalaŋuwu miyalkku.” Ga bitjarranydja yukurrana ŋayi Yelatjayu waŋana ḻakaraŋala nhanbala Giŋ Wayappa.
20 Yuwalkthi ŋayi Giŋ Wayapthunydja yurrum'maraŋalana marrtjina yolŋu'‐yulŋunhanydja ŋunhi miṯtjinhanydja Yitjuralpuyŋunhanydja, ga dhäwu'‐gänharamirrinha walalanha Bälwu, ga bukmaknha yana walala marrtjinanydja bala ḏuwaṯthurrunanydja ŋunha Gämullilinydja wäŋalili yäkulili.
21 Ga ŋayipi Yelatjanydja ḏuwaṯthurrunana marrtjinana, ga waŋanana bitjarrana ŋurikala bukmakkalana yolŋuwala, “Nhämunha'mirri nhuma yurru yukurra galkundja? Nhätha nhuma yurru djarr'yun nhumalaŋguway waŋarrnhanydja? Ŋuli Garraynydja yuwalkŋunydja Waŋarr wal'ŋu, ma' buku‐ŋal'yurrana walala nhanŋuna. Ŋuli Bälnydja waŋarr yuwalkŋu wal'ŋu, ga nhanŋuna buku‐ŋal'yurra.” Yurru ŋunhi yolŋu'‐yulŋunydja yakana dhäruk ŋula waŋana waŋgany.
22 Bala ŋayi Yelatjanydja waŋanana, “Ŋurikinydja nhanŋunydja Bälwunydja waŋarrwu guḻku' warray dhäwu'‐gänharamirri walala, yurru ŋarranydja dhuwalanydja ŋarrapi waŋgany warray nhanŋunydja Garraywunydja dhäwu'‐gänharamirri.
23 Bitjan dhuwala ŋilimurru yurru yulŋunydja gam'. Dhiyaŋinydja dhäwu'‐gänharamirriyu walalay yurru ŋal'‐ŋalmarama yindimirri ŋanya guṉḏa barŋ, ga ŋal'marama yurru wäyin buliki', ga ŋarranydja yurru bitjandhi bili djäma, yurru yaka ŋilimurru yurru dhuŋgur'yun ŋäṉarryu gurthayunydja.
24 Ŋilimurrunydja yurru yukurra ŋäŋ'thun waŋarrnha ŋilimurruŋguway; nhumanydja yurru bukumirriyama yukurra Bälnhanydja. Ŋuli ŋayi be waŋarr maykarraṉ'tja, bala ŋayi yurru djuy'yun ŋäṉarr gurthanydja, ga ŋunhiyinydja bitjan ŋayi yuwalk waŋarr. Ga ŋarra yurru bukumirriyama Garraynha, ga ŋuli ŋayi yurru djuy'yun gurtha ŋäṉarr, ga ŋunhiyinydjayi yuwalk ŋayinydja God.”
Ga ŋunhi yolŋunydja walala waŋana, “Yo, yo, yo, manymaknha dhuwalanydja.”
25-26 Yuwalkthi walalanydja ŋunhi dhäwu'‐gänharamirri walala Bälwunydja gaŋgathinana, djämana marrtjina, ŋal'‐ŋalmaraŋalana, ga bitjarra yana liŋgu ŋayinydja Yelatjayunydja ŋal'‐ŋalmaraŋala marrtjina barŋ yindimirri guṉḏa, ga wäyin buliki' ŋal'maraŋalayi ŋunhimala barŋlili. Yurruna ŋayi Yelatja waŋananydja, “Ma', nhuma walala ŋäthilinydja waŋiya ŋäŋ'thurra nhumalaŋguway waŋarrnha, märr ŋayi yurru djuy'yun gurtha nhumalaŋgu.” Bilina, walalanydja ŋurru‐yirr'yurrunana ŋäŋ'thurrunana, yänana liŋgu‐u‐u, yänana liŋguna‐a‐a ga‐ga‐ga‐ga‐ga‐a‐a, buku‐ḻarrŋgaythina walu. Yo, yatjunminana walala yukurrana yiŋgathinana bitjarra, “Bäl gay, buku‐ruŋiyinmaraŋana ŋanapurruŋgu. Djuy'yurra ŋanapurruŋgu gurtha go.” Mukthurrunaŋga yana giritjinaŋga, ḻiw'maraŋalaŋga dharrana ŋuliwitjarra, yurru bäyŋuna ŋula nhä buku‐ruŋiyinmaraŋalanydja, yana liŋgu‐u‐u ga walu dhika ḻiyalilina.
27 Bala ŋayinydja ŋurru‐yirr'yurrunana Yelatjayunydja warku'yurrunana walalanha, waŋanana ŋayi bitjarrana, “Wirrki walala ma'. Bukumirriyaŋa! Ŋayinydja ŋunhi waŋarr, mak ŋayi yukurra ŋunha bukaway'yirri! Mak ŋayi be bala marrtjina. Mak ŋayi yukurra ŋunha yakurr ŋorra! Wirrki walala yiŋgathiya, ga dhirr'yurrana ŋanya!”
28 Bala ŋunhi dhäwu'‐gänharamirrinydja walala bena dhika yiŋgathina dhä‐rur'thurrunana, mitmitthunminana gay walalanhawuy walala rumbalnha, ga gulaŋ‐waṉḏi'‐waṉḏina dhika bena bukunydja gulaŋnha.
29 Ga mukthurrunaŋga yana walala, nyä'yunmina yukurrana, yana liŋgu ga wirr', bäyŋuna buku‐ruŋiyinmaraŋala ŋula nhä maḻŋ'thurruna ŋäkulanydja rirrakaynydja nyä'yunminyaranydja.
30-31 Bala ŋayi Yelatjanydja waŋana bitjarrana, “Dhuwalana liŋguna, bilina ma'! Ḏaḏawyurrana walala, ga go lilina marrtjiya galkithiyana ŋarrakalana giṯthurra.” Bala ŋayi biyapul ŋal'‐ŋalmaraŋala ŋama'‐ŋamathaŋala ŋunhiyi barŋ ŋunhi walala ŋäthili ḏaw'‐ḏawyurruna; märraŋalanydja ŋayi 12 guṉḏa malanha, liŋgu walalawuy ŋunhi mala ŋulaŋuru Djaykupkala yarraṯaŋuru 12 bäpurru' malanha. Bala ŋayi dharpa garrwarlilinydja ŋal'‐ŋalmaraŋala, ga yurruna ŋapalili ŋal'maraŋala wäyindja ŋanaktja,
32 ga ḻiw'maraŋalanydja ŋayi marrtjina bala belaŋalanydja ḻukunydja ŋarŋgana.
33-35 Bala ŋayi waŋana ŋurikala yolŋu'‐yulŋuwala, “Ma' gapu dhiṯ‐dhiṯthurra walala, wakinmirriyu yana rupayunydja, 12‐thu miṯtjiyu rupayu.” Bala walala gäŋalana ŋunhi gapunydja malanha, bala yana ŋayi yurr'yurrunana marrtjina guryunmaraŋalana ŋunhi gapunydja, yulukkuŋala ŋunhi barŋnha bukmakkuŋala yana, yana liŋgu ga ŋarŋga ŋunhi dhaŋaŋdhina gapuyuna, ga dharpanydja ŋunhi gurthanydja ga wäyindja warrpam'nha yana yulukthinana.
36 Bala Yelatja bukukurru waŋanana, ŋäŋ'thurrunana Godnhana yukurrana, “Garray nhenydja dhuwala Yipurayimgu waŋarr, ga Yitjakku ga Djaykupku. Maḻŋ'maranhamiya dhiyakala walalaŋgala Yitjuralpuyŋuwala, märr yurru walala marŋgithirrina nhuŋu, ŋunhi nhepi dhuwala yuwalktja wal'ŋu Waŋarr, ga ŋarranydja nhuŋu djämamirri.
37 Ŋäka ŋarranha Waŋarr God, märr yurru dhuwalanydja yolŋu walala roŋiyirrina liliyi nhokala.”
38 Dhunupa ŋayi Godthunydja djuy'yurruna gurthana ŋulaŋuru djiwarr'ŋuruna, nhäranana ŋunhi wäyindja, dharpanydja ŋunhi gurtha ŋultjiŋunydja nhäranana ga guṉḏa, ga gapunydja ŋunhi nhäranayi.
39 Yurru walala marrtjina ŋuriŋi yolŋuyunydja miṯtjiyunydja nhäŋalana, maŋutji‐ḻaw'yurrunana gay' ŋunhi ganydjarr Godku yuwalknha maḻŋ'thurruna. Bala walala marrtjina djalkthunminana munatha'lilina, waŋananydja marrtjina bitjarrana, “Garraynydja dhuwala Waŋarr yuwalk, ŋayipina waŋganynha.”
40 Ga ŋayi Yelatjanydja waŋana, “Mulki'‐mulkiya dhuwali Bälwu dhäwu'‐gänharamirrinha walalanha ya'.” Bala ŋunhi yolŋu'‐yulŋuyunydja mulka'‐mulkanana walalanha marrtjina, bala yana bumarana walalanha bukmaknhana rakunyguŋalana.
Yelatjayu bukumirriyaŋalana, bala waltjaṉdhunydja dharyurrunana biyapul
18:41–46 (Elijah prayed and the drought ended)
41 Bala ŋayi Yelatja waŋanana nhanukala Giŋ Wayapkalana, “Gatjuy nhenydja marrtjiyana ma' wäŋalilina, ga ŋathana ḻukiya. Dhika ŋarra yukurra ŋämana waltjaṉdja yarrupthunarana marrtjinyara.”
42 Ga ŋayi Yelatjanydja marrtjina, ḏuwaṯthurrunana marrtjina bala bukulilina wal'ŋu ŋunhana, djinmir'ŋulilina, bala ŋunhalana ŋayi ṉepaḻ‐nyilŋ'thurrunanydja, bala bukumirriyaŋalana yukurrana waŋana Godkalana.
43 Ga yurruna ŋayi waŋana ŋunhiyi nhanŋuway djämamirrinhanydja, “Gatjuy marrtjiya! Biyaka bala nhäŋa buḏapthurra gapu ŋoy‐moṉuk.”
Bala ŋayi djämamirrinydja yuwalkthi marrtjina, ga nhäŋa'‐nhaŋala beŋumi, ga liliyi roŋiyina, ga ḻakaraŋala nhanŋu, “Bäyŋu warray, ŋula nhämiriw warray,” bitjarra.
44 Ga bitjarranydja yukurrana buku 7‐mirri, ga ŋunhinydja ŋayi marrtjina waŋganymirrina ḏaḏawyurruna, ga ḻakaraŋala bitjarrana, “Nhämanydja ŋarra yukurra dhuwala yutjuwaḻa yana maŋan, dhawaṯthun ŋayi marrtji gapuŋuru.”
Ga Yelatjanydja waŋana ŋurikala djämamirriwala bitjarra, “Gatjuy waḏutja, ga ḻakaraŋa ŋuripa Giŋba, ŋayi yurru marrtji waḏutja yana, ŋathil'yun yana marrtji yurru, yurruna ŋayi yurru waltjaṉdhunydja dharyun.”
45 Yaka weyindja, yurru ŋayi marrtjina ŋäkirrmaraŋalana gay' waŋupini'yu. Bur‐way bunanana, yupthurrunana waltjaṉdja, bena dhika waltjaṉ, wirrkina bäymana ŋonuŋnha. Ŋayi Wayaptja be nhäyu waṉḏina bala, yarraman'thu nhinana bala ṉaŋ'thurruna, balayi roŋiyina Djitjarillili.
46 Bala ŋayi ganydjarryu Godkalanydja mulkanana ŋanya Yelatjanha, bala ŋayi ṉaŋ'thurrunana, ŋurruŋuna nhinana bala waṉḏina Wayapkalanydja, yana liŋgu ga ŋunha mulkana wäŋa Djitjarilwuy.