Yo, Djawatjkunydja ŋunhi dhuŋgarranydja nhanŋu 7 yana, märr‐yutjuwaḻaŋ'ka ŋulinyaramirriyunydja ŋunhi ŋayi giŋdhinana Djudapuyŋuwuna bäpurru'wu, ga nhinananydja ŋayi yukurrana giŋdja 40‐na dhuŋgarranydja. Bitjarrana liŋguna ŋayi yukurrana djämanydja yana ŋamathaŋalana, nhanŋuwaynha yana malthurruna yukurrana Garraywuna, liŋgu Djiyuwatayu ŋuriŋi ḏalkarra'mirriyu bitjanna liŋgu ŋanya yukurranha marŋgi‐wekanhana. Yurru walala yaka wal'ŋu warrpam'thurrunanydja wal'ŋu ḏaw'‐ḏawyurruna buwayakkuŋala ŋunhiyi wäŋa malanha ŋunhi walala ŋuli yukurranha buku‐ŋal'yuna wiripuŋuwu waŋarrwu walalaŋgu; wiripu‐guḻku' yolŋu'‐yulŋu yukurranha ŋuli mukthunaŋga yana buku‐ŋal'yuna ŋunhiliyi ŋuriki wiripu‐guḻku'wunydja be nhäku waŋarrwu walalaŋgu.

4-16 Bala Djawatj wäthurruna ŋuriki ḏalkarra'mirriwu walalaŋgu, ga waŋana walalanha bitjarrana, “Waŋiya yolŋunha walalanha, walala yurru gäma'‐gama rrupiya, bala gurrunhanna marrtji, wetj yana walala yurru wekama yukurra, märr ŋilimurru yurru ŋamathamayi biyapul dhuḻ'yun Godku wäŋa Buṉbu dhuwala.”

Walalanydja yuwalkthi nherrara bathina malanha galki dhurrwaralili Buṉbulili, ga guḻku'yuna dhika yolŋu'‐yulŋuyunydja wekaŋala rrupiyanydja marrtjina, ŋunhi walala ŋuli marrtjinya lili buku‐ŋal'yunarawu Garraywu. Liŋguna dhaŋaŋdhinana rrupiyanydja dhika guḻku'na mirithirrina, ga ŋuriŋi walala wuŋiḻi'yurrunanydja yukurrana märraŋala lanapu'na makarrnha, ga garwarrwarr'mirrina dhika nhäna. Bala yana walala djämana ŋuriŋiyi, ŋamathaŋalana dhika ŋunhi Godkunydja Buṉbu.

19-21 Ŋunhi ŋayi Djawatjtja liŋguna rakunydhinana, ga nhanŋu gäthu'mirriŋuna *Wamatjayana wapthurruna dharapullili nhanukalanydja.