Nhinananydja ŋayi yukurrana, ga 3 dhuŋgarra ŋupara, bala nhanŋu walkurnha maḻŋ'thurruna gäthu'mirriŋuna *Manatja yäkunydja. Ga biyapul 12 dhuŋgarra djuḻkthurrunana, bala yana ŋayi rakunydhinana Yitjakayanydja, bala ŋunhinayi nhanŋu gäthu'mirriŋuna Manatjana dharapullilinydja nhanukala wapthurruna. Yurru ŋayi ŋunhi Manatjanydja yakana ŋamakurru' giŋ, ŋayinydja yukurrana ŋuriŋinydjayi djäma mirithirrina yätjnha wal'ŋu rom; ŋayi biyapul buṉbuŋala marrtjina ŋunhiyi wäŋa malanha goŋbuywu waŋarrwu walalaŋgu, ŋunhi nhanukala yukurrana bäpa'mirriŋuyu bakmaraŋala ŋäthili, ga bitjarrayi liŋgu ŋayi marŋgikuŋala ŋunhi yolŋu'‐yulŋunhanydja Djudapuyŋunhanydja, marŋgikuŋala biyapul ŋayi walalanha ŋuriki buku‐ŋal'yunarawu †Bälwu ga ŋuriki miyalkku waŋarrwu ‡Yatjarawu yäkuwu. Ga Manatjanydja ŋayipinydja, ŋayinydja ŋuli yukurranha buku‐ŋal'yuna ga ganyu'wu, ga ŋunhiwala Godkalanydja Buṉbulili ŋayi dhuḻ'yurruna ga barŋnha buṉbuŋala, bala walala ŋuli yolŋunydja walala ŋunhi marrtjinya, ga buku‐ŋal'yuna ŋuli ŋunhalanayi ŋuriki wiripu‐guḻku'wunydja waŋarrwu. Ga bitjarrayi ŋayi ŋuriŋi yätjthu giŋdhu bumara nhanŋuwaynydja ŋayi gäthu'mirriŋunha walkurnha, bala batharana ŋunhimalayi mundhurrnha ŋurikiyi nhanukalaŋuwu waŋarrwuna. Yo, ŋayi ŋunhiyi giŋ marrŋgitjtja yolŋu, bili ŋaḻwa'yuna ŋayi ŋuli ŋuriŋi matjinydji'wuyyu be nhäyu girri'yu malanyŋuyu.

Yo, bitjanana liŋgu ŋayi ŋuli ŋuriŋiyi yätjthunydja giŋdhu djäma yätjnha wal'ŋu yanana, bala Garraynydja wirrkina dhika ŋaramurryina, ga waŋananydja ŋayi bitjarrana, “Ŋarra ḻakaraŋala liŋgu §Daypitkala bitjarra gam', *Djurutjalamdja dhuwala ŋarrakuway wäŋa dhulŋuŋu; dhiyalanydja nhuma yukurra yurru buku‐ŋal'yun ŋarrakuway yana. Ŋuli yurru yolŋu walala ŋarrakuwaynydja malthun romgu, minawaŋ ŋarrakuwaynydja malanyŋuwu, ga walalanydja yurru nhina yukurra bitjanna liŋgu dhiyalana bili wäŋaŋura. Ga ŋuli walala yurru yarryundja ŋarraku, ŋarranydja walalanha ŋuli dhawaṯmaraŋuna djalkthurruna.” Bitjarra ŋayi Garray waŋana yukurrana ŋäthilinydja.

9-15 Ga yuwalk warray yolŋu walala †Djudanydja yaka malthurruna Garraywu; walala yukurrana djämanydja mirithirrina yätjnha rom malanha, liŋgu walala malthurruna yukurrana Manatjawuna romgu. Bala Garraynydja waŋana, “Yindina marinydja yurru buna dhiyala Djurutjalamdja ga Djudanydja. Ŋarra yurru dhä‐ḏir'yunna Djurutjalambuynydja, bitjan yana liŋgu bitjarra ŋarra ŋunha dhä‐ḏir'yurruna ‡Djamariyawuy ga §Giŋ‐Wayapku miṯtjinha, liŋgu Manatjanydja dhuwala yätj yana yolŋu, bitjan Giŋ Wayap. Ŋarranydja yurru biḏiwiḏitjkumana dhuwalanydja yolŋunha walalanha, gonha'yunna yurru, bala wekamana ŋarra yurru miriŋuwalana; ŋunha miriŋunydja yurru marrtjina lili, ga märramana walalanha ga wäŋa walalaŋgu. Bitjandja ŋarra yurru, bili walala ŋunhi ŋarrakuwaynydja wal'ŋu yolŋu'‐yulŋu mirithinana yana yätjthina, ŋunhiyi yolŋu walala ŋunhi ŋarra walalanha dhawaṯmaraŋala beŋuru *Yetjipŋuru.” Bitjarranydja yukurrana God waŋana.

16-18 Yo, ŋayi Manatjanydja giŋ yukurrana nhinana ga 55 dhuŋgarra ŋupara, ga bitjanana liŋgu ŋayi ŋuli djämanydja yätjnha yanana, bala ŋayi rakunydhinana, bala nhanukala gäthu'mirriŋuyuna dharapulnydja märraŋala ŋanya †Waymandhuna.

19-26 Ga ŋayinydja ‡Waymandja balanyara liŋgu yana yätj buŋgawa, bitjan nhanŋu bäpa'mirriŋu §Manatja; ŋayi ŋurrkaŋala Garraynha ga bitjana warray liŋgu ŋayi ŋuli yukurranha buku‐ŋal'yuna ŋuriki nhäŋiniŋ'kunydja waŋarrwu malaŋuwu. Nhinananydja ŋayi yukurrana buŋgawa ga märrma' dhuŋgarra ŋupara, ga ŋuliŋurunydja bala nhanukala ŋuriŋi wiripu‐guḻku'yunydja djämamirriyu walalay miriŋuyu bumara warray ŋanya, rakunyguŋalana Waymannhanydja, bala walala nherrara dharapullilinydja nhanukala nhanŋu gäthu'mirriŋunhana *Djotjayanhana.