19
Dhuwalayina rom malanha ŋunhi Godkunydja
19:1–18, 26–37 (These are the laws of God)
1-2 Yo, Garrayyu Godthu ḻakaraŋala Mawtjitjkala rom malanha bitjarra gam'. “Ḻakaraŋa ŋarrakalaŋuwa yolŋu'‐yulŋuwa Yitjuralpuyŋuwanydja biyaka, ‘Nhumanydja yurru ŋarrakunydja yolŋu walala nhiniya yukirriya ḏarrtjalkthiya yana gal'ŋu, biyakayi liŋgu yana bitjan ŋarranydja dhuwala ḏarrtjalk gal'ŋu yana Garray, ganaŋ'thun yukurra ŋulaŋuru yätjŋurunydja.
3 Märr‐ŋal'yurra nhokalaŋuwala bäpa'mirriŋuwala ga ŋäṉḏi'mirriŋuwalanydja, ga bitjandhiyi nhuma yurru ganaŋ'maramayi ŋunhi dhulŋuŋunydja ŋarrakuwaynydja gal'ŋu walu, liŋgu nhumanydja dhuwala ŋarrakuway yana yolŋu walala, ga ŋarranydja God nhumalaŋgu.
4 Yaka gonha'yurra ŋarranha ga buku‐ŋal'yurra wiripuŋuwunydja waŋarrwu, wo ŋula nhäku malaŋuwu dhuyuwunydja goŋbuywunydja ŋunhi, liŋgu ŋarrapi dhuwala waŋgany Godtja nhumalaŋgu.
5-10 “Ŋunhi nhuma yurru gulkthun ŋathanydja, yaka mälkuŋanydja warrpam'thurranydja gulkthurra, gonha'yurra muka wiripunydja yarraṯalili, ga yaka wapmaraŋa ḻarryunaranydja; gonha'yurra ŋunhiyinydja ŋuruku ŋurruwuykku ŋunhi yolŋuwu, ga ŋuruku mulkuruwu yolŋuwu.
11-12 “Yaka manaŋiyanydja ŋula nhä, ga yaka djawukiyanydja ḻakaraŋa, ga yaka wakalkurru waŋiya Garraynhanydja yäku ḻakaraŋa.
13 Yaka rom‐ḏälthiya wiripuŋuwunydja ŋuruku yolŋuwu, ga yaka djaw'yurra ŋula nhänydja nhanŋu.
14 Yaka waŋiya dhäruk yätjkuŋa yolŋunha mäkiri'miriwnhanydja, ga yaka gunganhamirriyaŋa ŋula nhä bambaywunydja yolŋuwu, yana biyaka rom‐wiyaṉiyana Garraywuna ŋunhi ŋayi nhuŋu God.
15 “Djäma ŋamathaŋa wal'ŋu bukmakku yana. Yaka nhäŋa nyilŋ'maraŋa ŋurruwuyknhanydja yolŋunha, ga garrwarkuŋanydja yindikuŋanydja nhäŋa ga guyaŋiya ḻukunydjamirrinha ŋunhi yolŋu'‐yulŋunha.
16-17 Yaka waŋiya marrtjiya ḻakaraŋa dhäwu'kuŋa wiripuŋunha yolŋunha, ga ŋuli yurru ŋayi ŋula yolthu yätjkumanydja nhuna, nhenydja yana bäy‐ḻakaraŋana nhanŋu; yaka buku‐ruŋinyamaraŋa yätjtja, ga yaka yana mukthurranydja nhanŋu ŋaramurryiya.
18 Yo, nhumanydja yurru ŋunhi ŋarrakuwaynydja yolŋu'‐yulŋu märr‐ŋamathiya wirrki wal'ŋu yana wiripuŋuwunydja yolŋuwu wiripu‐guḻku'wunydja, biyaka yana liŋgu bitjan nhe yukurra märr‐ŋamathirri nhuŋuway nhe, liŋgu ŋarranydja dhuwala God nhuŋuway.
26-28 “Yaka yana djäma be nhä marrŋgitjthunydja girri'yu, mangaṯany'tja ŋula nhänydja, ga yaka yana ŋula nhäkunydja ḻarruŋa ŋathil'yurranydja maḻŋ'maranharawu, nhä yurru ŋayi maḻŋ'thun yalala. Yaka mitmitthunmiya nhunapinyay nhe rumbal mim'pumirriyanhamiyanydja, ga yaka yukirriya mitmitthunmiya ga bunharamiya nhunapinyay nhe rumbal baḏuwaḏuyunmiya ŋuruku ŋunhi rakunygunydja yolŋuwu ŋäthinyarakurrunydja, liŋgu ŋarra dhuwala God nhumalaŋgunydja, ga nhumanydja ŋarrakuway yana yolŋu walala.
29-30 “Ga yaka nhuŋuway yothu'nha miyalknhanydja wekaŋa ḏarramuwa, ŋunhi ŋayi ḏarramu ŋunhiyi djäl nhanŋu yana marramba'wu, ŋunhi ŋayi yurru ŋuliwitjandhinydja romgurru buku‐ŋal'yunna yukurra be nhäkuna waŋarrwuna; balanyarayunydjayi romdhu yurru nhuna ŋayi bilmaramana wiripuŋuwalana waŋarrwala, bala yurru nhuŋu baḏuwaḏuyunna ŋunhi wäŋanydja ŋuriŋiyinayi romdhuna. Ŋarrapi dhuwala waŋgany yana God nhumalaŋgunydja.
31 “Wiripu‐guḻkuny'tja yolŋu walala ŋuli marŋgiyirri be gaḏamandhirrina mangaṯa'wuŋuna walalaŋguŋu marŋgikunhara, ga wiripunydja ŋuli yolŋu walala waŋa marrtji mokuywalana rakunygalana ŋurikalana be. Nhumanydja yaka mäkiri'‐witjurra ŋuriki walalaŋgalaŋuwu dhärukkunydja, ga yaka marrtjiya ŋurikalayinydja yolŋuwala, märr ŋayinydja yurru nhuna guŋga'yun ga marŋgi wekama nhuna, liŋgu ŋuriŋi nhanukalanydja romdhu nhuna yurru bitjan ŋayaŋu‐djarrpi'kumana, bala yurru nhuna ŋuriŋiyinydjayi ganaŋ'thunmaramana yana ŋuliŋuru Garraywalanydja, nhe yurru yakana yana galkithirri Godkalanydja. Ŋarrapi dhuwala waŋgany Godtja, ganaŋ'thun yukurra yurru ŋulaŋuru mangaṯa'walanydja be nhäkalanydja mokuywalanydja.
32-33 “Yaka wakalkuŋa ŋaḻapaḻnhanydja yolŋunha. Märr‐ŋal'yurra yana nhanukala, ga guŋga'yurra ŋanya biyaka.
34 Ga ŋuli yurru ŋayi mulkurunydja yolŋu nhina yukurra nhumalaŋgala wäŋaŋura, yaka djäma yätjkuŋanydja nhanŋu, yana märr‐ŋamathiya nhanŋu biyaka märr‐ŋal'yurra yukirriya, liŋgu nhuma yukurrana ŋäthilinydja nhinana ŋunhala Yetjip wäŋaŋura mulku'‐mulkuru muka ŋunhi nhumapinydja.
35-36 Yaka mayali'‐wilkthurra ŋula yolnha yolŋunhanydja, liŋgu ŋarrapi dhuwala waŋarrnydja nhumalaŋgu Garraynydja, ŋunhi ŋarra dhawaṯmaraŋala nhumalanha beŋuru Yetjipŋuru wäŋaŋuru.
37 Märraŋa ŋarraku yana romdja malanha warrpam'thurra, liŋgu ŋarrapi yana Garraynydja nhumalaŋgu waŋarr Godtja.” Ga bitjarra ŋayi Garray waŋananydja.