2
1 Yo, Garraynydja Ganydjarr‐ḏumurrunydja wal'ŋu Waŋarr waŋa yukurra ŋurikala ḏalkarra'mirriwalanydja yolŋu'‐yulŋuwala bitjanna, “Ŋäka nhumanydja. Dhuwala ŋunhi ŋarra romdja nherrara gam' nhumalaŋgu.
2 Ŋuli nhuma yurru yakanydja mäkiri'‐witjun ga märrama dhäruk ŋarranha, märr yurru ŋuruŋu yolŋu'‐yulŋuyu nhämana ŋarrakunydja ḻatju' ŋunhi rom nhumalaŋgalanydja, bala ŋarranydja yurru djuy'yunna‐wala yana marina nhumalaŋgu; nhuma yurru ŋayaŋu‐yätjthirrinydja wirrki wal'ŋu yana ŋarrakuŋunydja, yakana ŋarranydja nhumalanha yurru goŋmirriyama biyapulnydja, liŋgu ŋarrakunydja dhäruk nhuma bitjarra wakalkuŋala warray, yanapi ŋarrakunydja ŋunhi dhäruk ŋula nhäna nhäŋiniŋ'nha.
3 Yo, nhumalaŋgu yumurrkuny'tja yurru rirrikthunna marrtji ŋayaŋu‐yätjthirrina dhikana wal'ŋu, ga ŋunhi nhuma yurru gäma rerrimirrinha wäyinnha ŋarraku, bala ŋarranydja yurru ŋuliŋuruyi dhurri'na märrama ŋunhiyi wäyinnha, bala ŋämiṉna ŋarra yurru nhumalanhana, märr yurru walala märramanydja nhumalanha, bala gäma ŋunhana dhukun'lilina djalkthun, rrambaŋikumana yanana ŋunhina malanha ŋunhi nhuma gäŋala lili ŋarraku.
4 Ga ŋuliwitjandhinydjayi nhe yurru marŋgiyirrina, ŋunhi ŋarrapi wekaŋala romdja ŋarrakuway nhumalaŋgala djäkalili ḏalkarra'mirriwala walalaŋgala, mala‐wunharawuywala ŋurikala Lepaywala, bala nhuma yurru djämanydja ŋunhi yana liŋgu romdja, ŋunhi ŋarrapi nherrara nhumalaŋgu.
5 Ŋäthilinydja ŋunhinydja wal'ŋu ŋarra nherrara dhawu' nhumalaŋgala, märr nhuma yurru nhina yukurra walŋa ga ŋayaŋu‐yal'yunara yana, märr yurru nhuma märr‐ŋal'yun ŋarraku ga dhäruk märrama ŋarranha. Yuwalk yana nhumalaŋgu märi'munydja Lepaynydja yäku rom‐wiyaṉiyina ŋarrakunydja; ŋayi märr‐ŋal'yurruna ŋarrakala yäkulili, ga dhäruk‐märraŋala ŋarranha ŋayi.
6 Ga ŋunhalanydja ŋunhi ŋurruŋuranydja ŋuriŋi ḏalkarra'mirriyu walalay yukurrana marŋgikuŋala yolŋu'‐yulŋunha dhunupa yana ŋamathaŋala wal'ŋu; walala ḻakaraŋala yukurrana nhäyinyara dhunupa ga nhäyinyara yätj bitjarra, liŋgu ŋurruthaŋalanydja ŋunhiyi yolŋu walala ḏaḻkarra'mirri mala yukurrana marrtjina galki gal'ŋu yana ŋarrakala. Yo, ŋunhiyi walalawuynydja yukurrana nhinana ŋamathaŋala dhika wal'ŋu ŋayaŋu‐dhunupa, ga bitjarrayi liŋgu walala yukurrana gatjpaḻ'maraŋala guḻku'nha yolŋunhanydja walalanha, gatjpaḻ'maraŋala beŋuru romŋuru yätjŋurunydja ga dhukarrŋuru.
7 Yo, ŋarrapi ŋunhiyinydjayi djäma wekaŋala ŋurikiyinydja ḏalkarra'mirriŋuwu walalaŋgu, märr bini walala marŋgikunha yukurranha yolŋu'‐yulŋunha, märr yurru walala ŋunhi yolŋunydja walala yuwalkkuma yana marŋgiyirri gal'ŋu Godkunydja Garraywunydja ga nhanukalayŋuwu romgu yana, liŋgu ŋunhi ḏalkarra'mirrinydja walala ŋarrakuway yana dhäwu'mirri walala.” Bitjarra ŋayi Garraynydja waŋana.
8 “Yo, ga nhumanydja ḏalkarra'mirri walala gatjpaḻ'yurruna warray ŋuliŋuruyi dhunupaŋurunydja dhukarrŋuru, bala marŋgikuŋala yolŋu'‐yulŋunhanydja djarrpi'kuŋalana dhikana wiripuyaŋalana, bala walalanydja yana dhumbal'yurrunana, bala galkinana yukurrana ŋunhiwalana yätjlilina romlili, liŋgu ŋuriŋi nhumalaŋgala djarrpi'yu dhärukthu. Liŋguna nhuma bakmaraŋala ŋunhiyi dhawu'nha ŋunhi ŋarra nherrara nhumalaŋgalaŋuwala märi'muwala Lepaywala.
9 Ga dhiyakuyinayi märrwu yolŋuyu walalay ŋunhi Yitjuralpuyŋuyunydja miṯtjiyu ŋuli nhäŋiniŋ'‐ḻakaramana yukurra nhumalanha, yakana walala yurru nhumalaŋgala märr‐ŋal'yun, ga mäkiri'‐witjun nhumalaŋgalayŋuwu dhärukku, liŋgu nhumapinydja yakana yukurra marrtji ŋarrakalaynydja gal'ŋu romgurru ga dhukarrkurru. Ga ŋunhi nhuma ŋuli marŋgikuma ŋarrakunydja yolŋunha walalanha, bala yakana nhuma ŋuli rrambaŋikumanydja bukmaknha, yana nhuma ŋuli waŋa bitjanna, ‘Bäythi,’ bitjanna, ŋunhi nhumalaŋgala ŋuli galkiwuyyunydja gurruṯu'mirriyu bakmarama ŋarrakunydja rom.” Bitjarra ŋayi Garray waŋananydja.
Godkunydja yolŋu walala märranhamina djarrpi'kunhaminana
2:10–16 (The people’s unfaithfulness to God’s law)
10 Yo, nhuma yolŋu walala ŋuli waŋa bitjan, “Yaka warray ŋanapurrunydja bakmaraŋala ŋunhiyi dhawu', ŋunhi Godthu ŋayipi nherrara ŋanapurruŋgalaŋuwala märi'muwala. Birrka'mirri muka ŋanapurruŋgu gurruṯu'mirrinydja, liŋgu bukmak ŋunhi bäpurru' ga miṯtji waŋganyguŋu muka bäpa'mirriŋuwuŋunydja mala‐wunharawuy, ga ŋanapurrunydja ŋuli rrambaŋikuma wal'ŋu bukmaknha yolŋunha.” Bitjan nhuma ŋuli waŋa, liŋgu nhumanydja Yitjuralpuyŋuyunydja ŋuli ḏarramuwurruyu märra'‐marrama mulku'‐mulkurunhana dhäykawurrunha beŋuwuynha barrkuwuynha wäŋawuy, ŋunhi walala ŋuli buku‐ŋal'yun be nhäkuna bothinyarayŋuwuna waŋarrwu.
11 Yuwalk yana nhuma dhuwurr‐yätjthina witjarr'yurruna Godnhanydja, liŋgu dhiyala gay' Djurutjalamdja ga buku‐ḻiw'marama, nhuma bitjarra Godkunydja Buṉbunha ŋunhi wakalkuŋalana, yakana ŋunhiyinydjayi biyapulnydja wäŋa ḏarrtjalk gal'ŋu, ganaŋ'thunara Godkunydja nhanŋuwaynydja, liŋgu nhuma ḏarramuwurruyu ganarrana ŋurukuy Yitjuralpuyŋunhanydja miyalknha walalanha, ŋunhinhanydja ŋunhi walala ganaŋ'thunara yolŋu walala, nhanŋuway yana Godku dhulŋuŋu, bala märraŋala nhuma wiripunhana dhäykanha, ŋunhinhana ŋunhi ŋayi ŋuli buku‐ŋal'yun wiripuŋuwuna waŋarrwu bothinyarayŋuwuna nhäŋiniŋ'kuna.
12 Yo, yuwalk yana ŋayi yurru Godthunydja guḻkthunna ga ŋaŋ'‐ŋaŋdhunna birrka'mirrinhana yolŋunhanydja ŋunhi ŋayi ŋuli djäma yätjkuma bitjandhiyi. Bäyyi ŋayi ŋunhi be ḏalkarra'mirri ŋayi yolŋu, wo wakinŋu gali'wuy yolŋu, yakana yurru ŋayi Godthu märramanydja ŋaḏupthundja ŋurikiyi nhanukalaŋuwu mundhurr‐wekanharawuywunydja, yakana ŋayi ŋunhiyinydjayi yurru biyapulnydja nhanŋuway gal'ŋu Godku.
13 Yo, nhuma ŋuli ŋäthinyamirrina wal'ŋu dhikana galkina ŋunhilina Godkalana barŋŋura, liŋgu yakana ŋayi yurru Godthunydja märrama nhokuŋu ŋunhiyi wekanhara.
14-15 Bala nhuma ŋuli dhä‐wirrka'yun waŋa bitjanna, “Nhäku warray ŋayi Godthunydja yakanydja märraŋala ŋanapurruŋguŋu mundhurr‐wekanhara? Nhäku warray ŋayi yakanydja ŋanapurrunha goŋmirriyama ŋuli yukurra?” Ga ŋarra yurru ḻakaramanydja nhumalaŋgu bitjanna gam'. Godthunydja yurru yakana nhumalanha goŋmirriyama, liŋgu nhuma bakmaraŋala dhawu' ŋunhi, ŋunhi nhuma nherrara bitjarrayi. Yo, ŋulinyaramirriyunydja ŋunhi nhe yuṯanydja yolŋu, nhe märraŋala miyalknha nhuŋuway, ga dhawu'‐nherrara nhe Godkala yäkuyu; nhe dhawu'mirriyaŋalanydja ŋunhi miyalknha, ŋunhi nhenydja yurru nhina waŋganyŋura, galki nhuma gal'ŋu yana yurru gupaḏalŋu‐wala, bitjarra nhe. Bala ŋayi Godthunydja dhambay‐manaparana nhumalanha waŋganyguŋalana, märr yurru nhumanydja maṉḏa märrmany'tja waŋganynha rumbalnydja, yakana biyapul märrma'. Nhäku warray ŋayi ŋuli Godthu dhambay‐manapan märrma'nhanydja Yitjuralpuyŋunha maṉḏanha, waŋganygumanydja maṉḏanha? Yo, ŋayi bitjarrayinydjayi waŋganyguŋalanydja nhumalanha Yitjuralpuyŋunhanydja maṉḏanha, märr yurru nhumalaŋgu ŋunhi yumurrkuny'tja nhanŋuway yana Godku Garraywu. Ga dhiyakuyinayi märrwu nhuma yurru yaka ganan nhumalaŋguway nhuma dhäykanha, ŋunhi nhe märraŋala ŋäthili gal'ŋu ŋanya, yana nhe yurru nhinanydja yukurra ŋurikalaŋumirri liŋgu waŋganygalaŋumirri, ga yakana märraŋa ŋula wiripuŋunhanydja yolŋunha mulkurunhanydja, ŋunhi ŋayi yaka nhanŋuway Godku gal'ŋu yolŋu.
16 Yo, ŋayi Garraynydja, Yitjuralwunydja ŋunhi God waŋa yukurra bitjan, “Ŋapa‐nherraṉmirrina ŋarra yukurra mel‐nyaŋ'thunna ŋurikiyinydjayi romgu gananminyaramirriwunydja, ŋunhi nhe ŋuli ŋayaŋu‐yätjkuma nhuŋuway nhe miyalknha, ga djuy'yunna, gonha'yunna ŋanya. Yo, nhuma ŋunhi ŋarrakunydja yolŋu walala yurru dharraḏakunhamiya nhunapinyay nhe ŋunhi mel‐ŋamathinyaramirrinydja, märr yurru nhe yaka muka bakmarama dhawuny'tja, ŋunhi nhe nherrara nhokalaŋuwala miyalkkala yäkuyu ŋuriŋi Garraywala.” Ga bitjarra ŋayi Garray waŋananydja.
Walu dhuwala mala‐yarr'yunarawunydja galkina
2:17—3:5 (The day of judgement is near)
17 Yo, nhumanydja ŋunhi bitjarra Garraynhanydja märr‐yawaryunmaraŋalana ŋuriŋi dhärukthu nhumalaŋgalay. Ga waŋa nhuma ŋuli dhä‐wirrka'yun bitjan, “Nhaltjan dhika ŋanapurru ŋanya ŋuli märr‐yawaryunmaramanydja?” bitjan. Djawaryun ŋayi yukurra ŋayaŋu‐ḏaḏawyunna ŋuriŋinydja nhumalaŋgala dhärukthu, ŋunhi nhuma ŋuli waŋa bitjan, “Godthu ŋuli ḻakarama ŋunhi dhuwurr‐yätjmirrinhanydja yolŋu'‐yulŋunha ‘ŋamakurru'mirri’ bitjan. Wirrki ŋayi Godtja ḏukṯuk yätjmirriwunydja yolŋuwu walalaŋgu,” bitjan nhuma ŋuli. Ga wiripunydja nhuma ŋuli waŋa bitjan, “Wanhaka dhika ŋayi be Godtja? Nhätha dhika ŋayi yurru bunanydja, bala dhä‐ḏir'yundja dhuwurr‐yätjmirrinha?”