6
1 ኑኒ ፆሳራ ኢሲፌ ኦꬂያ ኣሲ ጊዴይሳዳ፥ ሂንቴ ኤኪዳ ኣꬎ ኬሃቴꬃ ሃዳ ኦꬆና ሜላ ኑ ሂንቴና ዎሶስ።
2 ፆሳይ፥
«ታ ኔና ሲዓና ዎዴን ሲዓስ፤
ኣቶቴꬃ ጋላሳን ኔና ማዳስ»
ያጌስ። ሄኮ፥ ታ ሲዒያ ዎዴይ ሃዒ፤ ኣቶቴꬃ ጋላሳይ ሃቺ።
3 ኦኒካ ኑ ኦሱዋ ቦራና ሜላኔ ኑናን ꬉቤታና ሜላ ኮዮኮ።
4 ጊዶሺን፥ ኑ ቱማ ፆሳ ኦሳንቾታ ጊዴይሳ ኑ ኦꬂያ ኡባባን ቤሲዳ። ዳሮ ጌንጫን፥ ዋዬን፥ ሜቶን፥ ኡንዓን፥
5 ጋራፌቴꬃን፥ ቃሾን፥ ኢፆን ኩሚዳ ዎጫማን፥ ዳቡራን፥ ꬊስኮ ꬋዮን፥ ፆማን፥
6 ጌሻቴꬃን፥ ኤራቴꬃን፥ ዳንዳዓን፥ ኬሃቴꬃን፥ ጌሻ ኣያናን፥ ቱማ ሲቆን፥
7 ቱማ ሃሳያኒኔ ፆሳ ዎልቃን ኑኒ ኢያ ኦሳንቾታ ጊዴይሳ ቤሲዳ። ቃሲ ፂሎቴꬃይ ኑስ ቶራኔ ጎንዳሌ።
8 ኑኒ ቦንቼቲዳኔ ቶሼቲዳ፤ ጫዬቲዳኔ ጋላቴቲዳ። ቱማ ሃሳዮስ፥ ሺን ኣሳይ ኑና ዎርዳንቾ ጊዶሶና።
9 ኑ ኣሳን ኤሬቲዳ ኣሲ፥ ሺን ኤሬቶና ኣሳ ሜላ ጊዲዳ። ሃይቂዶሶና ያጌቲዳ፥ ሺን ፓፃ ዴዖስ፤ ሾጬቲዳ፥ ሺን ሃይቂቦኮ።
10 ኑኒ ኣዛኒኮካ ኡባ ዎዴ ኡፋይቶስ። ኑ ማንቆ ዳኖስ፥ ሺን ዳሮ ኣሳ ዱሬዮስ። ቃሲ ኣይኮይካ ባይና ኣሲ ዳኖስ፥ ሺን ኡባይ ኑባ።
11 ቆሮንቶሳ ኣሳው፥ ኑ ሂንቴው ቆንጬን ኦዲዳ፤ ኑ ኡሉዋ ሂንቴና ቤሲዳ።
12 ሂንቴ ኑና ሂንቴ ሲቁዋ ቤሶና ዲጊዴታፔ ኣቲን ኑ ኑ ሲቁዋ ሂንቴና ዲጊቦኮ።
13 ኣዉ ባ ናይታስ ኦዴይሳዳ ታ ሂንቴው ኦዳይስ፤ ኑ ሂንቴና ኑ ኡሉዋ ቤሲዳይሳዳ፥ ሂንቴካ ሂንቴ ኡሉዋ ኑና ቤሲቴ።
ኣማኖና ኣሳራ ዴዒያ ኢሲፌቴꬃ ኣጎ
14 ኣማኖና ኣሳራ ቤሶና ኦጌን ዋፄቶፊቴ። ፂሎቴꬃሲኔ ናጋራስ ኣይቢ ጋሄቴꬂ ዴዒ? ፖዖሲኔ ꬉማስ ኣይቢ ኢሲፌቴꬂ ዴዒ?
15 ኪሪስቶሳኔ ፃላሄ ኢሲፌ ጋꬂያባይ ኣይቤ? ቃሲ ኣማኔይሲኔ ኣማኖናይሲ ኢሲፌ ኮፂያባይ ኣይቤ?
16 ፆሳ ኬꬃስ ኤቃታራ ኣይቢ ኢሲፌቴꬂ ዴዒ? ፆሳይ፥
«ታኒ ኤንታ ጊዶን ዴዓና፥
ኤንታ ጊዶን ሃሙታና።
ታኒ ኤንታ ፆሳ ጊዳና፤
ኤንቲካ ታ ኣሴ ጊዳና»
ጊዳይሳዳ፥ ኑኒ ዴዖ ፆሳ ኬꬂ።
17 ሄሳዳካ፥ ጎዳይ፥
«ኤንታ ጊዶፌ ሻኬቲዲ ኬዪቴ፤
ቱና ጊዲዳባ ቦቾፊቴ፤
ታ ሂንቴና ኤካና።
18 ታ ሂንቴው ኣዋ ጊዳና፤
ሂንቴ ታው ኣዴ ናይታኔ ማጫ ናይታ ጊዳና፤
ያጌስ ኡባፌ ዎልቃማ ጎዳይ» ያጊስ።