5
ዬሱሲ ዴሪያ ቦላ ታማርሲዳ ቲሚርቲያ
ዳሮ ዴሬይ ሺቂዳይሳ ዬሱሲ ቤዒዳ ዎዴ ዴሪያ ቦላ ኬዪዲ ኡቲስ። ኢያ ታማሬቲ ኢያኮ ሺቂን፥ ሃይሳዳ ያጊዲ ታማርሲስ፡
ቱማ ኡፋይሳ
(ሉቃ 6፡2-23)
«ባንታ ኣያናን ማንቆቲ ኣንጄቲዳይሳታ፥
ሳሎ ካዎቴꬃይ ኤንታሳ።
ዬኬይሳቲ ኣንጄቲዳይሳታ፥
ኤንቲ ሚንꬄꬆ ዴማና። +
ባንታ ዎዛናን ኣሽኬቲ ኣንጄቲዳይሳታ፥
ኤንቲ ሳዓ ላታና። +
ፂሎባ ኦꬃናው ኮሻቴይሳቲኔ ሳሞቴይሳቲ ኣንጄቲዳይሳታ፥
ኤንቲ ካላና። +
ማሬይሳቲ ኣንጄቲዳይሳታ፥
ኤንቲ ማሮቴꬂ ዴማና።
ዎዛና ጌሻቲ ኣንጄቲዳይሳታ፥
ኤንቲ ፆሳ ቤዓና። +
ሲጌꬄይሳቲ ኣንጄቲዳይሳታ፥
ኤንቲ ፆሳ ናይታ ጌቴቲ ፄጌታና።
10 ፂሎባ ኦꬂያ ጊሾ ጊዲ፥
ጎዴቴይሳቲ ኣንጄቲዳይሳታ፥
ሳሎ ካዎቴꬃይ ኤንታሳ። +
11 «ኣሳይ ሂንቴና ታ ጊሾ ጊዲ ጫያ ዎዴ ጎዲያ ዎዴኔ ሂንቴ ቦላ ኢታባ ኡባ ዎርዶን ኦዲሲያ ዎዴ ሂንቴ ኣንጄቲዳይሳታ። + 12 ሂንቴ ዎይቶይ ሳሎን ጊታ ጊዲያ ጊሾ ኡፋይቲቴ፥ ሃሹ ጊቴ። ሂንቴፌ ካሴ ዴዒያ ናቤታ ሄሳዳ ጎዲዶሶና። +
ማፂኔኔ ፖዖ
13 «ሂንቴ ቢታስ ማፂኔ፤ ማፂኔይ ባ ማፂኔቴꬃ ኣጊኮ፥ ባ ማልዖቴꬃ ዋቲ ዛሪ ዴማኔ? ካሬ ሆሊን ኣሳን ዬꬌታናፔ ኣቲን ኣይቢስካ ማዴና። +
14 «ሂንቴ ቢታስ ፖዖ፤ ዴሬ ቦላ ዴዒያ ካታሚያ ቆሴታናው ዳንዳዑኩ። + 15 ፆምፔ ኦይꬂዲ ሶን ዴዒያ ኣሳ ኡባስ ፖዓና ሜላ ꬎቃ ሶን ዎꬄሲፔ ኣቲን ዳሎ ጊዶን ዎꬄይ ባዋ። + 16 ሄሳ ሜላ ኣሳይ ሂንቴ ሎዖ ኦሱዋ ቤዒዲ፥ ሳሎን ዴዒያ ሂንቴ ኣዋ ቦንቻና ሜላ ሂንቴ ፖዖይ ኣሳ ሲንꬃን ፖዖ። +
ሙሴ ሂጊያ
17 «ታኒ ሙሴ ሂጊያኔ ናቤታ ቃላ ሻራናው ዪዳ ሂንቴው ዳኖፖ። ታኒ፥ ኤንቲ ኦዲዳይሲ ቱማ ጊዴይሳ ቆንጪሳናው ያሲፔ ኣቲን ሻራናው ያቢኬ። 18 ታ ሂንቴው ቱማ ኦዳይስ፤ ሳሎይኔ ሳዓይ ኣꬋና ጋካናው ሂጌ ኡባይ ፖሌታናፔ ኣቲን ሂጊያፌ ኢሲ ቃላይ ዎይኮ ፒዳሌይ ኣꬌና።+ 19 ሄሳ ጊሾ፥ ሃ ኪታታፔ ጉፂያ ኢሲ ኪታ ሜንꬂያ ኦኒካ ቃሲ ሃራታ ሄሳꬆ ኦꬃና ሜላ ታማርሴይ ኦኒካ ሳሎ ካዎቴꬃን ኡባፌ ጉꬃ ጊዳና። ሺን ሃ ኪታ ፖሌይሲኔ ሃራታካ ፖላና ሜላ ታማርሴይ ሳሎ ካዎቴꬃን ጊታ ጊዳና። 20 ታ ሂንቴው ኦዳይስ፤ ሂንቴ ፂሎቴꬃይ ፋሪሳዌታ ፂሎቴꬃፌኔ ሂጌ ኣስታማሬታ ፂሎቴꬃፌ ኣꬎና ኢፂኮ፥ ሳሎ ካዎቴꬃ ጌሌኬታ።
ዎꬎባ
21 «ሂንቴ ማይዛታስ፥ ‹ዎꬎፒቴ፤ ሼምፖ ዎꬊዳ ኦኒካ ፒርዴታና› ጌቴቶይሳ ሲዒዴታ። + 22 ሺን ታ ሂንቴው ኦዳይስ፤ ባ ኢሻ ሃንቄቲያ ኡባይ ፒርዴታና። ባ ኢሻ ጫያ ኦኒካ ዳይና ሲንꬂ ፒርዳስ ሺቃና። ባ ኢሻኮ፥ ‹ኤያይ› ጊያ ኦኒካ ቃሲ ጋናሜ ታማን ፒርዴታና።
23 «ሄሳ ጊሾ፥ ኔኒ ኔ ያርሹዋ ያርሺያ ዎዴ ኔ ኢሻ ቆሂዳባይ ኔው ኣኬኬቲኮ፥ 24 ኔ ያርሹዋ ሄ ቤሳን ኣጋዳ ባ፤ ኮይሮታ ባዳ ኔ ኢሻራ ጊጋ፤ ያታ ሲማዳ፥ ኔ ያርሹዋ ፆሳስ ያርሻ።
25 «ኔና ሞቴይሳራ ፒርዳ ኬꬂ ባሼ ኦጌ ቦላ ኢያራ ጊጋ። ሄሲ ኣቶ ጊኮ ኢ ኔና ዳይና ሲንꬂ ኤፋና። ዳይናይ ኔና ቃቼይሳስ ኣꬂ ኢማና፤ ኢ ኔና ዎይኔን ዬጋና። 26 ታ ቱማ ኦዳይስ፤ ኔ ቦላ ፒርዴቲዳ ኣጩዋ ኢሲ ሳንቲሜይ ኣቶና ጪጋ ኦንጋና ጋካናው ቃሾ ኬꬃፌ ኬያካ።
ላይማቴꬃባ
27 «ሃይሳፌ ካሴ፥ ‹ላይማቶፒቴ› ጌቴቶይሳ ሲዒዴታ። + 28 ሺን ታ ሂንቴው ኦዳይስ፥ ማጫስ ፄሊዲ፥ ኣሞቲዳ ኡባይ ባ ዎዛናን ኢራ ላይማቴስ። 29 ኔ ኡሻቻ ኣይፌይ ኔው ናጋራስ ጋሶ ጊዲኮ፥ ኬሳ ሆላ። ኔ ኣሳቴꬃይ ኩሜꬂ ጋናሜ ታማን ዎꬋናፔ ኔ ኣሳቴꬃፌ ኢሶይ ꬋዪኮ ኔው ሎዖ። + 30 ኔ ኡሻቻ ኩሼይ ኔው ናጋራስ ጋሶ ጊዲኮ፥ ኢያ ቃንፃ ሆላ። ኔ ኣሳቴꬃይ ኩሜꬂ ጋናሜ ታማን ዎꬋናፔ ኔ ኣሳቴꬃፌ ኢሶይ ꬋዪኮ፥ ኔው ሎዖ። +
ማቺ ኣዚና ቢሌꬃባ
(ማቶ 19፡9፤ ማር 10፡11-12፤ ሉቃ 16፡18)
31 « ‹ባ ማቺው ዬዲያ ኦኒካ ኣንጆ ዋርቃቲያ ኢሞ› ጌቴቲስ። + 32 ሺን ታ ሂንቴው ኦዳይስ፤ ባ ማቺያ ላይማቶና ዴዒሺን ቢሊያ ኦኒካ ኢያ ላይማታና ሜላ ኦꬄስ። ሄሳዳካ፥ ኣንጄቲዳ ማጫሲው ኤኪያ ኡባይ ላይማቴስ። +
ጫቆባ
33 «ሂንቴ ማይዛታኮ፥ ‹ዎርዶን ጫቆፊቴ፤ ሂንቴ ፆሳ ሲንꬃን ጫቂዳይሳ ፖሊቴ› ጌቴቲዳይሳ ሲዒዴታ። + 34 ሺን ታ ሂንቴው ኦዳይስ፤ ኡባራካ ጫቆፊቴ። ፆሳይ ኡቲያ ኣራታ ጊዲያ ጊሾ ሳሎን ጫቆፊቴ። + 35 ኢያ ቶሆይ ዬꬊያ ሶ ጊዲያ ጊሾ ሳዓንካ ጫቆፊቴ። ጊታ ካዉዋ ካታማ ጊዲያ ጊሾ ዬሩሳላሜንካ ጫቆፊቴ። + 36 ሂንቴ ቢናናፔ ኢሱዋካ ቦꬂ ዎይኮ ካሬꬂ ኦꬃናው ዳንዳዖና ጊሾ ሂንቴ ሂንቴ ሁዔንካ ጫቆፊቴ። 37 ሄሳ ጊሾ፥ ሂንቴ ቃላይ፥ ‹ኤ› ዎይኮ ‹ኣካይ› ጊዶ። ሄሳፌ ካሬ ኬዬይ ፃላሄፔ ዬስ።
ሃሎ ኬያናው ኮሼና
38 « ‹ኣይፌ ጊሾ ኣይፌ፤ ኣቻ ጊሾ ኣቼ› ጌቴቲዳይሳ ሲዒዴታ። + 39 ሺን ታ ሂንቴው ኦዳይስ፤ ሂንቴ ቦላ ኢታባ ኦꬂያ ኡራራ ኤቄቶፊቴ። ኦኒካ ኔ ኡሻቻ ሻካላ ባቂኮ ኔ ሃዲርሳ ሻካላካ ቤሳ። 40 ኢሲ ኣሲ ኔ ሻሚዚያ ኤካናው ኔና ሞቲኮ፥ ኔ ኮቲያ ጉጃዳ ኢማ። 41 ኢሲ ኣሲ ኔና ዎልቃን ባባ ቶሲዲ ኢሲ ሳቴ ኦጌ ባራ ባና ሜላ ኔና ኡንዔꬂኮ፥ ኢያራ ናምዑ ሳቴ ኦጌ ባ። 42 ዎሲያ ኦዴስካ ኢማ፤ ኔፔ ታልዓናው ኮያ ኦናካ ዲጎፋ።
ኔ ሞርኬታ ሲቃ
(ሉቃ 6፡27-28፣ 32-36)
43 « ‹ኔና ዶሴይሳ ዶሳ፤ ኔና ኢፄይሳ ኢፃ› ጌቴቶይሳ ሲዒዴታ። 44 ሺን ታ ሂንቴው ኦዳይስ፤ ሂንቴ ሞርኬታ ዶሲቴ፤ ሂንቴና ቆሄይሳታስ ዎሲቴ። 45 ሄሳꬆ ሂንቴ ኦꬂኮ፥ ሳሎን ዴዒያ ሂንቴ ኣዋስ ሂንቴ ናይታ ጊዳና። ኢ ኢታታሲኔ ሎዖታስ ኣዋ ኬሴስ፤ ፂሎታሲኔ ናጋራንቾታስ ባ ኢራ ቡኪሴስ። 46 ሂንቴና ዶሲያ ኣሳ ፃላላ ሂንቴ ዶሲኮ፥ ሂንቴው ኣይ ዎይቶይ ዴዒ? ሃሪ ኣቶሺን፥ ቃራፃ ቃንፂሴይሳቲካ ሄሳ ኦꬆሶና። 47 ሂንቴ፥ ሂንቴ ኢሻታ ፃላላ ሳሮꬂኮ፥ ሃራታፔ ኣይ ሃራ ኣꬊያባ ኦꬂዴቲ? ሃሪ ኣቶሺን፥ ፆሳ ኣማኖና ኣሳይካ ሄሳ ኦꬆሶና። 48 ሂዛ፥ ሳሎን ዴዒያ ሂንቴ ኣዋይ ፖሎ ጊዶይሳዳ ሂንቴካ ፖሎ ጊዲቴ። +
+ 5:4 ኢሳ 61፡2 + 5:5 ማዝ 37፡11 + 5:6 ኢሳ 55፡1 + 5:8 ማዝ 24፡3 + 5:10 1ጴፂ 3፡14 + 5:11 1ጴፂ 4፡14 + 5:12 2ታሪ 36፡16፤ ሃ.ኦ 7፡52 + 5:13 ማር 9፡50፤ ሉቃ 14፡34-35 + 5:14 ዮሃ 8፡12፤ 9፡5 + 5:15 ማር 4፡21፤ ሉቃ 8፡16፤ 11፡33 + 5:16 1ጴፂ 2፡12 + 5:18 ሉቃ 16፡17 + 5:21 ኬሳ 20፡13፤ ዛሬ 5፡17 + 5:27 ኬሳ 20፡14፤ ዛሬ 5፡18 + 5:29 ማቶ 18፡9፤ ማር 9፡47 + 5:30 ማቶ 18፡8፤ ማር 9፡43 + 5:31 ማቶ 19፡7፤ ማር 10፡4 + 5:32 ማቶ 19፡9፤ ማር 10፡11-12፤ ሉቃ 16፡18፤ 1ቆሮ 7፡10-11 + 5:33 ሌዌ 19፡12፤ ታይ 30፡2፤ ዛሬ 23፡21 + 5:34 ማቶ 23፡22 + 5:35 ኢሳ 66፡1፤ ማዝ 48፡2 + 5:38 ኬሳ 21፡24፤ ሌዌ 24፡20፤ ዛሬ 19፡19 + 5:48 ሌዌ 19፡2፤ ዛሬ 18፡13