10
Ze'egaw Tupàn ikatu haw henoz taw
1 O Tupàn Tuweharupi Wiko Ma'e, màràzàwe tuwe ereiko muite urewi.
Màràzàwe tuwe erezeàmim urewi ma'erahy ipuraraw mehe.
2 — Aiko wera'u amo wanuwi ihe, i'i ikatu 'ym ma'e wà. Uzapo ikatu 'ym ma'e wà, ma'e hereko 'ymar wanupe wà. Wanemu'emaw nuzuawy kwaw miar zuka haw.
Tuwe u'ar wemiapo kwer miar zuka haw zàwenugar pupe wà nehe.
3 Iaiw ma'e uze'egatu wemimutar ikatu 'ym ma'e rehe wà.
— Na'ikàg kwaw a'e, i'i teko amo wanehe imunar ma'e wà, Tupàn Tuweharupi Wiko Ma'e rehe uze'eg pà wà.
Uze'eg zemueteahy hehe wà.
4 Awa ikatu 'ym ma'e nuzekaiw kwaw Tupàn rehe.
— Aiko wera'u amo wanuwi, i'i.
A'e rupi — Tupàn na'ikàg kwaw a'e, i'i uzeupe.
5 Aze awa iaiw ma'e uzapo amo ma'e a'e, ikatuahy hemiapo kwer izupe a'e.
Wiko hemetarer katu ma'e romo. A'e awa nupuner kwaw Tupàn ima'enukwaw paw ikwaw paw rehe a'e.
Uze'eg urywahyahy wàmàtyry'ymar wanehe.
6 — Nazawy pixik kwaw ma'e iapo mehe ihe nehe, i'i uzeupe.
— Nazawaiw pixik kwaw heremiapo ràm ihewe nehe, i'i uzeupe.
7 Izuru tynehem ze'egaiaiw pupe a'e. Temu'emaw pupe tynehem no. Umume'u iaiw ma'e amo pe wemiapo ràm tuweharupi no.
Uze'eg xo iaiw paw rehe zo a'e. Xo ikatu 'ymaw rehe zo uze'eg a'e.
8 Uzeàmim teko waneko haw huwake a'e.
Uwàro a'e pe, teko ikatu 'ym ma'e iapo pixik 'ymar wazuka pà.
9 Nuzawy kwaw zàwàruhu iriàw a'e. Wàro uzeàmimaw pupe.
Ume'e ikàg 'ym ma'e wanehe. Uzeàmim teko wanàro pà wazuka pà.
Wàro ma'erahy ipuraraw par wà.
Na'e upyhyk wemipyhyk ràm miar zuka haw zàwenugar pupe wà. Umutyk heraha a'e wi wà.
10 Uzuhazuhaw wamu'ar kar pà wà. Ikàg wera'u wemipyhyk wi a'e.
A'e rupi weityk wà.
11 Teko ikatu 'ym ma'e uze'eg nezewe uzeupe.
— Tupàn na'ikàg kwaw a'e.
Uzeàpumi a'e. Nuexak kwaw ma'e a'e.
12 Epu'àm nehe, o Tupàn Tuweharupi Wiko Ma'e. Ezepyk a'e teko ikatu 'ym ma'e wanehe nehe.
Nereharaz zo ma'erahy ipuraraw par wanuwi nehe.
13 — Tupàn na'ikàg kwaw a'e, i'i teko ikatu 'ym ma'e.
— Tupàn nuzepyk kwaw herehe a'e nehe, i'i uzeupe. Màràzàwe tuwe uze'eg nezewe uzeupe.
14 Ne, Tupàn, erexak ma'erahy ipuraraw paw ne. Erekwaw teko wazemumikahy haw no.
Nepurupytywà wer wanehe tuweharupi.
Ikàg 'ym ma'e uzeruzar nerehe wà.
Tuweharupi erepytywà ma'e hereko 'ymar ne wà.
15 Hezar, emumaw ikatu 'ym ma'e wakàgaw nehe, iaiw ma'e wapuner haw nehe.
Ezepyk wanehe wanemiapo kwer ikatu 'ym ma'e hekuzaromo nehe.
Xo iapo re wapytu'u re zo epytu'u wanehe nezepyk ire nehe.
16 Tupàn Tuweharupi Wiko Ma'e wiko putar tuwihawete romo tuweharupi nehe.
Omono kar putar uzeruzar 'ym ma'e uiwy wi wà nehe.
17 O Tupàn Tuweharupi Wiko Ma'e. Ereinu putar ma'erahy ipuraraw par ne wà nehe, newe waze'eg mehe ne wà nehe.
Eremukàg kar putar ne wà nehe. Nukyze kwaw wà nehe.
18 Aze ma'erahy ipuraraw har uhapukaz newe wà nehe, erenu putar ne wà nehe.
Aze hemetarer 'ym ma'e uhapukaz newe wà nehe, erenu putar ne wà nehe. — Ikatu ma'e romo peiko, ere putar wanupe nehe.
Nezewe mehe teko a'e wà nehe, amo 'ar mehe umàno ma'e ràm wà nehe,
Numuhàmuhàz pixik kwaw purumukyze kar haw a'e wà nehe.