☰ ABA VATOWO 5
Adama mana bodao adi liliu
5
(Aba Vatowo 5:1—6:8)
Adama ina bodao: Adama ina Nowa
1 E buki ame moe Adamayana ana liliu bukina: Tutayana Yaubada tomota iwodugu, toinina ana tapata nakae iwodugu.† 2 Tomotayadi koroto be vavina iwodugudi. Ikavava, ikaipakuyedi go, ivayokoidi tomota‡ tutayana iwodugudi.†
3 E Adama ana tala ana badabada 130 tutayana natuna koroto ibíbina. Gomanayana tamana Adama ana tapata, e Adamayana nakae. E ivayou Seti. 4 Seti ana bíbina mlina, Adamayana ikaaiyaka tala ana badabada 800 tuwaina. Ego amo talayadi goi natunao koroto be vevina liliudi sibíbina. 5 Tauyana yawoina ana madabokina moe tala ana badabada 930, e ikámasa.
6 E Setiyana ana tala ana badabada 105 tutayana natuna koroto yoina Enosi ibíbina. 7 Enosi ana bíbina mlina Setiyana ikaaiyaka tala ana badabada 807 tuwaina. Ego amo talayadi goi natunao koroto be vevina liliudi sibíbina. 8 Tauyana yawoina ana madabokina moe tala ana badabada 912, e ikámasa.
9 E Enosiyana ana tala ana badabada 90 tutayana natuna koroto yoina Kenani ibíbina. 10 Kenani ana bíbina mlina, Enosiyana ikaaiyaka tala ana badabada 815 tuwaina. Ego amo talayadi goi natunao koroto be vevina liliudi sibíbina. 11 Tauyana ana tala madabokina moe 905, e ikámasa.
12 E Kenaniyana ana tala ana badabada 70 tutayana natuna koroto yoina Malaleli ibíbina. 13 Malaleli ana bíbina mlina, Kenaniyana ikaaiyaka tala ana badabada 840 tuwaina. Ego amo talayadi goi natunao koroto be vevina liliudi sibíbina. 14 Tauyana yawoina ana madabokina moe tala ana badabada 910, e ikámasa.
15 E Malaleliyana ana tala ana badabada 65 tutayana natuna koroto yoina Yeredi ibíbina. 16 Yeredi ana bíbina mlina, Malaleliyana ikaaiyaka tala ana badabada 830 tuwaina. Ego amo talayadi goi natunao koroto be vevina liliudi sibíbina. 17 Tauyana yawoina ana madabokina moe tala ana badabada 895, e ikámasa.
18 E Yerediyana ana tala ana badabada 162 tutayana natuna koroto yoina Enoki‡ ibíbina. 19 Enoki ana bíbina mlina, Yerediyana ikaaiyaka tala ana badabada 800 tuwaina. Ego amo talayadi goi natunao koroto be vevina liliudi sibíbina. 20 Tauyana yawoina ana madabokina moe tala ana badabada 962, e ikámasa.
21 E Enokiyana ana tala ana badabada 65 tutayana natuna koroto yoina Metúsela ibíbina. 22 Metúsela ana bíbina mlina, Enokiyana iiketoiya nakae Yaubada iuyaone tala ana badabada 300. Ego amo talayadi goi natunao koroto be vevina liliudi sibíbina. 23 Tauyana yawoina ana madabokina moe tala ana badabada 365. 24 Ego talayadi goi iiketoiya nakae Yaubada iuyaone namliyeta baige ikabiyamo, tauna geya maisinamo.†
25 E Metuselayana ana tala ana badabada 187 tutayana natuna koroto yoina Lemeki ibíbina. 26 Lemeki ana bíbina mlina, Metuselayana ikaaiyaka tala ana badabada 782 tuwaina. Ego amo talayadi goi natunao koroto be vevina liliudi sibíbina. 27 Tauyana yawoina ana madabokina moe tala ana badabada 969, e ikámasa.
28 E Lemekiyana ana tala ana badabada 182 tutayana natuna koroto ibíbina. 29 Tuwo idigo kana,
‘Nakona ame gomanayana ibíbina gagaina baige isawoilaveda ida paisewa moumouna goi; paisewayana moe poyapoya Yauwe boi ikatubolate pasina.’
Tauna natuna ivayou Nowa.‡ 30 E Nowa ana bíbina mlina Lemekiyana ikaaiyaka tala ana badabada 595 tuwaina. Ego amo talayadi goi natunao koroto be vevina liliudi sibíbina. 31 Tauyana yawoina ana madabokina moe tala ana badabada 777, e ikámasa.
32 E Nowayana ana tala ana badabada 500 mlina natunao koroto Semi, Em be Diyepeta sibíbina.
† 5:1 Abv 1:27-28. ‡ 5:2 Tomota: Isileli tubunao niyadi goi kadi, ‘Adama.’ Adama ana yagoina aiyuwo. Tayamo moe tomota go, tayamo moe koroto yoina Adama. † 5:2 Mad 19:4; Mak 10:6. ‡ 5:18 Enoki: Koroto adi taivasi Buki Kimaasabaina goi yoidi Enoki. (1) Keni natuna (Abv 4:17). (2) Yeredi natuna (Abv 5:18-24). (3) Midiyani natuna (Abv 25:4). (4) Rubeni natuna (Abv 46:9). † 5:24 Ibe 11:5; Yud 1:14. ‡ 5:29 Nowa: Ame youyana Isileli tubunao niyadi goi ana taiyakeka nakae vaita.
☰