1 Iyoni
Iyoni ina leta vakuumgoina
Livala Aba Vaita
Leta ame nakona Sebedi natuna Iyoni igini (Mad 4:21). Ame Iyoniyana moe Yeisu ina tovatotówana tayamo.
Ame letayana nakona tonumisa Epeso goi be nakae asa Epeso kikina goi adi leta. Leta ame igini nakona tala 90 sinaena.
Vatulukwana polapola siisowóduwo tonumisa yaidi goi, e tomota maniyedi Vala Dedevina siisobale.
Iyoni ana masi aiyuwo. Masi tayamo moe latuwona tomota vatulúkwana mooitamoina siyagoidoko. Vatulukwanayana moe Yaubada avatau, Yeisu Guyau avatau be nakae kaga Yaubada Natuna Yeisu goi iguinuwe. Vatulúkwana moitamoinayana Yaubada bogina ikaiwoduwe yaida tutayana Yeisu ietune ima.
Masi aiyuwoina moe matakoi. Iyoni latuwona kita tonumisa Yaubada tamatakoiye be nakae sedao tamatakoiyedi unana ame: Yaubada matakoi unana, e moe Yeisu toinina yawoina goi ivatulukoida, tauna itoboineda Tauyana tavatootowone.
Leta Luluna
1. Yeisu livala yawoida vata manuna 1:1-4
2. Yaubada moe mavada 1:5—2:2
3. Neta Yaubada ina lovina takabikaaonedi, e Tauyana tayagoidoko 2:3-6
4. Lovina vau: Matakoi 2:7-11
5. Iyoni ina leta ana masi 2:12-17
6. Guyau ana Kaleya 2:18-27
7. Yeisu taiyao taspwagógana 2:28—3:24
8. Vatulúkwana kodovaatusidi 4:1-6
9. Sedao tamatakooiyēdi unana Yaubada imatakooiyeda 4:7-21
10. Ida kaba togaga moe ida numisa Yeisu yaina 5:1-5
11. Yaubada ina talavaita Natuna manuna 5:6-12
12. Ida spwagógana Yeisu goi yawoida vata tababane 5:13-21
1
Yeisu livala yawoida vata manuna
1 Tauyana aba vatowo goi go, ima ame tuta
ikaaiyaka bogina kanove be kagite.
Toinima matama toina goi kagite
be nakae nimama goi kabisikone.
Tauyana moe Yeisu Guyau,
Yaubada ina Livala yawoida vata manuna.
2 Livalayana Yaubada ikaiwoduwe,
e matama goi bogina kagite,
kakamooitamoe
be nakae yaimi kataalavaite bego Tauyana yawoida vata unana.
Mainao Tamana taiyao sikaaiyaka go,
bogina ikaiwoduwe yaima.
3 Kaga bogina kagite be kanove yaimi kataalavaite
bego komi nakae kokabivekoveko kai taiyao.
Go kai ima kabivekovekoyana
moe Tamada be Natuna Yeisu Guyau taiyao.
4 Ame livalayadi kaginidi bego kita tauyawana dókana.
Yaubada moe mavada
5 Livala ame Tauyana ilatuuwokoima kanove, e kataalavaite yaimi. Livalayana ame nakae: Yaubada moe mavada go, geya kada giyaiina mamaníwana Tauyana sinaena geya, geya toina.
6 Neta tadigo kada, ‘Yaubada taiyao takabivekoveko’ go, nava mamaníwana goi takaaiyaka, e kita tapola be nakae Yaubada ana Nanamsa Mooitamoina geya taguinuweyeta.
7 Neta kita mavada goi taaketoiya nakae Yaubada mavada goi ikaaiyaka, e kita taiyao takabivekoveko be nakae Natuna Yeisu ikaikaina goi ida goyoinao madabokidi bolotodi yaidi isayoyoida.
8 Neta tadigo kada, ‘Kita geya ida goyomo’, e toinida takatuubauda be nakae Yaubada ana Nanamsa Mooitamoina yaida goi geya ikaiyaketa.
9 Neta ida goyo tatalaseeyanedi Yaubada yaina, e Tauyana aba numisa be tokivavasa tauna ida goyo inuwotaoidi nakae ida guinuwa goyogoyoidi madabokidi bolotodi yaidi goi inikida.
10 Neta tadigo kada, ‘Geya kada tayaamo tuta tagoyo geya’, e amo bobwarayadi goi Yaubada tavayoko topola unana Tauyana kana,
‘Tomota liliudi goyo siguuinuwe.’
Tauna ina livala sinaeda goi geya ikaiyaketa.