16
1 Yeisu tuwaina kana,
‘Moe dogoiyadi bogina alatuwokoimi bego tutayana sisowóduwo yaimi, komi imi numisa goi geya kokapusita.
2 Imi kaba tugúguna goi bei sivatapiyemi kosiya. Go geya vatapiya kaka geya, go sem tuta tamo imamaima be maniyemi sikaumatemi go, idi nuwonúwana bego idi guinuwayana moe idi vininabeso sikasale Yaubada yaina.
3 Moe dogoiyadi bei siguinuwedi yaimi unana yau ma Tamagu geya siyagoimeta, tauna bei siguinuwedi. Nakona moe geya latuwomi konove
4a go, moe dogoiyadi bogina alatuwokoimi bego tutayana sisowóduwo, guna livala konuwokavatedi.’
Baloma Kimaasabaina ina vaita manuna
4b Yeisu tuwaina kana,
‘E akaaiyaka yaimi goi, tauna moe dogoiyadi mainao geya alatuwokoimita.
5 E ame tuta anonoina guna Toetuna yaina goi go, geya vatau tayaamo yaimi goi kulumadadegu kam,
“Nako kunonoina?”
Itoboinemi kouyáwana go, geya kouyaoneta,
6 go sem nuwomou ivakayaodeimi unana moe dogoiyadi bogina alatuwokoimi. Taabu nuwomi imoumōu.
7 Go Yaubada ana Nanamsa Mooitamoina akaiwoduwe yaimi. Moe ami dedevina manuna bego yau akalavemi. Moitamo. Neta geya anoita, Tovapisiyayana geya imaita yaimi. Go neta ana, e yau niga Tovapisiyayana aetune ima yaimi.
8 Tauyana bei ima tomota da poyapoya ikamamaetalidi dogoi aito manudi: Idi goyo manuna, idi kibobwata polapola manuna be adi takínona manuna.
9 Idi goyoyana manuna ikamamaetalidi unana geya sinumiseguta. Tauna idi goyo manuna ikamamaetalidi bego nuwodi isabutukoidi bei situgavila be simekoigu.
10 E idi kibobwata polapola manuna bei ikamamaetalidi unana yau ana Tamagu yaina goi, e geya tuwaina bei kogitegu, tauna bei siyagoi yau tokibóbwata mooitamoina.
11 E adi takinona manuna bei ikamamaetalidi unana Yaubada poyapoya ame ana tolovina itakino, tauna da poyapoya nakae bei itakinoidi toogoyoidi, e adi liuna sibabane.
12 Nava vatulúkwana liliudi sikaaiyaka; bego alatuwokoimi go, ame tuta geya itoboinemita konove.
13 Baloma Kimaasabaina moe Yaubada ana Nanamsa Mooitamoina ana tovagitákwana. Tutayana bei ima nukotomi bei ikatukededi Nanamsa Moitamoinayana liliuna manuna. Moitamo. Balomayana ina bóbwara geya toinina ina nuwonúwana goi geya, go sem kaga neta inove iibobore be ima italavaite yaimi.
14 Guna nuwonúwana bei italavaite yaimi goi. Moeko goi Yaubada ina togaga ana káeyana yaigu ikaaiyaka bei ivagitakoe yaimi.
15 Kaga liliuna neta Tamagu yaina ikaaiyaka, yau nakae yaigu goi ikaaiyaka. Moe pasina kagu,
“Tovapísiya yau guna nuwonúwana bei italavaite yaimi.” ’
16 Tuwaina Yeisu kana,
‘Tuta giyaina goi akalavemi be geya tuwaina ame nakae koogitegu. Ago tuta giyaina tuwaina bei aiyuwoina kogitemneigu.’
17 E ina tovatotowanayao maniyema ametava kabobóbwara kadigo kama,
‘Amo kaga idigedige, kana,
“Tuta giyaina goi akalavemi be geya tuwaina ame nakae kogitegu”?
Nakae kana,
“Tuta giyaina tuwaina bei aiyuwoina kogitemneigu”?
Nakae kana,
“Yau ana Tamagu yaina goi”?’
18 E tuwaina kadi,
‘Amo kaga idigedige kana,
“Tuta giyaina”?
Geya tayagoiyeta kaga idigedige.’
19 Go Yeisuyana bogina iyagoi bego latuwoma kalumadade, tuwo ilatuwokoima idigo kana,
‘Maine kagu,
“Tuta giyaina goi akalavemi be geya tuwaina ame nakae koogitegu. Ago tuta giyaina tuwaina bei aiyuwoina kogitemneigu.”
Moe manuna semiyao taiyao kobobóbwara ae?
20 Kaga alatuuwokoimi moe moitamo go, ame alatuuwokoimi konōve: Bei akalavemi namliyeta da poyapoya bei siuyáwana go, komi kotáiya. Komi bei konuwotúkala go, imi nuwotukalayana bei geya ikaiyakovateta, go sem niga bei imalauyáwana.
21 Moe nakae aba kinana ame: Tutayana vavina iivenátuna, inuwotúkala unana ina tuta bogina ibabane. E tutayana gómana ivenatuni ikavava, ina nuwotukalayana geya inuwokavateyeta unana iuyáwana bego gómana ibíbina poyapoya ame goi.
22 E komi nakae. Ame tuta akalavemi be konuwotúkala go, nava bei aiyuwoina agitemneimi, bei kouyáwana gagaina. Go geya vatau tayaamo itoboine imi uyáwana ivasebukoimi.
23 Amo tutayana goi geya tayaamo kaga manuna bei kolumadadegu. Nakae go, ame alatuuwokoimi konōve: Kaga yoigu goi kokawanoiye Tamagu yaina, bei ivinimi.
24 Boi ima ame tuta geya tayaamo kaga yoigu goi kokawanoiye Tauyana yaina. Ame tuta kokaawanōi, bei ivinimi bego imi uyáwana ivakayaodeimi.’
Yeisu ina tovatotowanayao
bei sisiya go, ina livala goi ikitogagedi
25 Yeisu tuwaina kana,
‘Amo dogoiyadi livalakaibala goi bogina alatuwokoimi. Go tuta imamaima bei ituli. Tutayana ima, geya livalakaibala goi alatuwokoimi geya, go sem Tamagu manuna bei alivala moitamo.
26 Amo tutayana goi bei itoboinemi yoigu goi kokawanoi Tamagu yaina. Ago geya tuwaina akawanoi Tauyana yaina komi manumi.
27 Ame moitamo. Komi komatakoiyegu be nakae konumisegu bego Yau Yaubada goi ama, tauna Tamagu imatakoiyemi.
28 Tauyana yaina goi bogina ama poyapoya ame goi. Go ame tuta poyapoya ame bei akalave, e anonoina Tamaguyana yaina goi.’
29 Kai ina tovatotowanayao kadigo kama,
‘Ake, ame geya livalakaibala goi kubobóbwara geya, go sem im bóbwara imavada.
30 Ame bogina kayagoi bego kaga liliuna kuuyagoi, tuwo tomota idi lumadádana bogina kuyagoiyamo, tauna geya silumadademta. Moeko goi kanumisa bego Yaubada goi kuma.’
31 Yeisu idigo kana,
‘Manakae? Ame tuta konumisa ae?
32 Konōve. Tuta tayamo imamaima go, bogina ima bego komi tamo tamo kokalavegu yau agutava go, kosapa kosiya kona toinimi imi kasa. Ago Tamagu yaigu goi ikaaiyaka, tauna yau aguta geya.
33 Ame dogoiyadi bogina alatuwokoimi bego yau goi tuboina kobabane. Poyapoya ame goi mou bei kobabanedi go, kokatepātu! Ame poyapoyayana ana togaga yau bogina atogagasave.’