☰ 1 PITA 1
1 Pita
Pita ina leta vakuumgoina
Livala Aba Vaita
Leta ame moe Pita ina leta vakuumgoina igini, e Silovano ikavale inave tokatuyaivayao ivinidi (1 Pita 5:12 kugīte). Nakona letayana tala 63 sinaena igini.
Ame tonumisa Pontosi goi, Galetiya goi, Kapadosiya goi, Esiya goi be Bituniya goi sikaaiyaka adi leta (1 Pita 1:1 kugīte). Amo asayadi Roma ina kaba lovina sinaena goi sikaaiyaka. Tonumisa amoko goi nakona Totuyoyowo. Idi numisayana pasina mou siibabane.
Ame letayana moe gedageda manuna. Pita latuwona bego tonumisa Esiya goi siiyagoi gedageda bei siibabane tutayana idi numisa goi sitaoyakavata. Aiyuwoina latuwona bego tonumisayadi siiyagoi manakaedi siiketoiya bego idi ketoiyayana goi Yaubada siwoowoine. Nakona gedageda bei siibabane go, neta sitogaga, adi vaiwówana bei sibabane.
Leta Luluna
1. Leta ana togínina be ana tokatuyaivayao 1:1-2
2. Pita tonumisa atedi ivapatupatudi 1:3—2:10
3. Yaubada ina bodao idi sinapu itoboine Tauyana nakae 2:11—4:11
4. Tonumisa sitogaga adi gedageda goi 4:12—5:11
5. Leta ana masi be Pita ina vaduduwo 5:12-14
Leta ana togínina be ana tokatuyaivayao
1
(1 Pita 1:1-2)
1-2 Komi Yaubada ina kinavayao bogina kosapa kona Pontosi goi, Galetiya goi, Kapadosiya goi, Esiya goi be Bituniya goi kogala ogaoga nakae,
Komi ami kinavayana nakae Yaubada Tamada boi bogina igimilovina. Ami kinavayana ame nakae: Baloma Kimaasabaina ikimasabemi Yaubadayana umana. Go ikinavemi bei Yeisu Guyau kokabikaone be nakae Tauyana ikaikaina goi iseulimi.†
Yau Pita Yeisu Guyau ina vamoléyana tayamo ami leta ame agini iwo.
Yaubada ina kanuwóiya be ina tuboina bei ivaituwedi yaimi goi.
Pita tonumisa atedi ivapatupatudi
(1 Pita 1:3—2:10)
Pita ina yapali
Yaubada yaina goi ada yava manuna
3 Yaubada aba yapali!†a Tauyana ida Tomoya Yeisu Guyau ina Yaubada be nakae Tamana.†b Tauyana mana nuwokapisi gagaina kita bibina vau ivinida Yeisu Guyau ina taoyamna tokámasa yaidi goi pasina, e bei itoboineda talotuta vata. 4 Ida lotutayana moe kaga Yaubada boi bogina ikatootuledi bei ivinida. Dogoiyadi moe geya sidaureta geya, go sem sikaiyako vata. Goyo geya itoboineyeta ikibaibailidi. Nakae geya sisaosáwala geya. Yábana goi Yaubada iyatoidi, imatakaavatedi kita manuda. 5 Yaubada aba numisa,‡ e ina togaga goi ikaliibodeda ada yava manuna; yavayana bogina ikatubayasi be tuta ana kaba lukavava goi ikaiwoduwe. 6 Moe pasina tauyáwana gagaina. Go tuta kaakupina ame tuta goi nakona itoboinemi ami mou liliudi pasidi kokaategeda. 7 Moe mouyadi itoboinedi bego imi numisa ana kamoitamo bei isowóduwo. Goura tagabukone bei tayagoi gourayana moitamo isowóduwo. Ago goura kónana kaavavaina go, ida numisayana dogoi gagaina namliyeta goura. Tauna vakakona yeu nakae goi ida numisa ana kamoitamo isowóduwo. Moeko goi Yeisu Guyau ina sowóduwo goi Yaubada bei iyapaliyeda, ana káeyana tomoeeyalina bei tasiuko be nakae iwowoineda gagaina. 8 Tauyana geya tayaamo tuta boi kogite go, tuwo komataakoiye. Ame tuta nakae geya kogiteyeta go, mami numisa Tauyana yaina be nakae manuna mami uyáwana gagaina koouyáwana nakae neta ana káeyana tomoeeyalina bogina kosiuko! Imi uyawanayana ivakaigaga, tauna geya itoboinemita bóbwara goi kovateteli nakonakae. 9 Imi uyawanayana unana imi numisa keuwoina bei kobabane; keuwoinayana moe ami yava.
10 Moe yavayana manuna Yaubada ina tokabivalavalayao boi ami kanuwóiya sigimitaalavaite silumadadana dókana be nakae sinuwonúwana gagaina. 11 Tokabivalavalayadi atedi goi boi Guyau Balomaina ikaaiyaka igimitalavaita yaidi Guyauyana manakaena ina gedageda bei ilotowoidi go, namliyeta Yaubada ina togaga ana káeyana ivagitakoedi Tauyana yaina.‡ Ago tokabivalavalayadi silumadádana, latuwodi bego siyagoi ava tuta dogoiyadi bei sisowóduwo o ava kaba kinana goi itoboinedi siyagoi dogoiyadi bei sisowóduwo. 12 Tauyadi yaidi Yaubada ikaiwoduwe bego livala sitalavaaitedi geya toinidi adi dedevina manuna geya, go sem komi ami dedevina manuna. E Yaubada Balomaina Kimaasabaina bogina ietune ima Vala Dedevina ana totalavaitayao nukotodi isanayatoidi, e ame tuta livalayadi sitalavaaitedi yaimi. Livalayadi nakona anerose latuwodi toina bego siyagoidokoidi.
Tonumisa idi sinapu goi
kimaasabaidi Yaubada umana
13 Tauna nuwomi kokatubaayasīdi nakae neta paisewa manuna kopaiwa be toinimi kokabikuunuīmi. Ikavava, Yaubada ina kanuwóiya kolotutaedōko. Anuwoiyayana Yeisu Guyau ina sowóduwo goi bei kobabane. 14 Komi Yaubada natunao, tauna kokabiikaōne. Ame nakae: Taabu imi yalagau nuwomi ikoobalēdi nakae boi tutayana nava Yaubada kotamogeemogeye, 15 go sem Yaubada ada Toduduwo kimaasabaina, e komi nakae itoboinemi imi sinapu madabokina goi kimaasabaimi Tauyana umana. 16 Moitamo. Gínina Kimaasabaina goi idigo kana,
 
‘Yau kimaasabaigu umami, tauna komi itoboinemi kimaasabaimi yau umagu.’†
Vininabeso 11:44-45
 
17 Yaubada kita tomota tamo tamo ida guinuwa goi itakinovaavaseda. Ame Yaubadayana kovaatamane, tauna komi ogaoga imi tuta ameko poyapoya goi nakae mami matoita wowooinina Tauyana yaina kooketōiya. 18 Moe nakae itoboine unana bogina kooyagoi bego boi yawoimi ana kenao geya basabasainamo tubudao goi ima, e kenaoyana yaina goi Yaubada itateteda. Go geya kada esaesa nakae siriba o goura kaavavaidi goi itateteda geya, 19 go sem Guyau ikaikaina kaakesaina goi itateteda. Ikaikayana moe lami ikaikaina nakae, geya ana pikwanamo be geya ana bailamo. 20 Yeisuyana kina Yaubada igimikinave namliyeta poyapoya ame imadagi go, ame tuta, tuta ana kaba lukavava goi, bogina isowóduwo kita ada dedevina manuna. 21 Yeisu goi kita Yaubada ana tonumisao. Tauyana Yeisu tokámasa yaidi goi ikaitáoe namliyeta ana káeyana tomoeeyalina goi ivaisiu, tauna Yaubada taanumise be nakae talootutae.
22 Yawoimi bogina kokimasabedi imi kabikáwana Yaubada ana Nanamsa Mooitamoina‡ yaina goi bego itoboinemi matakoi mooitamoina goi semiyao nuumisaidi komatakooiyedi. Tauna tuta liliuna atemi maavadaina goi semiyaoyadi komatakooiyēdi 23 unana bogina kobibinamna go, geya kada sakava bibinina goi geya. Moe bei ikámasa, tauna moe nakae geya, go sem dogoi geya ikamaseta goi. Dogoiyana moe Yaubada ina livala maa yawoina be aiyako vaatayaina goi. 24 Moitamo. Gínina Kimaasabaina nakae idige kana,
 
‘Sakava liliuna náuna nakae,
e ana nuwoguyau madabokina
moe naunayadi keuboidi adi yapali nakae.
E naunayadi simémala
be nakae keuboidiyadi simémala sisou go,
25 Yauwe ina livala, moe ikaiyako vata.’
Aiseya 40:6-8
 
E ame livalayana moe Vala Dedevina bogina konove.
† 1:1-2 Tat 24:3-8. †a 1:3 Luk 1:68; Rom 1:25, 9:5; 2Ko 1:3, 11:31; Epe 1:3. †b 1:3 Rom 15:6; 2Ko 1:3, 11:31; Epe 1:3,17. ‡ 1:5 Yaubada aba numisa: Ame itoboine nakae takaigavile kada, ‘Yaubada mana togaga ikaliibodeda ida numisa goi.’ ‡ 1:11 Yaubada ina togaga ana káeyana ivagitakoedi Tauyana yaina: Ame nakona Yeisu ina taoyamna, ina tuko ina Yaubada yaina be nakae ana wowoina Yaubada goi ibabane. † 1:16 Vin 19:2, 20:7. ‡ 1:22 Yaubada ana Nanamsa mooitamoina: Enao aito sikaaiyaka ame ana kaigavila manuna. Tayamo mae nakae. Aiyuwoina itoboineda takaigavile kada, ‘Vatulúkwana mooitamoina Yaubada goi ima’ o kada, ‘Vatulúkwana mooitamoina Yeisu manuna.’
☰