2 Pita
Pita ina leta aiyuwoina
Livala Aba Vaita
Leta ame Yeisu ina vamoléyana yoina Pita igini. Go ame letayana Pita ina leta aiyuwoina. Nakona Pita Roma goi ikaaiyaka tutayana leta ame igini go, geya tayagoiyeta. Aiyuwoina, geya tayagoiyeta ava tuta igini. Nakona tala 64 ina 68 go, nauyayanaidi goi igini o nakona tala 80 sinaena goi igini.
Geya tayagoiyeta letayana avatauwa adi leta; Pita geya ilatuwokoideta. Aiyuwoina geya tayaamo asa yoina igini bego itoboineda tayagoi ava kasa goi leta ana tokatuyaivayao sikaaiyaka. Nakona tokatuyaivayadi moe nakae 1 Pita ana tokatuyaivayao. 2 Pita 3:1 goi Pita ilatuwokoida leta aiyuwoina ana tokatuyaivayao be nakae ina leta vakuumgoina ana tokatuyaivayao sivavasa.
Vatulúkwana gagaina leta ame goi moe Yeisu ana tonumisayao idi sinapu manuna. Aiyuwoina ivatétala tovatulukwana polapola manudi. Aitonina ivatétala Yeisu ina kaluvilamna manuna.
Leta Luluna
1. Leta ana togínina be ana tokatuyaivayao 1:1-2
2. Vatulúkwana tonumisa idi sinapu manuna 1:3-21
3. Vatulúkwana tovatulukwana polapola manudi 2:1-22
4. Vatulúkwana Yauwe ina Maliyalina manuna 3:1-16
5. Pita ina vaduduwo 3:17-18
1
Leta ana togínina be ana tokatuyaivayao
1 Segowo,
Yau Saimoni Pita, Yeisu Guyau ina pákwana nakae ina vamoléyana, ami leta ame agini aetune iwo yaimi. Komi tauyami numisa kai ima numisa nakae bogina kouyaone Yeisu Guyau, Tauyana ida Yaubada be ada Toyava, ina kivavasa goi. Moe numisayana komi be kai sowoda.
2 Yaubada be ida Tomoya Yeisu adi yagoina goi Yaubadayana ina kanuwóiya be ina tuboina bei ivaituwedi yaimi.
Vatulúkwana tonumisa idi sinapu manuna
3 Yaubada ina togaga bogina ivinida kaga liliuna yawoida manuna be nakae yábana sinapuna manuna. Tauyana toinina ina togaga ana káeyana ana vagitákwana goi be nakae aderina dedevina goi iduduweda.
4 Ame dogoiyadi goi ina katótula sowoda be dedevidi toidi ivinida bego atotulayadi goi kita itoboineda Tauyana aderina tasiuko unana aigóyava poyapoya ame goi ikaaiyaka goyo ana yalagau pasina go, bogina tasiyae.
5 E moe pasina tauna mami valitulítuwo aderimi dedevina kovaaitūwe imi numisa goi. E aderimiyana goi nanamsa kovaaitūwe.
6 E imi nanamsayana goi toinimi imi kabikúnuwo kovaaitūwe. E imi kabikunuwoyana goi imi mesayágana kovaaitūwe. E imi aramaitanayana goi yábana sinapuna kovaaitūwe.
7 E yábana sinapuna goi sedao nuumisaidi adi matakoi kovaaitūwe. E amo matakoiyana goi tomota liliudi adi matakoi kovaaitūwe.
8 Neta moe sinapuyadi yaimi goi sikaaiyaka nakae sibibíbina, e sivaitemi bei komi ma basabasaimi be nakae ma keuwoimi. Moeko goi imavada bego ida Tomoya Yeisu Guyau moitamo bogina kooyagoi.
9 Ame moitamo. Avatauwa neta sinapuyadi yaidi goi geya, adi kaigigita matadi igawúwula nakae o kada, ‘Matadi ikebo toina.’ Moe unana boi idi goyo adi kimavada bogina sinuwoilave.
10 Tauna segowo, taabu imi sinapu nakae, go sem kopooisōgana bego imi sinapu dedevina bei koyagoidoko bego Yaubada iduduwemi o tadigo kada, ‘Ikinavemi.’ Neta mae sinapuyadi dedevidi koguuinuwedi, imi numisa goi geya kookapusi, geya toina.
11 Neta moe nakae, e Yeisu Guyau, Tauyana ida Tomoya nakae ada Toyava, bei itagonedokoimi ina kalibúbuna vaatayaina goi kosiu.
12 Tauna moitamo mae vatulukwanayadi bogina koyaagoidi be nakae Yaubada ana Nanamsa Mooitamoina yatana bogina kotaaoya dókana go, tuwo bokoyo itoboinegu tuta liliuna vatulukwanayadi manudi bei akavilevilemi.
13 E guna nuwonúwana tutayana nava maa wowogu akaaiyaka go, itoboinegu guna vilinayadi goi awoinimi.
14 Unana aayagoi giyakainava wowoguyana bei akalave nakae ida Tomoya Yeisu Guyau bogina ivatulukoigu.
15 E tuwo bei apoisógana bego guna kalovayana mlina nakae leta ame goi vatulukwanayadi tuta liliuna aavilidi yaimi.
16 Itoboinemi vatulukwanayadi konuwaaisidi. Bogina koyagoi. Boi ida Tomoya Yeisu Guyau ina togaga be ina sowóduwo katalavaitedi yaimi go, ima talavaitayana goi geya tonuwosinapu idi vatuta kasabokuuliyedi geya, go sem kai toinima matapoinima kagite Tauyana Toolagaina.
17 Boi Tamana Yaubada wowoina be taimámina ivini tutayana níyana tayamo Tauyana ana káeyana tomoeeyalina goi kanove idigo kana,
‘Ame Tauyana Natugu, guna kakaya, auyaaonedoko.’
18 Niyanayana yábana goi ima, e kai toinima taiyama goi kanove. Neta konuwaisi boi kai Guyau taiyao koya kimaasabaina goi kakaaiyaka.
19 Nakae kagite, tauna Yaubada ina tokabivalavala idi livala kakamoitamoedi. Livalayadi rampa nakae neta mamaníwana goi inínima, e itoboine konuwokavatedi be koyagoidi nako vatulúkwana dedevina, nako igoyo. E itoboinemi livalayadi konuwokavatedi ana kadókana Yeisu ikaluvilamna ima nakae tomo ana sipasipa iliyabale atemi goi kubona ituko, e inínima.
20 Ame koyagoidōko: Tutayana tokabivalavala ina livala Gínina Kimaasabaina goi takatuyaivi, geya vatau tayaamo itoboine toinina ina nuwonúwana goi italigei.
21 Moe moitamo. Tokabivalavala idi livalayadi geya tomota idi nuwonúwana goi sima geya, go sem Baloma Kimaasabaina nukotodi isanayatoidi, e Yaubada ina livala sitalavaite. Tauna itoboine Balomayana ivaiteda bei tayagoi.