☰ NUWOGAU 5
5
Aba kaipaki ainima aiyuwo
(Nuwogau 5:1—8:1)
Lami mana lovina buki bilibilina ikimalelei
1 Tolovina kebana esaaesaina goi itulagalaga go, nimakakataina goi agite buki bilibilina ikaaiyaka.† Bukiyana dadava yuwoyuwo giinidi sikaaiyaka go, bukiyana goi aba kaipaki ainima aiyuwo sipakidi. 2 Anerose toogagaina nakae agite, tauyana niyana gagaina goi italavaita kana,
‘Avatau mana lovina bei itoboine buki ame ana kaba kaipaki ikitakidi be ikimalelei?’
3 Yábana goi, poyapoya goi be tokámasa idi kasa goi geya vatau tayaamo mana lovina itoboine bukiyana ikimalelei be nakae sinaena igite. 4 Tuwo atáiya gagaina unana geya vatau tayaamo mana lovina itoboine bukiyana ikimalelei be nakae igite kaga sinaena ikaaiyaka, tauna atáiya. 5 Ataitáiya go, tomoyamoyayadi yaidi goi tayamo ilatuwokoigu idigo kana,
‘Taabu kutaitāiya. Kunōve! Devida tubuna†a Toolagaina sivayoko laiyoni. Tauyana ma Yuda†b boi ina kaleyayao itogagasavedi, tauna mana lovina itoboine bukiyana ana kaba kaipaki ikitakidi, ikimalelei bei sinaena igite kaga ikaaiyaka.’
6 Tolovina kebana esaaesaina kikina goi go, dogoiyadi maa yawoidi adi taivasi be nakae tomoyamoya nauyayanaidi goi Lami tayamo agite iitaoya. Lamiyana ana kaigigita nakae boi sikaumate.†a Ana sakusaku adi badabada moe ainima aiyuwo be nakae matana adi badabada moe ainima aiyuwo.†b Matanayadi moe Yaubada Balomainao ainima aiyuwo bogina ietunedi sina poyapoya ana madabokina goi. 7 Tolovinayana kebana esaaesaina goi itulagalaga go, iya Lami ibala ima bukiyana Tolovina nimakakataina goi ikabi.
8 Tutayana ikabi, dogoiyadi adi taivasi maa yawoidi be nakae tomoyamoyayadi 24 sikanakabobo Lamiyana matana goi sisakululu. Tomoyamoyayadi tamo tamo madi api be nakae madi insensi ma nokoidi goura. Insensiyadi moe Yaubada ina kimasabayao idi kawanoi.† 9-10 Sisaakululu go, vesi vau sivesiye†a kadi,
 
‘Boi kom bogina sikaumatem
be nakae ikaikaim goi tomota kutakonedi
Yaubada manuna.
Tomotayadi moe dala liliudi, aníyana liliudi,
boda liliudi be nakae kantri liliudi yaidi goi†b
kulamgogoidi sieboda tayamo.
Nakae kuguinuwe bei kidi Yaubada ina bodayauwo
ina kalibúbuna goi sikaaiyaka
be nakae kidi Yaubada ina togudalayao.
Tuwo poyapoya goi bei sikalibúbuna.
Tauna kom mam lovina itoboinem bukiyana kwabi
be ana kaba kaipaki kukitakidi.’†c
 
11 Sivesi ikavava, akandobala anerose badabadaaidi niyadi anovedi. Adi badabada aivina tausani nakae; geya itoboineguta akatuyaividi.† Aneroseyadi agitedi Tolovina kebanayana, dogoiyadi maa yawoidi be nakae tomoyamoyayadi sitaoyaakobudi go, anovedi, 12 niyadi gagaina goi sivesivesi kadi,
 
‘Lamiyana boi bogina sikaumate
itoboine togaga, esaesa, nanamsa, alika,
wowoina, taimámina be nakae auyagu ibaabanedi!’
 
13 Sivesi ikavava, madágina liliudi yábana goi, poyapoya goi, tokámasa idi kasa goi be négwasa goi anovedi sivesivesi kadi,
 
‘Tauyana kébana esaaesaina goi itulagalaga
be nakae Lamiyana
aba kauyagu, aba wowoina, aba taimámina be aba kalika
ame tuta be nakae tuta simamaima!’
 
14 Sivesi ikavava, dogoiyadi maa yawoidi adi taivasi sidigo kadi,
‘U nakae.’
Kidi go tomoyamoyayadi aedi sivatugúyala sisakululu.
† 5:1 Isi 2:9-10; Ais 29:11. †a 5:5 Ais 11:1,10. †b 5:5 Abv 49:9. †a 5:6 Ais 53:7. †b 5:6 Sak 4:10. † 5:8 Sam 141:2. †a 5:9-10 Sam 33:3, 98:1; Ais 42:10. †b 5:9-10 Nuw 7:9, 11:9, 13:7, 14:6, 17:15. †c 5:9-10 Tat 19:6; 1Pi 2:9; Nuw 1:6. † 5:11 Dan 7:10.
☰