37
1 A LOHE o Hezekia, ke alii, haehae iho la oia i kona lole, a uhi iho la ia ia iho i ke kapa ino, a komo aku la iloko o ka hale o Iehova.
2 A hoouna ae la oia ia Eliakima, i ka mea maluna o ko ka hale, a me Sebena, i ke kakauolelo, a me na luna o na kahuna me ka uhiia i ke kapa ino, io Isaia la, i ke kaula, i ke keiki a Amosa.
3 I ae la lakou ia ia, Ke i mai nei o Hezekia penei, He la popilikia keia, he la no ka hoopai ana, a me ka olelo hoino; no ka mea, ua hiki na keiki i ke kokoke hemo, aole nae he ikaika e hanau ai.
4 Malia paha e lohe o Iehova, kou Akua, i na olelo a Rabesake, ka mea a ke alii o Asuria, a kona haku i hoouna'i e hoino ai i ke Akua ola, a e hoopai hoi i na olelo a Iehova a kou Akua i lohe ai. Nolaila, e pule aku oe no ke koena o na kanaka i ikeia.
5 A hiki ae la na kauwa a ke alii, a Hezekia io Isaia la.
6 I mai la o Isaia ia lakou, Penei oukou e olelo aku ai i ko oukou haku, Ke olelo mai nei o Iehova penei. Mai makau oe i na olelo au i lohe ai, i na olelo a na kauwa a ke alii o Asuria i olelo hoino mai ai ia'u.
7 Aia hoi, e haawi aku no au ia ia i manao, a e lohe no oia i ka lono, a e hoi aku i kona aina iho: a na'u no ia e hookulai i ka pahikaua ma kona aina iho.
8 Hoi aku la o Rabesake, a loaa ia ia ke alii o Asuria, e kaua ana ia Libena; ua lohe mua no hoi oia, ua haalele ia ia Lakisa.
9 Alaila, lohe ae la oia ia Tirehaka, i ke alii o Aitiopa, i ka i ana mai, Ke hele mai nei ia e kana ia oe. A i kona lohe ana, hoouna mai la ia i mau elele ia Hezekia, i mai la,
10 Penei oukou e olelo aku ai ia Hezekia, i ke alii o ka Iuda, e i aku, Mai walewale oe i kou Akua au e hilinai nei, i kana olelo ana, Aole e haawiia o Ierusalema iloko o ka lima o ke alii o Asuria.
11 Aia hoi, ua lohe no oe i ka mea a na alii o Asuria i hana'i i na aina a pau, i ka luku loa ana ia lakou; a e hoopakeleia anei oe?
12 Ua hoopakele anei na'kua o na aina i ka poe a ko'u mau makuakane i luku ai; ia Gozana, a me Harana, a me Rezepa, a me na keiki a Edena, ka poe ma Telasara?
13 Auhea ke alii o Hamata, a me ke alii o Arepada, a me ke alii o ke kulanakauhale o Separevaima, a me Hena, a me Iva?
14 Loaa ia Hezekia ia mau palapala ma ka lima o na elele, a heluhelu iho la. Pii aku la o Hezekia i ka hale o Iehova, a haalii aku la imua o Iehova.
15 Pule aku la o Hezekia ia Iehova, i aku la,
16 E Iehova o na kaua, e ke Akua o ka Iseraela, ka mea noho ma na kerubima, o oe no ke Akua, o oe wale no, no na aupuni a pau o ka honua; nau no i hana i ka lani, a me ka honua.
17 E haliu mai kou pepeiao, e Iehova, a e hoolohe mai hoi; E wehe oe i kou mau maka, e Iehova, a e naua mai; e hoolohe hoi i na olelo a pau a Sanekariba, na mea ana i hoouka mai ai e hoino i ke Akua ola.
18 He oiaio, e Iehova, ua luku aku no na'lii o Asuria i na lahuikanaka a pau, a me ko lakou aina;
19 A ua kiola aku no i ko lakou akua iloko o ke ahi, no ka mea, he mau akua ole lakou, he hana na na lima o kanaka, he laau, a he pohaku; nolaila lakou i luku aku ai ia mau mea.
20 Ano la, e Iehova ko makou Akua, e hoola mai oe ia makou mai kona lima ae, i ike na aupuni a pau o ka honua, o oe no o Iehova, o oe wale no.
21 Alaila, hoouna ae la o Isaia, ke keiki a Amosa io Hezekia la, i ae la, Ke i mai nei o Iehova. ke A kua o ka Iseraela penei, No kau pule ana mai ia'u no Sanekariba, ke alii o Asuria;
22 Eia ka olelo a Iehova i olelo mai ai nona;
Ua hoowahawaha ke kaikamahine puupaa o Ziona ia oe,
Ua henehene aku ia oe;
O ke kaikamahine hoi o Ierusalema,
Ua luliluli oia i kona poo ia oe.
23 Owai kou mea i hoowahawaha ai,
A olelo hoino aku ai no hoi?
Ua hookiekie oe i kou leo maluna owai,
A alawa hoi i kou mau maka iluna lilo,
Maluna no o ka Mea Hoano o ka Iseraela?
24 Ua hoowahawaha oe i ka Haku ma kau mau kauwa, i ka i ana mai,
No ka lehulehu o na kaakaua o'u,
Ua pii aku no wau i kahi kiekie o na mauna,
I na aoao hoi o Lebanona;
E kua aku no wau i kolaila mau laau kedera kiekie,
A me kolaila mau laau kaa maikai;
A e komo aku no wau i kona wahi kiekie,
A i ka welau o kahi nahelehele o kona mahinaai.
25 Ua kohi no wau a ua inu hoi i ka wai;
A i ke kapuwai o ko'u mau wawae, ua hoomaloo aku no wau i na auwai o Aigupita.
26 Aole anei oe i lohe kahiko na'u ia i manao,
A na'u hoi ia i hana i na la mamua?
A i keia manawa, ua hooko no wau,
I lilo oe i mea e hookahuli ai i na kulanakauhale paa i ka pa, i puu pohaku.
27 Nolaila i uuku ai ka ikaika o ka poe e noho ana,
Ua makau hoi lakou a pilihua.
Like no lakou me ka mauu o ke kula,
Ua like hoi me ka nahele uliuli;
Me ka mauu maluna o na hale,
Me ka hua palaoa malili i kona wa e ku ana.
28 Aka, ua ike no wau i kou noho ana,
A me kou puka ana iwaho, a me kou komo ana iloko, a me kou ukiuki ana ia'u.
29 No ka mea, o kou ukiuki mai ia'u, a me kou hookiekie,
Ua pii mai no, a iloko o ko'u mau pepeiao;
Nolaila, e hookomo no wau i ko'u lou iloko o kou ihu,
A me ko'u kaulawaha ma kou mau lehelehe.
A e hoohuli aku no au ia oe ma ke ala au i hele mai ai.
30 E lilo no hoi keia i hoailona nou;
E ai no oukou i keia makahiki i na mea ulu wale,
A i ka lua o ka makahiki, i na mea i ulu ae mai ia mau mea mai:
A i ke kolu o ka makahiki, e lulu hua oukou, a e hoiliili hua hoi,
E kanu no hoi oukou i na pawaina, a e ai iho i kolaila hua.
31 A o ke koena i pakele o ka hale o ka Iuda,
E komo no kona aa ilalo,
A e hua mai i ka hua maluna.
32 No ka mea, mai loko aku o Ierusalema e puka aku ke koena,
A o ka poe pakele hoi, mai loko aku o ka mauna Ziona:
Na ka ikaika o Iehova o na kaua e hana i keia,
33 Nolaila, ke olelo mai nei o Iehova no ke alii o Asuria,
Aole ia e komo iloko o keia kulanakauhale,
Aole ia e pana mai i kekahi pua malaila,
Aole hoi e hoike i na palekaua imua ona,
Aole hoi e hana i puukaua ma kona alo.
34 Ma ke ala ana i hele mai ai, malaila no ia e hoi aku,
Aole ia e komo iloko o keia kulanakauhale, wahi a Iehova.
35 Na'u no e malama i keia kulanakauhale, e hoola aku no'u iho,
A no ka'u kauwa, no Davida.
36 Hele ae la ka anela o Iehova, a laku aku la maloko o kahi hoomoana o ko Asuria, hookahi haneri me kanawalu kumamalima tausani. A ala ae la lakou i kakahiaka nui, aia hoi! he poe kupapau make lakou a pau.
37 Alaila, hele aku la o Sanekariba, ke alii o Asura, a haalele ae la ia wahi, a hoi aku la, a noho iho la ma Nineva.
38 A i kona hoomana ana maloko o ka hale o Niseroka, o kona akua, alaila, pepehi iho la kana mau keikikane, o Aderameleka a me Sarezera ia ia i ka pahikaua; a pakele aku la laua maloko o ka aina o Ararata, a noho alii iho la kana keiki, o Esarehadona ma kona wahi.