19
Atuil Farisi las nuting lalan, le kiu nahu Lamtua Yesus deng in sapa-dai
(Markus 10:1-12)
1 Yesus tui-tek hidi nas totoang kon, Un nang Galilea le lako propinsi Yudea, ne palun Yordan halin nua.
2 Atuil hut mamo kas muid Una, kon nam Un tao banan atuil in ili ngas se luas.
3 Muik atuil Farisi at ila lo, kon maas aa le noan kiu nahu Una. Oen keket Un noan, “Muid kit atorang agama lia lam, eta biklobe li saap son kon, un bisa dai sapa ka nini lalan saa tuun, tam elola la?”
4 Mo Un situs noan, “Mi niam atuil in taan deng agama la isi. Mo tasao le mi taan Ama Lamtua Allah Buk Niu ka isin na lo kia? Ta dulan ne Dehet Hmunan Hesa ka noan, ‘Ama Lamtua Allah koet atuli li, biklobe nol bihata.’
5 Nol muik in dula kon noan,
‘Undeng na, tiata biklobe li musti nang un ina-aman nas,
le lako nuli koo-dalen mes nol un sapa ka,
lole oen duas daid mes son.’
6 Undeng na, eta Ama Lamtua Allah esa man tapas duas le daid mes son nam, atuli li boel tao bakisan deken!”
7 Ming Yesus tek ela kon, atuil Farisi las keket pait noan, “Eta ela lam, tasao le upung Musa tek noan, biklobe li boel dai un sapa ka, sadi un belen surat in dai muna le lia?”
8 Kon Yesus siut pait noan, “Upung Musa nang mi upu kia-kaon nas le dai oen sapa-bihatan nas, undeng oen bon baut banansila el mi kon! Mo dedeng Ama Lamtua Allah in koet apan-kloma kia ka, Un in koma ka ela lo.
9 Tiata Auk tek mia le! Eta sapa-bihatan na nong muna kam, biklobe li bisa dai una. Mo eta sapa-bihata li nong lo, mo un sapa-bikloben na dai soleng una, hidim lako saap pait nol bihaat didang ngam, un nong son na!”
10 Ming Un in aa ela ka kon, Un ima-ii las tek noan, “Eta ela lam, banan dui ka saap deken tia.”
11 Kon Yesus siut noan, “Totoang atuli li sium nal asa man mi in aa na lo. Suma atuil man in haup kuat-tes deng Ama Lamtua le tahang nala ngas siis.
12 Ta muik atuli deeh saap lo, undeng huas maa lu oen ela son. Tenga las saap lo, undeng atuil didang in tao. Nol tenga las pait, huil le saap lo, undeng oen suma le lako-daek Ama Lamtua Allah osa la tukun. Asii nangan taan Auk in tuing nias sam, nang le un tao muid ela.”
Lamtua Yesus aa le bel hangun se tana-anang blutu kas
(Markus 10:13-16; Lukas 18:15-17)
13 Dedeng na, atuli las kok nol oen anan nas laok bel Yesus, halin nam Un nene ima ka se one, le beles hangun. Mo Un ima-ii las kaing atuli las.
14 Kon Yesus ahan Un ima-ii las noan, “Nang le tana-anang ngas maas se Au lia! Kaing oen deken! Ta atuil in banansila el tana-ana man in nahlae tutungus se oen ina-aman nas, nol nikit-nikit taan apan lo ngas, man daid Ama Lamtua Allah atulin.”
15 Hidim Un nene ima ka laok se tana-anang ngas, le nodan Ama Lamtua Allah beles hangun. Hidi na kon, Un bok lako deng maan na.
Atuil in muki nuting lalan le nuli napiut nol Ama Lamtua Allah
(Markus 10:17-31; Lukas 18:18-30)
16 Hidim oe mesan na, muik atuli maa ketan Yesus noan, “Paap Guru! Auk musti tao dais banan elol le halin auk taan baktetebes noan, auk haup in tamang sorga nga? Ta auk le nuling leo-leo nol Ama Lamtua Allah tutungus.”
17 Kon Yesus situn noan, “Tasao le ku keket Auk dais man in banan ela lia? Suma Ama Lamtua Allah sii man banan. Etan ku le nuil nol Una lam, ku musti nuil muid Un prenta las.”
18 Atuling na ketan pait noan, “Prenta man ola la?”
Kon Yesus situn noan,
“Keo tele atuil deken;
laok kula nol atuli-bihaat deken;
naok deken;
daid saksi in nole-lilung deken;
19 todan ku ina-amam mas;
nol namnau ku pail-kakam mas banansila el ku in namnau ku apam ma esa ka.”
20 Atuling na siut noan, “Prenta nas totoang, auk daek mudis son. Asa man dabun pait ta?”
21 Ming ela kon Yesus tek noan, “Elam, eta ku le muid Ama Lamtua in koma ngas totoang ngam, pait le laok hee nuli ku hmuki-nalan nas totoang. Hidim laok bating un duit ta, bel atuil kasiang ngas. Halas-sam ku pait maa le muid Au. Ta mam Ama Lamtua Allah bel seda ku hmuki-nala mamo-mamo se sorga.”
22 Ming ela kon, atuling na pait nol dalen ili, undeng un muik isi.
23 Hidi kon Yesus aa nol Un ima-ii las noan, “Parsai Auk in aa nia, ta atuil in muki ki sus isi in tama sorga.
24 Un in susa ka, banansila el hmukit unta tene mesa, man tama lako un okat ta muid laung bolo.”
25 Ming ela kon, Un ima-ii las herang-herang. Kon oen siut noan, “Eta ela lam, asii man haup in tama sorga ka?”
26 Un ngat oen babanan hidim Un tekas noan, “Eta muid atuli lia lam, meman bisa lo. Molam muid Ama Lamtua Allah lam, totoang nas bisa dadi!”
27 Kon Petrus ketan noan, “Papa! Kaim nang soleng kaim hmuki-nalan nas totoang son, le muid Papa. Mo kaim haup asa la?”
28 Un siut noan, “Parsai se Au! Mam eta Ama Lamtua Allah koet totoang le daid balu son nam, Au, Atuling Baktetebes nia, daad se del in loe-liliman na dapa. Lius dedeng na lam, mi in muid Au ngias kon, daad se del in prenta hngul dua dapas, le daid atuil in nutus dasi, bel ngaal Israel las hngul duas!
29 Atuil in laok nang soleng un uma la, pail-kakan nas, ina-aman nas, ana-anan nas, nol un klapa la, le muid Au ka, mam un sium seda pait didiin lalis ngatus. Hidim eta apan-kloma ki kiamat tam, un kon haup in nuli napiut nol Ama Lamtua didiin hidi nutus lo.
30 Tiata nangan ne! Muid Ama Lamtua Allah in nangan na lam, atuil man in tao apa ka el atuil tene ka, un nam atuil ana dui. Molam atuil man in tao apa ka deng dadale ka, un nam atuil man in tene dui.”