22
Lamtua Yesus bel kleta deng atuil in dai maa muid fesat in sapa lo ngas
(Lukas 14:15-24)
Hidim Yesus aa nol oen pait nini kleta noan, “Ama Lamtua Allah in kil bandu ka, banansila el lahi mesa, man tao fesat in sapa bel un ana biklobe la. Mana hidi fesat ta kon, un tadu un ata kas le laok tek atuil in haup haep pas noan, ‘Maa tia, ta fesat tu mulai son.’ Mo atuil nas dai laok muid fesat ta lo.
Kon nam, ata kas pait le laok tek lahing nga. Ming ela kon lahing nga tadu un ata tenga las noan, ‘Mi laok tek atuil nas le maa tia, ta mana hidi fesat ti son. Auk keo aus-sapi, nol hosa-nakin hidi in kaa faal banan sii son. Ta tadus maa le kaa se fesat tia, ta totoang mana hidis son.’ Ata kas laok tek atuli las ela. Mo atuil in haup haep pas tao hii lo. Tenga las lakos klapas, tenga las pait lakos oen maan in dake ngas, mo tenga las daek lahing nga ata kas, le diku-puang didiin mates.
Ming ela kon, lahing nga koon-mali isi. Tiata un lok un tentara las, le laok keo tele atuil man in keo un ata kas son nas. Hidim tentara las loe nuli kota na, didiin tatai nol dale ka.
Hidi kon lahing nga haman un ata tenga las le tekas noan, ‘Fesat in sapa ni mana hidi son, mo atuil man auk in haep son nas, tatai nol in maa muid fesat nia lo. Tiata nol nia, mi puit lakom se lala-lalan nas, le haep asii tuun man mi tutnalan.’ 10 Kon ata kas lakos se lala-lalan man in muik atuli hut mamo kas. Oen net atuli mamo se lalan na, ta oen kil nolas laok muid fesat in sapa ka. Muik atuil banan nol atuil daat kon, man maas le tao inu maan na.
11 Hidi na kon lahing nga taam lako se fesat ta dalen, le ngat pukiu un atulin in haep pas. Kon un ngat net atuil in haep mes pake kai-baut fesat lo.* 12 Ta lahing nga ketan noan, ‘Hoe kaak-pali! Tasao le ku taam maa se nia, mo pake kai-baut fesat lo kia?’ Mo atuling na langan tuun. 13 Kon nam lahing nga prenta un ima-ii las noan, ‘But atuling ni iin nas nol iman nas, le nikit soleng lako likun nua. Nang le un lilu nol susa-daat se maan mitang ngua.’
14 Ela kon, Ama Lamtua Allah haman atuli hut mamo, molam Un suma huil nal atuli bubuit sii, le daid Un atulin.”
Lamtua Yesus aa deng in baen bea bel pamarenta la
(Markus 12:13-17; Lukas 20:20-26)
15 Ming Yesus aa hidi ela kon, atuil Farisi las koo mes le kiu nahu Yesus, hidim klaa nol Una. 16 Tiata oen tadu oen ima-ii las, leo-leo nol atuil deng Herodes partei la, le laok keket-ketan nol Yesus. Kon atuil nas naka-naka Un noan, “Paap Guru! Kaim tana noan Paap dalen na lolo. Paap nole-lilung taan lo, nol huil sila lo. Paap tui Ama Lamtua Allah in Teka-teka ngas nol in toma. 17 Tiata kaim le keket dasi mesa. Muid kit atuil Yahudi li atorang agama la lam, kit musti baen bea bel pamarenta Roma la laih tuan na, tam lo ka?”
18 Mo Yesus tanas son noan oen kiu Una, le halin Un aa labang pamarenta Roma la. Kon Un siut noan, “Meman mi niam atuil in sila-klup tuun! Tasao le mi kiu nahu Auk nini dais na lia? 19 Olan balang bel Auk duit lil-muti mesa, man taom atuli las pake taung in baen bea!” Kon oen tulu belen duit lil-muti mesa.
20 Ta Un keket oen noan, “Hdulat ni asii la? Nol asii ngala nia la?”
21 Oen siut noan, “Na Kaiser, pamarenta Roma la laih tuan na.”
Kon Yesus tekas noan, “Eta ela lam, mi laok bel pamarenta la, asa man daid pamarenta nena. Nol bel Ama Lamtua Allah, asa man daid Ama Lamtua Allah nena.”
22 Ming Un siut ela kon, oen herang-herang, lole Un in teka na tom isi. Tiata oen haung lakos deng maan na.
Lamtua Yesus tui deng atuil in maet son mo nuil pait; nol se sorga lam atuli li saap apa tam lo ka?
(Markus 12:18-27; Lukas 20:27-40)
23 Se na kon, muik atuli at ila lo deng partei Saduki. Atuil deng partei Saduki las tui noan, atuli li mate kam, nuli pait lo. Leol neot na, oen kon nuting lalan le kiu nahu Yesus. Undeng na le, oen maas keket-ketan nol Yesus noan, 24 “Paap Guru! Upung Musa dul pesang bel kit hadat ni son, noan: eta biklobe mes mate nang soleng un sapa ka, mo muik aan lo kam, biklobeng na palin na musti saap nol bebalung na, le halin nam hua-koet bel un kaka in maet son na. 25 Meman hmunan nu upung Musa tui ela. Mo kaim le keket elia: muik biklobe at iut pali-kaka. Aan hmunan na sapa, hidi kon mate, mo muik ana lo. Kon un palin in muid una ka, saap seda bebalung na lolen. 26 Nal nesang lom, un kon mate mo muik aan lo. Ela kon palin nomer tilu la. Un kon saap bebalu na, mo un mate nol hua pesang aan lo. Ela tutungus lako lius palin hmudin na. 27 Un mate nol bebalung na kon mate, mo hua aan lo.
28 Lam kaim le ketan elia: bihatang na saap nol bikloeb at iut nas son. Ta eta apan-kloma ki kiamat, le Ama Lamtua tao atuil in mate ngas nulis pait tam, bihatang na daid asii sapa ka?”
29 Kon Yesus siut noan, “Eta mi ketan ela lam, mi kula bosor son! Undeng mi taan Ama Lamtua Allah in Dula ka isin na lo. Nol mi kon taan Un in kuasa man muun isi ka lo! 30 In toma ka elia! Mam eta Ama Lamtua Allah tao atuil in mate ngas nulis pait tam, oen saap apa pait lo ka, banansila el Un ima-ii in ne sorga nguas. 31 Auk kon le aa deng atuil in mate ngas haup in nuli pait, tam lo ka. Se upung Musa in dula ka, muik dehet deng kai ana mes ai kaan, mo hnining lo. Deng dehet na lam, kit taan haup noan, atuil in mateng ngas bisa haup in nuli pait. Ta se in dula na, Ama Lamtua Allah tek upung Musa noan,
32 ‘Auk niam, Lamtua Allah deng ku upum Abraham, Isak, nol Yakob.
Oen todan-lahing Auk napiut, maa lius hahalas nia.’
Lam kit tana noan dedeng Ama Lamtua in aa ela ka, blalan nas mates blaan tene son. Mo Ama Lamtua Allah tek noan, Un daid oen Lamtuan maa lius halas ni nabale. Undeng na le kit tana noan, oen mates blaan son kon no, oen hmangin nas nulis nabale. Tiata atuli li mate kon no, mam un nuli pait. Ta suma atuil in nuli sii man todan-lahing Ama Lamtua Allah, mo atuil in mate lo, ta lo?!”
33 Ming Yesus tui ela kon, atuil Saduki las siut nal saa pait lo. Mo atuil hut mamo kas herang-herang, hidim oen tek apa noan, “Wuih, Atuling ni in tui ki muun isi!”
Lamtua Yesus tui deng prenta in muun dui ka
(Markus 12:28-34; Lukas 10:25-28)
34 Nikit atuil Farisi las ming noan, Yesus nal atuil Saduki las son kon, oen leo-leo nakbua le laok keket-ketan nol Una. 35 Oen atulin in taan agama isi mes soba-naan le kiu nahu Yesus. Un tek noan, 36 “Paap Guru! Auk le ketan elia: kit hadat ti atorang ngas, nol agama la in prenta ngas mamon ana lo. Deng totoang prenta man upung Musa in bele ngas, ol man muun dudui la?”
37 Kon Yesus siut noan, “Prenta man muun dudui ne Ama Lamtua Allah in Dula Niu ka ka, elia:
‘Ama Lamtua Allah na mo, mi Lamtuan.
Tiata mi musti neka-namnau Una, dui deng totoang.
Undeng na, mi musti nangan net Un tutungus,
nangan taan Una,
nol daek mumuun le muid Un in koma ka.’
38 Prenta na, man muun dudui nol uhu dui! 39 Nol muik prenta nomer dua, man tek noan:
‘Ku musti namnau atuil didang, banansila el ku in neka-namnau ku apam ma esa ka.’
40 Peke deng totoang upung Musa atorang ngas, nol Ama Lamtua Allah mee-baha las in tui ngas, mo prenta dua nias. Etan atuli li muid nal prenta tene dua nias muna lo kam, oen muid nal prenta didang ngas lo.”
Kristus nam, meman laih Daud in hua-koet, mo Un kon nam laih Daud Tuang
(Markus 12:35-37; Lukas 20:41-44)
41 Oras na atuil Farisi las nakbua nabael se na, kon Yesus keket bali oen noan, 42 “Deng lolo hmunan nu Ama Lamtua Allah hid son le tunang Kristus maa, halin bel boa-blingin Un atulin nas. Lam muid mi in nangan nam, Kristus na mo, asii in hua-koet ta?”
Kon oen siut noan, “Un na mo, laih Daud in hua-koet.”
43 Yesus keket tapnaeng pait noan, “Eta ela lam, tasao le Ama Lamtua Allah Koo Niu ka, tek laih Daud halin haman Kristus sam, ‘Tuang’ ngia? Ta laih Daud dul son elia,
44 ‘Ama Lamtua Allah tek auk Tuang nga noan,
“Maa, le daad se maan in todan-lahing dui kia, se Auk halin kanan nia.
Ta mam Auk tao ku musu las, didiin oen suda le todan se Ku sii.” ’
45 Deng in dula na lam kit tana noan, laih Daud esa man haman Kristus noan, ‘Tuang’. Tiata eta atuli li tek noan, Kristus nam suma laih Daud in hua-koet tuun nam, nol lo bii! Undeng Un kon nam laih Daud Tuang!”
46 Ming Yesus in aa ela ka kon, atuil Farisi las langan tuun, muik tahan atuli mes lo kon, man siut nal Yesus. Tiata kilan deng leol neot na kon, oen lii in keket-ketan Una, nol brain le kiu nahu soba-naan Un pait lo.
* 22:11 Atuil in tana deeh tek noan, lahing ni mana pesang kai-baut fesat taung atuil in maa deng ola-ola ngas son. Mo atuling ni dai pake kai-baut nas lo. Nini ela lam, un tao nahmamaeng lahing na nol un ana ka. 22:13 Matius 8:12; 25:30; Lukas 13:28 22:23 Dehet deng Aan in Nutus sas 23:8 22:24 Dehet Ulang deng Lalan in Nuli 25:5 22:32 Dehet in Puit deng Dale Mesir 3:6 22:37 Dehet Ulang deng Lalan in Nuli 6:5 22:39 Atorang deng Tulu Agama las 19:18 22:40 Lukas 10:25-28 22:44 Buk in Naka-nahalit 110:1