7
Lamtua Yesus tui noan tudu atuil dadahut deken
(Lukas 6:37-38, 41-42)
1 “Mi tudu atuil deken, le halin Ama Lamtua kon tudu mi deken.
2 Mi sukat atuil elola lam, mam Ama Lamtua Allah in sukat mia ka kon ela. Hidim mi sukat atuil tenga ka in kula-sala ngas elola lam, mam Ama Lamtua Allah kon sukat mia ka ela.
3 Ta atuli li in kula ka ana mes tuun kon no, ku nangan nakekeon, molota ku in kula ka tene, mo ku bali noan ku muik in kula lo. Na banansila el ku net auh ana mes se ku tapam ma mata ka dale. Molota kai hbatan tene mes kele ku matam ma, mo ku tanan lo.
4 Taon elol le ku aa noan, ‘Olet! Maa le auk maid puting bel ku auh in mo ku matam ma ka le.’ Molota ku esa net saa lo, undeng kai hbatan tene mes kele ku matam ma.
5 Hoe! Meman ku niam atuil in sila-klupu baktetebes! Kat soleng kai hbatan tene na deng ku matam ma esa muna le, halas-sam ku neta, le maid soleng nal auh ana na deng ku tapam ma mata ka.
6 Tui Ama Lamtua dais niu ka bel atuil in dai sium lo ngas deken. Undeng oen nam mo, banansila el ngot in sau daat, man mam sau bali mia. Oen kon ngengon na, banansila el bahi ka. Eta atuli lotong belen ranteng in osa laok se un apa ka lam, un taan dadale lo! Ta un in tana ka suma kida deng dapa tuun.”
Lamtua Yesus tui le kohe-kanas tutungus
(Lukas 11:9-13)
7 “Eta mi kohe-kanas,
le nodan tutungus se Ama Lamtua lam;
mam Un bel mia.
Eta nuting tutungus sam;
mam Un tulu bel mi lalan.
Eta mi biu tutungus sam;
mam Un sai bel mi hnita ka.
8 Ta totoang atuil in nodan napiut se Ama Lamtua ngas,
mam simu.
In nuting tutungus sas,
mam hapu.
In biu tutungus sas,
mam Un sai beles hnita.
9 Mi nangan soba-nanan le! Eta tana-ana mes nodan ruti lam, taon elola ko un ama ka belen baut lo, ta loo?
10 Nol eta tana-ana ka nodan ikan nam, un ama ka belen ul lo!
11 Mi Aman in ne sorga ku, meman banan baktetebes. Tiata eta atuil daat banansila el mia lia ki kon, kom in bel mi anan nas sa-saa banan nam, salolen le mi Aman in ne sorga kua la! Taon elol kon, eta mi nodan nam, Un bel mi asa man in banan nas.
12 Eta ku kom le atuil didang daek banan saol ku lam, ku musti daek banan saol one. Undeng ni peke deng upung Musa nol Ama Lamtua Allah mee-baah tenga las in tui meman son deng lolo hmunan nua ka.”
Lamtua Yesus tui deng hnita manget
(Lukas 13:24)
13 “Eta atuli li le tama sorga kam, un musti laok muid hnita manget ta. Ta muik lalan dola nol hnita bluang, man atuli hut mamo kom in laok muid na. Mo doha loo! Ta lalan in ela ka, man kil nol atuli li lako naraka lua, le oen bakisan deng Ama Lamtua.
14 Atuil in le tama sorga ka, musti laok muid lalan in susa, nol taam muid hnita manget ta. Ta suma atuli bubuit sii man laok deng na kon no, lalan manget na, man kil nol atuli li lako se Ama Lamtua.”
Lamtua Yesus tui le muid atuil in nole-lilung ngas deken
(Lukas 6:43-44)
15 “Doha-tiud nol atuil in nole-lilung daat, man nikit bali apan nas noan, oen nam mo Ama Lamtua mee-baha. Ta oen hlak le tao apan nas banan, tuladang el lae-blai ka. Molota oen in daat ta banansila el ngot huin, man maa le kaa lae-blai las sa.
16 Taon elola le mi taan nal atuil in hlak daat ela ngas sa? Ngat deng oen in dake-mana ngas tuun. Tuladang el, atuli li ngat kai isin mesa lam, taan un ina ka meman. Kai isin banan na nam, puti deng kai ina daat lo.
17 Ta kai ina banan nam, puting isin banan. Mo kai ina daat tam, puting isin daat.
18 Muik tahan kai ina banan, man puting isin daat lo. Nol kai ina daat tam, puting nal isin banan lo.
19 Kai ina man puting isin banan lo ka, taon elola ko, atuli maa dait soleng, le pasang tamang lako ai dalen.
20 Ela kon nol, mee-baah in nole-lilung ngas. Mi taan oen deng oen in tao-tao ngas.”
Lamtua Yesus tek deng atuil in haman Un ngala ka, mo suma deng sula likun tuun na
(Lukas 13:25-27)
21 “Mam muik atuli in haman Auk noan, ‘Tuang!’ Mo oen suma aa deng sulan likun nas tuun. Mam Ama Lamtua Allah in ne sorga ku, hutun soleng one. Ta suma atuil man muid baktetebes Un in koma ngas siis, man Un simus le daid Un atulin.
22 Mam lius leol kiamat tia lam, muik atuli hut mamo hao noan, Auk niam mo oen Tuang. Oen hanet Auk noan, ‘Tuang nge! Kaim laok bani-bating Tuang in tui ngas son. Kaim kon nulut uikjale kas nini Tuang ngala ka. Nol kaim kon tao taad herang bili-ngala nini Tuang in kuasa ka.’
23 Oen taan in hanet Auk ela sii kon no, mam Auk tekas noan, ‘Mi niam asii? Auk taan mi lo, ta mi nuil muid Ama Lamtua in koma ngas lo. Tiata lakom bian deng ni tia!’ ”
Lamtua Yesus tui deng atuil in tana, nol atuil ngengo
(Lukas 6:47-49)
24 “Atuil in maa le hii se Au, hidim daek muid Auk in teka ngas sa, un nam banansila el atuil in tana, man bangun-pii un uma la se netes baut dapa.
25 Nesang lo kon ulan nauh ina tene, didiin ui tene baa. Angin tuan kon huu tom uma la. Mo um na lea lo, undeng bangun-pii ne netes baut in kuat dapa.
26 Atuil in maa le hii se Au, mo daek muid Auk in teka ngas lo ka, un nam banansila el atuil ngengo, man bangun-pii un uma la se hlaen dapa.
27 Nenesang kon, ulan tene nauh didiin ui tene baa. Angin tuan kon huu tom um na. Kon nam, um na lea didiin dudu-dudus.”
Atuli las herang-herang nol Lamtua Yesus in tui ka
28 Yesus dehet hidi ela kon, atuli las totoang herang nol Un in tui ela ka,
29 undeng Un taan baktetebes in tui ngas isin nas. Un lalan in tui ka muun isi, tatai nol oen guru agama las in tui ngas lo.