2
1 Esarhadon a manghai tue vaeng ah im la ka mael. te vaengah ka yuu Anna neh ka capa Tobias tah kai aka doe la om. Te vaengah yalhkhat khotue kah aka cim, Pentekos khotue om. Te dongah kai hamla hlaembuh han tawn uh tih caak hamla ka vael.
2 Kai hamla caboei a tloeng uh vaengah ka mikhmuh ah caak muep han tawn. Te dongah ka capa Tobias te, “Ka capa, cet lamtah Niniveh tamna lakli kah mah pilnam boeih te toem lamtah hang khuen. Pathen dongah lungbuei boeih aka hong rhoek te. Anih te kamah taengah buh hmaih ka ca eh. Na voei duela kang rhing ni,” ka ti nah.
3 Te dongah Tobias te ka pilnam khodaeng rhoek te toem hamla cet. Anih te ha mael vaengah tah, “A pa,” a ti tih, “Kai ka om, ka ca,” ka ti nah. Te dongah a caeh doela, “A pa, mah pilnam rhoek te a ngawn tih hnoyoih hmuen ah a voeih coeng ne. Te dongah daprhok lah yalh uh coeng,” a ti.
4 Te dongah ka tho tih ka buh pataeng ka ten koll la ka nong. Te dongah a rhok te up hamla khotlak hil toltung lamloh ka coi.
5 Ka mael phoei tah tui ka hluk tih kothae neh buh ka caak.
6 Te vaengah Amos kah tonghma ol loh Bethel a phong thil tih, “Na khotue kho rhaengsaenah la poeh vetih, Na laa te khaw rhaengsae lung la poeh ni,”
a ti te ka poek. Te dongah ka rhap.
Tobit Mikdael La Poeh
7 Khomik a tlak nen tah ka cet tih hlan ka too phoeiah rhok te ka up.
8 Te vaengah ka imben rhoek loh n'nueih thil tih, “Anih he rhih mahnim? He tah, he he a saii dongah duek hamla la a hloem coeng dae ta. Anih yong coeng dae ca, rhok koep a up bal pueng,” a ti uh.
9 Tekah hlam tah tui ka hluk, ka imkawt la ka cet. Te vaengah vongup kah pangbueng taeh ka yalh. Tedae kho ling tih ka maelhmai tah ka khuk pawh.
10 Te vaengah pangbueng sola vahnup a om te ka ming pawh. A sa te ka mik khui ah daeng tih a bok cala a hlip om. Te dongah toi hamla Si boei ka paan. Tedae si neh muep a toi vaengah a lip a bok loh kamik ta aep a dah. Ka khaw yip dael. Kum li khui ah kho ka hmu pawh. Ka huiko boeih khaw kai hamla a ko thae uh. Ahikar long khaw Elymais la a caeh hlankah kum nit khuiah tah kai n'khut.
Tobit Yuh Loh Bungkhutnah A Tlap
11 Te vaeng tue ah tah ka yuu Anna long khaw huta bibi neh tangka a tlap.
12 Anih loh a saii noek bangla amah loh a saii te a kungmah rhoek taengla a thak tih anih te khaw thapang a paek uh. Hnin at tah, Dystruss kah a rhihnah dongah a himbai te a ah tih a kungmah rhoek taengla a thak bal. Te vaengah anih te thapang a muep a paek tih hlaembuh hamla maae ca a paek bal.
13 Ka taengla hala vaengah maae te koe a hlaih. Te dongah amah te ka khue tih, “Me lam kah maae nim nang khuen he? Na huen pawt nim? A kungmah taengla thak laeh. A huen boeih he tah caak ham la hamsum a om moenih,” ka ti nah.
14 Tedae anih loh kamah taengah, “Te tah ka thapang soah kutdoe lamni m'paek,” a ti. Te dae anih ka tangnah pawt dongah a kungmah taengla thak hamla ka thui pah. Te dongah anih taengah khaw ka thintoek te sai coeng. Te vaengah anih loh kai te, “Bothen na sai te melam ni a om, duengnah khoboe na saii te menim? The rhoek he nang aka ming la om coeng,” a ti.