10
1 Guna, Israela tano be rigi momo vain bamona,
iena huahua momo ia atoa.
Ena huahua be momo idia lao neganai,
iena boubou patadia danu be momo idia haginia.
Israela taudia edia tano ena namo,
ia bada lao noho neganai,
idia ese nadi kaivakuku danu,
edia hairai idia hanamoa noho.
2 Edia kudoudia be mai edia koikoi danu,
vadaeni harihari edia kerere davana do idia huaia.
Lohiabada ese edia boubou patadia,
be do ia hamakohia maragimaragi,
bona edia nadi kaivakuku gaudia,
be do ia hadikaia ore.
3 Israela taudia do idia gwau,
“Ai be mai aiemai king ta lasi,
badina ai ese Lohiabada ai gari henia lasi.
To king ta ese,
edena bamona ai do ia durua diba?”
4 Idia ese hereva anina lasi,
unai sibona idia gwauraia noho.
Gwauhamata anina lasi,
bona mai koikoi gaudia sibona idia karaia noho,
unai dainai kota kara momo idia vara noho,
ava dikadia, mase gaudia,
uma gabuna lalonai idia tubu noho bamona.
5 Samaria dekenai noho taudia,
be do idia gari bada,
Betele dekenai edia golo boromakau ia boio dainai.
Idia, bona unai boromakau idia tomadiho henia taudia,
bona golo boromakau ena hahelagaia taudia ese,
edia dirava ia boio dainai do idia taitai.
Iena hairaina ia ore dainai,
do idia tai mai boiboi danu.
6 Unai kaivakuku be Asuria taudia ese,
edia tano dekenai do idia abia lao.
Asuria ena king badana dekenai do idia henia,
harihari gauna bamona.
Eparaima taudia be do idia hemarai.
Io, Israela taudia ese unai kaivakuku dekenai,
idia abidadama henia dainai do idia hemarai.
7 Samaria ena king be tuari taudia,
ese do idia abia lao,
au maragina be sinavai ena ranu ese ia abia lao bamona.
8 Avene dekenai idia noho ataiai tomadiho gabudia,
Israela taudia ese,
kaivakuku idia tomadiho henia gabudia,
be do idia hadikaia ore momokani.
Unai boubou patadia edia latanai,
au ginigini bona ava ginigini do idia tubu.
Unuseni noho taudia ese,
ororo do idia boiboi henia, do idia gwau,
“Ai do oi hunia, ai do oi koua.”
Lohiabada ese Israela ena kerere davana ia gwauraia
9 Lohiabada ia gwau,
“Israela taudia e,
Gibea dekenai umui kara dika dinadia,
ia mai bona hari dina danu,
umui ese lau dekenai umui kara dika noho.
Unai dainai Gibea dekenai,
ma tuari ese umui do ia alaia mase.
10 Lau ese inai kara dika taudia do lau tuari henia,
bona edia dika davana do lau henia.
Bese idauidau do idia haboua tamona,
Israela do idia tuari henia totona.
Unai neganai edia dika badadia rua,
edia davana do idia abia.
11 “Guna Israela be boromakau natuna hahine matamatana,
idia hamanadaia gauna bamona,
bona ia ese uiti moia gaukara ia ura henia noho.
To harihari lau ese iena aiona namona dekenai,
au metauna do lau atoa,
gaukara auka do ia karaia totona.
Tano aukana hamakohia gaukara,
be Israela dekenai lau henia,
bona tano manokana geia gaukara,
be Iuda dekenai lau henia.
12 Israela e, uhe namodia,
kara maoromaoro ena uhe do umui hadoa,
bona umui utua neganai,
egu lalokau ese,
umui dekenai hanamoa do ia henia,
badina harihari umui ese lau,
Lohiabada do umui tahua be namo.
Unai neganai lau be do lau mai,
umui do lau hanamoa,
medu namona bamona.
13 To umui ese uhe dikadia,
kara dika ena uhe umui hadoa,
unai dainai umui utua neganai,
dika sibona umui davaria vadaeni.
Umui ese emui hereva koikoi,
idia havaraia huahua umui ania vadaeni.
Betele hanua idia hadikaia ore
“Umui ese emui kariota,
bona emui tuari taudia,
be momo herea dainai,
umui abidadama henidia.
14 Unai dainai tuari be emui taunimanima,
edia huanai do ia vara,
bona emui gabu aukadia ibounai,
be do idia hadikaia ore.
Unai tuari be king Salamana ese,
Bete Arabele ia hadikaia dinana ena tuari bamona.
Unai dina dekenai hahine mai edia natudia danu,
be tano dekenai idia moidia patapata, idia mase.
15 Israela taudia e,
unai bamona umui dekenai do idia karaia,
emui kara dika bada herea dainai.
Daba rere, tuari ia matamaia neganai,
Israela ena king be do idia alaia mase momokani.”