36
Dirava ese ita ia matakani henia noho, iseda kara do ia hamaoromaoroa totona
1 Ma Elihu ia hereva, ia gwau,
2 “Iobu e, nega sisina ma lau dekenai do oi naria,
bona oi do lau hadibaia,
badina be Dirava ena ladana dekenai lau hereva noho.
3 Egu diba be gabu daudau dekena amo lau abia,
lau ese lau ia karaia Dirava ena kara maoromaoro,
do lau gwauraia hedinarai.
4 Egu hereva ibounai be momokani, koikoi ta lasi.
Aonega momokani tauna be lau inai.
5 “Kamonai, Dirava be goada herea momokani,
to ia ese taunimanima ia negea lasi.
Aonega dekenai danu Dirava ena goada be herea momokani.
6 Ia ese kara dika taudia edia mauri ia halataia lasi,
bona ia ese nega ibounai,
ogogami taudia mai maoromaoro danu ia naridia noho.
7 Dirava ese kara maoromaoro taudia ia gimaia noho.
Ia ese dagi badadia,
king bamona dagi idia dekenai ia henia,
bona ia ese idia ia hanamoa ela bona hanaihanai.
8 To bema idia be edia dika dainai idia hisihisi noho,
haida ese auri seini dekena amo idia guidia dainai,
9 unai neganai Dirava ese unai hisihisi dekena amo,
edia kara dika ia hedinaraia,
edia kerere bona edia hekokoroku karadia danu.
10 Ia ese edia taiadia ia kehoa,
iena hadibaia hereva do idia kamonai totona.
Bona ia ese unai taudia ia oda henidia,
edia kara dika do idia rakatania.
11 Bema idia ese Dirava idia kamonai henia,
bona iena hesiai gaukara idia karaia neganai,
edia mauri dinadia,
be do mai maino, bona mai noho namo danu.
12 To bema idia kamonai henia lasi neganai,
idia be tuari kaia dekenai, edia mauri do idia doko,
bona mai aonega lasi danu do idia mase.
13 Dirava idia gari henia lasi taudia,
be idia badu noho, doko lasi,
bona matakani idia davaria neganai danu,
idia be durua totona idia guriguri lasi.
14 Idia be do eregabe neganai idia mase noho,
edia mauri be hemarai kara dainai idia ore haraga.
15 To Dirava ese hisihisi taudia,
be edia hisihisi dekena amo ia hamauria noho,
bona edia hisihisi dekena amo,
Dirava ese edia lalona ia kehoa noho.
16 “Iobu e,
Dirava ese hekwarahi dekena amo oi ia hakaua,
bona noho namo oi dekenai ia henia.
Oiemu aniani patana,
be aniani dekenai ia honu momokani.
17 To harihari oiemu kara dika ena davana,
oiemu dika hegeregerena, oi abia noho.
18 Do oi naria namonamo,
badu ese oiemu lalona do ia veria,
bona Dirava dekenai do oi hereva dika garina,
badina unai bamona neganai,
davana bada herea ese,
oiemu kerere dekena amo oi do ia hamauria diba lasi.
19 Unai neganai durua totona do oi boiboi,
be hegeregere lasi.
Oiemu kohu momo ena goada ese,
oi do idia durua diba lasi.
20 Hanuaboi ena dibura totona do oi naria lasi,
taunimanima edia ruma dekena amo,
oi ese do oi veridia lao totona.
21 Do oi naria namonamo,
kara kerere daladia dekenai do oi lao garina.
Badina oiemu hisihisi be Dirava ese ia siaia,
dika dekena amo do oi siri totona.
22 “Do oi laloa,
Dirava ena siahu be bada herea.
Hadibaia tauna ia hegeregerena be daika?
23 Daika ese Dirava do ia hamaoroa,
kara ta do ia karaia?
Daika ese Dirava do ia hamaoroa, ia gwau,
‘Oi be oi kerere?’
24 Iena kara dainai,
taunimanima ese nega ibounai Dirava idia hanamoa noho.
Oi ese danu ia do oi hanamoa be namo.
25 Taunimanima ibounai ese,
Dirava ena kara badadia idia itaia vadaeni,
to idia ese ia karaia dalana idia diba lasi.
26 Dirava ena siahu bada herea be ita diba lasi.
Iena mauri lagani danu ita duahia diba lasi.
27 “Badina be Dirava ese,
ranu be tanobada dekena amo ia veria daekau noho,
bona iena ori edia lalona dekena amo,
medu ia hadihoa noho.
28 Guba dekena amo medu ia siaia diho noho.
Taunimanima ibounai edia latanai ia diho bada noho.
29 Tau ta ese ori idia heau noho dalana ia diba, a?
O guba ena boiboi dalana,
Dirava ena noho gabuna dekena amo,
be tau ta ia diba, a?
30 Dirava ese,
guba ena kahana ibounai dekenai kevaru ia siaia noho,
ma davara ena dobu gabudia be idia diari noho.
31 Badina inai ori dekenai,
ia ese taunimanima ia naria noho,
bona edia aniani ia henia bada noho.
32 Dirava ese iena imana dekena amo,
kevaru ia dogoatao noho,
bona ia oda henia noho,
edena gabu dekenai do ia tubu.
33 Dirava ese iena guba boiboi dekena amo,
iena noho bona iena siahu ia gwauraia noho.
Ia ese kara dika ia tuari henia noho,
mai ena badu danu.