5
Ráɨidɨmɨe llɨ́iga rabénicona cɨódɨcue naa Cordero daɨnámɨe Cristo dɨga
Afe méifomo illaɨma ráɨiranomo ráɨidɨmɨe nabézimo ite rabénicona cɨódɨcue. Afénico ferɨ́noga rabe. Erófenemo cuega, daje izói jinófenemo jɨáɨ cuega. Afénico siete dɨga sello daɨna ñue ɨbaira raado ɨbaica. Iemo rɨírede ángel daɨna Juzíñamui abɨ ímɨena cɨódɨcue. Afémɨe fɨcɨ́rede uaido jɨcánofɨrede; daɨde:
—¿Bie sello mei cuatállena bu ñuena? ¿Bumo ñue dúide binico tuiñóllena? —daɨde.
Mei íadɨ afénico tuíñoitɨmɨena iñede. Caifo monamo iñede. Bínɨemo iñede, íemo bínɨe anamo tɨ́idɨno illánomo jɨáɨ daje izói iñede. Daje izói afénicomo buna eróinide afe facádollena. Afénico tuíñoite comécɨna ñúemɨena baiñénamona ɨere éedɨcue. Daje izói afénico facádoitɨmɨe iñénamona, íemo jɨáɨ afénicomo eróillano ónoitɨmɨe iñénamona, ɨere éedɨcue. Iemona veinticuatro dɨga eicomɨ́nɨmona dámɨe cuena daɨde:
—Mai benómona éeñeno o iri, mei Judá naɨraɨ illaɨma Jánallarina mamécamɨe, fɨénidena jae ñue anáfenotateza. Afémɨe jaiai illaɨma David erófene igɨ́mamona comuídɨmɨe. Afe ie anáfenuamona afémɨe binico tuiñolle rɨ́ino ote. Daje izói afe siete dɨ́gade sello cuatalle rɨ́ino íemo ite, —daɨde.
Iemona afe ráɨirano cɨ́gɨmo, íemo afe cuatro dɨga cáadɨmɨiaɨ cɨ́gɨri, íemo afe veinticuatro dɨga éicomɨnɨ cɨ́gɨmo, Cordérona mameca Crístona cɨódɨcue. Afémɨe táɨide, mei íadɨ Juzíñamuimo fia fecállena ie íaɨoɨ fáina meifo cɨ́oide. Afe Cordero siete dɨga zícaɨrede, íemo ie ui siete dɨ́gade. Afe siete dɨ́gade uíjɨaɨ naga énɨiaɨmo oreca Juzíñamui Ñuera Joreño jana. Afe Cordero illaɨma ráɨiranomo ráɨidɨmɨe nabézimo ite rabénicona llɨ́ɨnuaide. Afémɨe afénico llɨ́ɨnua llezica afe cuatro dɨ́gade cáadɨmɨiaɨ, íemo afe veinticuatro dɨ́gade ocuide éicomɨnɨ afe Cordero anamo dújudiaɨoɨ. Afe eicomɨ́nɨmona illa dɨ́gamɨe ‘arpa’ daɨna rua roia taiga raa llɨ́iediaɨoɨ. Daje llezica afémacɨ oro fɨnoina ugúcɨaɨna oruide ichecoɨ llɨ́idiaɨoɨ. Afenɨaɨ Juzíñamuimo jaɨnáidɨno afémɨemo jɨcara uaillaɨ jana. Afe éicomɨnɨ bie comue rua rotíaɨoɨ:
O ɨere comécɨna ñúemɨenamona bie rabénico llɨ́ɨnota tuiñolle omo dúide.
Mei naui Juzíñamuimo fatá fecácamɨedɨoza.
Caɨna o dɨe tóillado Juzíñamui íena ɨbádɨoza.
Uáfuena nágaziemona,
Iemo nana jɨáɨfo úritɨnomona,
Iemo naga comɨnɨ jófuiaɨmona,
Iemo nana náɨraɨaɨmona Juzíñamui íena caɨna ɨbádɨoza.
10 Caɨ Juzíñamui ie illáɨnɨna caɨna jáitatɨo;
Daje izói comɨ́nɨdo Juzíñamuimo úrifɨreitɨnona caɨna jóonetɨo;
Iemona énɨe náɨraɨaɨna ócuitɨcaɨ.
Aquíe izói rotíaɨoɨ.
11 Afe mei eróidɨcue. Iemo aillo afe illaɨma ráɨiranomo ífoɨna ite ángeles daɨna Juzíñamui abɨ imacɨ úrilla uaina cacádɨcue. Daje llezica afe cuatro dɨga cáadɨmɨiaɨ uaina cacádɨcue. Iemo dáaruido éicomɨnɨ uaina cacádɨcue. Afe Juzíñamui abɨ imacɨ ɨere jamánomo aillo itíaɨoɨ. Ua millones y millones dáɨnaze itíaɨoɨ. 12 Afémacɨ fɨ́cɨrerie úritiaɨoɨ; daɨdíaɨoɨ:
Fatá Juzíñamuimo fecaca Cordero comécɨna ɨere ñúenamona ñuera rɨ́ino maiñolle afémɨemo dúide.
Daje izói aillo ráifide ráanɨaɨ dáamɨemo dúide.
Iemo ɨfocɨ déillafuiaɨ dáamɨemo dúide.
Iemo nana ñuera máɨrie dáamɨemo dúide.
Iemo nitárega ñúefue dáamɨemo dúide.
Iemo ñuera ébifue dáamɨemo dúide.
Iemo aillo afémɨemo caɨmátaille uai afe Cordéromo dúide.
13 Afe llezica nana Juzíñamui comuítaganuiaɨ úrilla uaina cacádɨcue: nana monamo itɨ́nuiaɨ, daje izói énɨemo itɨ́nuiaɨ, daje izói énɨe anamo itɨ́nuiaɨ, daje izói monáillaimo itɨ́nuiaɨ, naa afénuiaɨmo itɨ́nuiaɨ úrilla uaina cacádɨcue. Daɨdíaɨoɨ:
Nana caɨmátaille uaillaɨ illaɨma ráɨiranomo ráɨide Moo Juzíñamuimo íredeza,
Daje izói jɨáɨ Cordéromo íredeza.
Afe izói ñúefue afe íaillɨnoɨmo nitáredeza, naa ñuera ébifue dɨga,
Iemo ñuera rɨ́ino íaillɨnoɨmo íredeza.
Nana aféfuiaɨ íaillɨnoɨmo nana fɨmónaɨaɨdo, jaca nɨnomo zíiñona daɨí daɨírenaza.
14 Iemo afe cuatro dɨga cáadɨmɨiaɨ aiáɨrilla izói daɨdíaɨoɨ:
—¡Daɨítadeza! —daɨíoifɨrediaɨoɨ.
Iemo afe veinticuatro dɨ́gade éicomɨnɨ ana dújuillano, jaca nɨnomo zíiñona cáadɨmɨemo caɨmátaioifɨrediaɨoɨ.