31
Dindini homogo holene ngarume wali agali mo genda haga nga lenego ogo
1 Wali agalime tinaga muni ngago hangu mitangi bialu mini burugu lo hayagua tini u baya hangu napale halu tinaga tingini o bialu kuni hangu ona holebira.
2 Heneneore wali agali tinaga biyinaya hangu mitangi ho haga karu ti u baya hangu napaliagaore ka. Ogoni wali agali warago timbuni bo wuwa u napale hagadagua haga nga.
3 Muni dewawi homogo kagome biabe ndelaheore bialu muni mbiraleru mo ngoai ho wialu hagane. Ani bialu howa ainde horo mbiru ibu ha̱lo bedangi mbirale bayale ilo wiyagome ibunaga hame ngago biba helo biraga.
4 Yagibano kago ibubi nde erekui biabe bialu muni mbiraleru emene dege ilomogo bu ngelo haga. Anigo ai ibu ha̱lo bedangi ibuha dewaore tubagi ho wiai karia handaga.
5 Wali agali ngolo dege hame lo haga karu ti wali agali bayale tigabi ndo holebira. Ani bialu wali agali muni hangu mo wialu haabo haga kago ibu mbirungi mo luluya holebira.
6 Wali agali dewame muni ngoloru dewaore wule hame lalu karia tiniha genda tandagala timbuni ngago ngola howa tini mo ko haga nga.
7 Muni dimagoli haragome wali agali dewaore mo pila halu wali agali lulu karu mo hondo hagane nga.
8 Homogo muni mbirale dewawi kago ibugua muni hangu hame lowa biabe bia ndo ibugua biabe tigatiga bialu heneyagua nde ibu turu ho holene nga.
9 Wali agali ogonibi bialu haga heagua nde iname ogoni ale kagohondo mo turu halu bi bayale lamialu holene ngago irane ibugua mana bayaleore ibunaga wali agali karu mo walia halu kagonaga mo turu holene nga.
10 Munime ba handayagola bi nalene ai kebe. Ibu munime bahandayagola handalu ibu pora bialu pene heagua nde ibu turubiore kagoni ndobe. Mbirali mana ko nabiaga ai kagome munime bahandayagola pora bialu pene kabe.
11 Ibunaga holene bayale ngago ibu abale ereba naholebira. Ani bialu wali agali ti mo ngoai ho biruwa ibunaga mana bayale biaga ngago hangu te lalu birulebira.
Tomo nalu birulenenaga mana bayale ngago ogo
12 Í̠ agali haguane mbirago andaga tomo nole dagia ngagoria biruwa tomo baya dagiani ngago deme hondo biruwa lalu, Ayaliore-o tomo baya taraoreda, loleni nalabe.
13 Baya hangu manda bibe. De ibugua dimagoli hagago ko nga. Mana ogoni bolangua hene mende nawiore. Anidagua biagagome de ibu dugu biaabo haga nga.
14 Dagiani ngane hendedego mo yai holeni nahabe. Tomo í̠ ala mulenaga wali agali hela amunana nabibe.
15 Í̠ni mitangi birilidagua wali agali bu karu ala mitangi bibe. Mbirale mbira bule manda bidego minime mo tale ala bibe.
16 Tomo nolene tu haragola tomo minila haru agalime tomo naga ngadagua nabe. Nogo biangome nagadagua nalu keria wali agali biru ngarume í̠hondo oba holigo manda bialu nabe.
17 Mana bayale mbira í̠ tomo emene nalu maru ti wene dege nole nalu bedagola í̠ abale nai hariyagua bayaleore. Tomo dewaore í̠ mo yariyagua wali agali bedaru bibahendeme í̠hondo mini ko wialu birulebira.
18 Wali agali dewaore bereagua nde garere bialu tomo dewa í̠ mule manda buleni nabibe.
19 Wali agali mana bayale bulenenaga manda mini bedarume tomo emene dege nalu biraga. Ani bialu mani ti buhe bayale karulape mialu u bayale paliaga.
20 Wali agali tomo dewa nane kagome u bayale paliaga. Wali agali tinaga tombeha tomo palu toleledago ibu u baya hangu napaliaga. Buni timbuni nalu magu tagua ho biraga.
21 Ai tomo dewaore nariyagua nde heyalu bu he bayale mialu ibagabu kegola mani karulape holebira.
22 Igini-o i̱na bi larogo baya hangu hale habe. Mineore holene nawigo mine nahabe. Ani larogoni mani howa i̱naga bi ogo henene galoneore lenedane hondolebere. Mbirale í̠na berego damene bibahende mendeali kago baba irigiirigi bialu bolangua haga haga bulenaga nabibe. Warago ngago í̠ha ngola holigo nabibe laro.
23 Wali agali bu karume mbirali kago ibugua tomo timbuni dawa ngago hondowa turu halu tigua bi dewa ogoninaga lalu hagaya. Tigua ani lolene bayale
24 Anigo wali agali andagaha haga karume tomo emene ko miriyagua nde tigua keba abale holebira. Ani bialu tinaga bi larago tiga tiga ngadagua lara.
Mana ko lulu iba nowa lulu yu howa mana lehe biaga ngago ogo
25 Í̠ lulu iba nalu howa wali hongohe bedo agali hongohe ko lowa maru kago walia nahagago nahabe. Waini ibame wali agali dewaore mo ko hai hene ngago manda bulene nga.
26 Ibame aeane irame dene ngago mo hongo haga nga. Anidagua dege waini ibame wali agali mine haga bu karu ti gungu bialu kangi tinaga mini ngago mo pana hagane nga.
27 Waini iba ti nolene ngadagua nayagua nde wali agali mo turu holene bayale nga. Wali agali waini iba nolene nawi hayagua nde agua bulubadabe. Bambaore howa wima ibinigo ayu kemangibi waini ibame wali agali mo turu hagane winigo nga.
28 Wali agali ti waini iba nolene tu nalu ibunaga nolene magi ngago karulape nayagua wali agali tini turu haga.
29 Anigo waini iba dewaore nayagua nde tigua keba abale tungulope halu gungu bialu pilope hama ibaga biagane nga.
30 Wali agali mini nawi lulu bu karu iba nowa luluyu kangi tiha keba abale halu gungu bule hamelowa homa handalu biraga. Ani bialu karia tinaga hongo ereba hai haragola tinaga tinginiha dere dewaore bu hagane nga.
Tomo nalu baya hangu biragane ngago ogo
31 Dawe halu tomo nalu biruwa í̠naga damene mbira kagohondo í̠naga dano hanga lalu ibuhondo lai lolenebi ibu mege bulenebi dano hangabe lalu bi hongo howa nalabe.