48
Elaya henego ogo
1 Horo ogoniangi agali mbira Anduane Homogonaga bi mana latagi halu mbiwia haga mini Elaya hene. Ibu agali hongoheore howa ibunaga bi ira hunguale lene.
2 Ibugua hina gari timbuni mo bia hayagola ibunaga biabe ogonime wali agali dewaore hina garime mo homa hai hene.
3 Ibugua bi hongo howa Anduane Homogohondo layagola iba dalu naibi wiaabo hene. Ani bialu ibugua ira dene halu tebira ibilo olene.
4 Elaya-o í̠ agali haguaneore agalime nabiaga aleru bia heneya. Agali mende í̠ bolanguahe nahe.
5 Í̠na Anduane Homogo Daligaore kago olalu agali mbira homo tongolomini wiago mo heya heneya.
6 Í̠na agali kini hearubi agali haguane bu hearubi bibahende waragome homalu hearu homelo wahaga biriya.
7 Hari Sainaini howa Anduane Homogohanda í̠hondo lai layago hale halu hari Horebeni howa Anduane Homogohanda waitigi karu bo wahai holebero layane hale hariya.
8 Kini ko hearu bo wahelonaga kini ogo í̠na bo pu lalu dabariya. Ani bialu agali mende í̠na henge mialu Anduane Homognaga bi mana latagi halu mbiwia haga helo dabo helariya.
9 Í̠ dahuliya andaga pole howa nogo hosime garo ale garisi gili laga wiago ira hungu heba ibiyagome í̠ mo yalu puyabu humbirini wai bialu hongohe mbirame dahuliya andaga mo yalu piya.
10 Ngode Datagaliwabenaga bi mbugaha ngagome lalu Anduane Homogohanda horo manda bu winigo ngago ogoni tagira ibirangi í̠ dai bulebere. Anduane Homogonaga keba holene pu timbu holigo ai í̠na ibunaga miniha mo tabila holebere. Ani bialu abahanda waneigini baba lone mini mbiraore helalu í̠na Yagoba waneigini lone haru dai bulebere.
11 Wali agali í̠ de handayaru ti turu ho helobi wali agali í̠na biamogo biaga karu tigua miniha mo palia holene karulo helobi inabi nde bayale holene handa walia holeberema.
Elaisa henego ogo
12 Puyabu hongohe ibiyagome Elaya pulu yalu piyagola ibunaga dinini Elaisaha ho to̱latagi hene. Elisa ibu henedago howa ibugua kini mbira kagohondo gi nahaga howa agali mbirame ibuhondo ogoale bia lowa ibu handaya ho haga mbira nahene.
13 Ibugua biabe bulene damenego bibahendeore genda naheore bialu howa mani ibu homeaha ibunaga biabe Anduane Homogonaga bi mana latagi halu mbiwia hagadago bialu haabo hene.
14 Ibu nahome heangi agalime nabiaganeale dewaore biaga henego ibu homowabi mbirale tara tarabi bini.
15 Wali agali bu hearume mbirale tara tara uruni handa hondowa dege tigua mini beregedalu mana ko biyago wanahe haabo hene. Ani biyagola Anduane Homogohanda tinaga dindi wiago wahalu bo taliatagi howa dindi tara tara wiaruha purogo lelene.
16 Ani bialu hayadaru ti nde emene hangu howa tinaga agali haguane Debidi aria dege haabo hene. Agali haguane uruni marume mana bayale bialu haga halu marume nde mana ko wiaru bialu hene.
Hesegaia henego ogo
17 Hesegaiahanda ibunaga tano mo hongo holene hame lo hene. Ani howa ibugua iba tanoha dadabu yu anda polenaga biabe bialu gana walu hene. Ibugua ege to̱le̱ wiaru aeaneme bo dodo wahai howa iba berelonaga uli dewa tombo wigi bini.
18 Ogoningi kini Senageribihanda Isaraele baba wai ibalu agali mbira Labasage heago ibilene. Agali Labasage ogoni ibugua Saiono bo gialahole bule íbu howa ibugua ibuninaga hongo timbuni heago mitangi bialu wai bi lalu bi ko tara tara hongo howa lalu hene.
19 Ani layagola wali agalime gi timbuni howa tinaga gi duru laga laga bialu miniha tandaga timbuni walime gali taba hanalu howa tandaga hagagabi ho hai hene.
20 Ani howa Anduane Homogohanda ti dara helo Anduane Homogo olalu hene.Tinaga gi yaragadaga bialu Anduane Homogohondo bi lene. Anduane Homogo baya buruguleore kagome tinaga bi ogoni hale halu ti biamogo bilo Aisaia abaleore ibilene.
21 Ai Anduane Homogohanda Asiria wai biaga agali biaru mo ko howa minu balu ibunaga dahuliyalirume ibalu balu bo amo lai hene.
Aisaia henego ogo
22 Anidagua binidago irane agali Anduane Homogonaga bi mana latagi halu mbiwia haga Aisaia ibugua de gandeba handarago bi heneneore ngago handa walia haga kago Hesegaia ibu mini mbiraore wialu bi layago talialu heagome bini. Hesegaia ibugua Anduane Homogonaga bi hale halu ibu mamali Debidihanda biaga wiago talialu bialu hene.
23 Ainde Aisaia ibu Anduane Homogonaga bi mana latagi halu mbiwia haga heangi ibugua ni abale anda nape hondo ha lowa bi lalu ai ibunaga bi Anduane Homogohondo layagome kini ibu mali dewaore dindini halu bini.
24 Ibunaga dinini hongoheore howa mbirale mani ibule wiago hondo bamba halu ibugua wali agali Saiononaga dara timbuniore howa dugu bialu hearunaga mini bayale helo motiga bini.
25 Ibugua mbirale bibahende mani bule ngago damene bibahendeore dindi ogo ibu biba holene tagira ibirangi waholene bi lai halu mbirale wiado hene ngarubi lai halu mbirale tagira naibi ngarubi lai haga hene.