Da Letta
Fo Da Hebrew Peopo
1
God Sen His Boy Fo Tell Us
Da Good Kine Stuff
(Rules Secon Time 32:43; 2 Samuel 7:14; Songs 2:7; 45:6-7; 97:7; 102:25-27; 104:4)
1 Long time befo time, plenny time God sen guys dat talk fo him fo dem talk to oua Hebrew ancesta guys. Dey tell um plenny tings plenny diffren ways.
2 But now, wen eryting almos come pau, God sen his Boy fo talk to us guys. His Boy, he da One dat get eryting from his Faddah. Wen God make da world an da sky, was his Boy dat do da work.
3 God Boy, he show how awesome God stay,
Jalike wen da sun stay shine in one mirror.
He stay same same jalike his Faddah,
Same same jalike one picha
Fo show how da Faddah stay fo real kine.
Da tings God Boy tell, get choke powa
Fo make eryting hang togedda.
Afta he pau throw out da bad kine stuff da peopo do
Fo dem come clean inside,
He go sit down up ova dea in da sky,
On da right side nex to God Da Awesome King.
Dass da spesho place fo show how importan he stay.
4 All da angel messenja guys up dea in da sky, dey importan.
But God Boy mo importan den dem.
God give his Boy eryting dat God get.
God even give his Boy his name.
God Boy Mo Importan Den
Da Angel Messenja Guys
(Rules Secon Time 32:43; Songs 2:7; 45:6-7; 102:25-27; 104:4; 110:1; 1 Records 17:13; 2 Samuel 7:14)
5 You know, God no talk to da angel guys
Da way he talk to his Boy. He tell his Boy,
“Today I tell
Dat you my Boy!”
An anodda place inside da Bible God tell,
“I his Faddah,
An he my Boy.”
6 Wen God bring his Numba One Boy inside da world, he tell,
“I like all my angel messenja guys
Fo go down an show my Boy plenny love an respeck.”
7 Dis wat God tell bout da angel guys:
“I make my angel messenja guys jalike da winds.
I make da angel guys dat work fo me jalike da fire.”
8 But God talk to his Boy lidis:
“My Boy, you God. You goin stay king foeva.
Da spesho stick you carry fo show dat you da King,
Dat mean you da King dat erytime do da right ting.
9 You stay plenny good inside wen peopo do da right ting,
An wen peopo broke da Rules, you had it wit dat.
Az why you da one I wen pick from all da guys dat stay by you.
Az why I put olive oil on top yoa head fo show dat you da King,
An dat you feel mo betta inside
Den anybody!”
10 An God tell dis too:
“My Boy, you stay Da One In Charge.
From da start,
You make da earth an da sky,
Wit yoa hands.
11 Da earth an da sky goin get wipe out.
But you, you goin stay foeva!
Da earth an da sky goin come boros,
Jalike da kine boros clotheses.
12 You goin throw out da earth an da sky,
Jalike puka kine clotheses.
An you goin change um,
Jalike wen peopo put on da odda kine clotheses.
My Boy, you still stay da same jalike befo time.
You no goin mahke eva!”
13 God neva tell dis to da angel guys, but he tell dis to his Boy:
“Go come ova hea, sit down!
Dis da importan place by my right side.
Bumbye I goin make da peopo dat go agains you
Go down in front you,
Fo show dat you da winna ova dem.”
14 All da angel guys, dey da good spirits dat work fo God. He sen um all ova fo help da peopo come outa da bad kine stuff dey stay do cuz dose peopo his kids.