7
Da Melkizedek Kine Pries
(Start 14:1-20; Songs 110:4)
1-3 Wen Melkizedek was king fo Salem town, same time he was da pries fo da Mos Importan God. “Melkizedek,” dass mean, “Da King Dat Erytime Do Da Right Ting,” an he da King fo Salem, dass mean, “Da King Dat Help Da Peopo Stay Good Wit Each Odda.” Nobody know who his faddah guy o his muddah guy, o his ancesta guys. Nobody know wen he born o wen he mahke. He jalike one picha a God Boy, cuz he stay one pries guy, jalike Jesus stay one pries guy foeva.
One time, had some kings an dea army guys dat wen go rip off plenny stuff from da peopo dat live nea Abraham. Abraham dem go fight an win ova dose kings an dea army guys. Dey take back all dea stuffs. Den wen Abraham stay coming back, Melkizedek go out from Salem town fo meet him. An dass wen Melkizedek tell Abraham, “Eh! God goin do plenny good kine tings fo you.” An Abraham give Melkizedek ten percent a all da stuffs he take back cuz Melkizedek one pries guy.
4 Try tink bout dis: Melkizedek was one real importan guy. He so importan dat oua ancesta guy, Abraham, even give him da bestes ten percent from all da stuffs he take back wen he fight da kings.
5 Nowdays, all da Jew pries guys, dey come from Levi, Abraham great-grankid. Da Rules From God tell dat dose pries guys get da right fo take ten percent from all da stuffs all da odda Jew guys get—dass from dea Jew braddahs an sistahs, cuz dey all come from Abraham.
6 But Melkizedek, he one pries, no matta he neva have Levi fo his ancesta guy. But still yet, Melkizedek get ten percent from all da stuffs Abraham bring back. An Abraham, he da guy dat God make promises fo, but still yet, Melkizedek tell him, “I like God do plenny good kine stuffs fo you.”
7 Wen get somebody talk lidat, erybody know he gotta be da mo importan guy fo tell dat kine tings to da guy dass not so importan.
8 Az da regula kine pries guys dat colleck da ten percent. Dose guys, dey goin mahke bumbye. But Melkizedek, he colleck da ten percent, an da Bible tell dat he stay alive fo real kine.
9-10 Dass jalike dis: All da Jew pries guys get da guy Levi fo dea ancesta guy, an dey colleck da ten percent from da peopo. But da time Melkizedek wen meet Abraham an Abraham pay da ten percent to Melkizedek, dass jalike Abraham pay him fo all da Levi peopo an all da Levi pries guys dat not born yet, cuz Abraham da ancesta fo all dem.
11 Now, da pries guys, dey all come from Levi, an Aaron was dea firs Main Pries Guy. Da peopo need pries guys fo help da peopo do wat da Rules tell um fo do. But da peopo no can come perfeck jus cuz dey get da Levi kine pries guys. Dass how come dey need one diffren kine pries guy. Dey need da Melkizedek kine pries guys, not da Aaron kine pries guy.
12 An you know, wen dey change one pries fo anodda kine pries, same time dey gotta change da Rules.
13 Jesus, he da One we stay talk bout. He neva come from da Levi ohana, you know. He come from da Judah ohana, an da Rules neva tell dat da guys from dat ohana get da right fo make sacrifice on top da altar.
14 Da One In Charge a us guys, Jesus, erybody know dat he come from da Judah ohana. But wen Moses talk bout da guys from da Judah ohana, he neva tell notting bout prieses.
Anodda Pries, Da Melkizedek Kine
15 But all dis stay come even mo easy fo undastan now: Get anodda kine pries guy wen come. Him, he da Melkizedek kine pries, not da Aaron kine pries. (I stay talking bout Jesus, you know.)
16 Now da Rules tell dat da pries guys gotta come from da Aaron ohana, an Jesus no come from dat ohana. Jesus, he stay one pries guy cuz he get da powa fo live to da max foeva, an no mo notting can wipe him out.
17 Da Bible tell dis bout him befo time:
“You goin stay one pries foeva,
Jalike Melkizedek.”
18 Dat mean, da Rules from befo time no mo powa fo help da peopo. Dass why God wen throw out da ol rules.
19 An you know, da Rules neva make nobody come perfeck. Now, God give us someting mo betta. So den, now us stay shua we goin trus him. An cuz a dat, we stay tight wit him.
20 Wen da guys from Aaron ohana come prieses befo time, God neva make one promise bout dat. But wen God give us one mo betta ting, he wen make one strong promise.
21 Was wen Jesus come one pries, dat God make dat strong promise. God tell um,
“I Da One In Charge.
I make dis promise,
An I no goin change my mind.
‘You one pries guy foeva.’ ”
22 An cuz God make one strong promise to Jesus, garans Jesus da One dat goin make shua us guys goin get one mo betta deal.
23 Befo time had plenny guys dat come pries. Dass cuz dey no can stay one pries long time. Dey all mahke, dass why.
24 But Jesus, he da One dat stay live foeva, an he da kine pries dat stay foeva. Dass why no need anodda pries guy.
25 Jesus, he no stay mahke, he stay alive foeva. All da time he stay dea fo tell God fo help fo da peopo dat come to God cuz a him. An dass how he get da powa fo hemo dem real good from all da bad tings dey stay in.
26 Jesus, he da right kine Main Pries Guy fo us guys: He stay good an spesho fo God. Nobody can poin finga him notting. He stay clean inside. He stay diffren den all da peopo dat stay do bad kine stuff. An God make him mo importan den eryting inside da world o inside da sky.
27 Dass why Jesus, he not jalike da odda Main Pries guys. He no need make one sacrifice ery day jalike dem. Dose guys, firs dey gotta make one sacrifice fo all da bad tings dey wen do, an den dey make sacrifice fo all da odda peopo. But Jesus, he wen make sacrifice fo da peopo ony one time, da time he was da sacrifice.
28 Da Rules tell how fo make guys come da Main Pries Guy. An dey come da Main Pries Guy no matta dey not strong inside. But awready had da Rules bout pries guys wen God make da strong promise fo make his Boy come da Main Pries Guy. An his Boy, he da One dass perfeck foeva.