Songs Fo God
Psalms
Book Numba One
1
(Songs 1–41)
You Get Um Right Wit God,
Can Stay Good Inside
1 Da peopo stay good inside
Wen dey live lidis:
Dey no lissen da guys dat broke
Da Rules from God,
Wen dose guys tell um wass good fo do.
An dey no hang out wit da peopo
Dat do bad tings,
An dey no sit down fo talk story
Wit da guys
Dat ack jalike dey mo betta
Den erybody!
2 Dose guys dat not like da bad guys,
Dey stay good inside,
Cuz dey follow da Rules
From Da One In Charge.
Day time o nite time,
Dey read da Rules
From Da One In Charge,
An tink bout um plenny.
3 Dat kine peopo, dey jalike da trees
Dat peopo plant nea da watta ditch,
An ery year da tree give fruits
Da right time
An da leafs no come all dry
an fall down.
Eryting dose peopo do,
Come out good fo dem.
4 Da guys dat broke da Rules from God,
Dey not like God peopo.
Dey jalike da junks from da wheat
Dat da wind blow all ova da place.
5 Dass why da peopo
Dat broke da Rules from God
Goin come wipe out
Wen dey go in front God da judge.
Da peopo dat do bad tings,
God goin throw dem out
Wen da peopo dat get um right
Wit God come togedda.
6 Cuz Da peopo dat stay right
Wit Da One In Charge,
He know wat dey stay do.
But Bummahs fo da peopo
Dat broke his Rules!