2
Si Apo Jesus i onoran jo shi emin na dag‐en jo
1 Niman, no ẃaray dineknayon kedsang ni nemnem jo ja in‐akan nen Cristo son si‐kayo, ono semek to son si‐kayo ja emengi‐kan ni diwdiwa, ono pineshas jon inshalan tokejo ni Ispirito Santo nen Apo Shiyos, ono amtayon mengaasi, iyay i ibilin ko ma son si‐kayo.
2 Pansaksakey jo ngarod i nemnem jo, ja meẃad‐an ni semek so ni sakey tan sakey son si‐kayo, tan meẃad‐an pay ni saksakey ya pangkep. No sajay i pesing jo, ma‐enay iya imdeng ko.
3 Nemnem joy pansigshan ni kait jo, aliẃen sota bakdang jo bengat i jo nemnemnemen, eg kayo ondastog. Pankombaba kayo et mango, jet ibidang jo ngoy eshom ey ẃaray amtara nem say si‐kayo.
4 Mesepol la eg jo ipilit i kostoyo shi eshom; no diket nemnem joy kowan ngo ni eshom.
5 Sajay ira den inkowan ko, si‐katoy mapteng nga nemnemen jo, ta mesepol la si Cristo Jesus i onoran jo.
6 Si Cristo Jesus, sigod ja inges toy itsora nen Apo Shiyos, nem eg to inpilit ja on‐onong nga inges nen Apo Shiyos.
7 Isonga inbiyang to nin i kina‐inges to son Apo Shiyos et dimaw alin nanbalin ni too, ja nay‐anak, jet singa baga‐en i kasesaad to.
8 Jet nonta nanbalin ni too, inbaba toy bakdang to shorog et in‐onod ton angken manda‐kam ni kabebaing nga ketey to shi koros ja singa bimasol et ngo mowan.
9 Isonga si Apo Shiyos, inngato to ma niman i kasesaad nen Cristo, jet inpanbalin ton kangeto‐an ni emin, ja enshiy maka‐inges so.
10 Angken sipa shi dangit, shiya dobong, ono shi nayshalem ni bo‐day, mantedimokod ira ni shayaw sha so nen Jesus.
11 Jet angken sipa, ikowan sha met laeng ey si Jesucristo, si‐katoy Apo, jet sotan i kayshedjawan met laeng nen Apo Shiyos ja Ameto.
12 Si‐kayon a‐akik shi pamati ja ensemek ko, nontan na ẃara‐ak son si‐kayo, no ẃaray ikowan ko, joka pati‐a. Jet angken niman na enshi‐ak koma son si‐kayo, mas tongpalen jo koma pay iya bilin ko son si‐kayo. Insalakan shakejo nen Apo Shiyos, isonga mesepol la man‐edisto kayon ontongpal so ni bilin to. Nem mesepol la eg kayo mansheshinel, no diket meẃad‐an kayo ni takot son Apo Shiyos.
13 Ta angken si Apo Shiyos, eman‐obda ngo ja emengitoshong son si‐kayo, say mapiyal kayo ja mandeka ni piyan to.
14 No ẃaray dag‐en jo, obdayo, eg kayo mankotot, ono mansosongbat,
15 say enshiy jo kebedawan, ono jo panbesolan. Ta si‐kayo, annak shakejo nen Apo Shiyos jet si‐kayoy mengileẃag ni podno so ira niya tood ja dobong ja ma‐owap tan poron makedsel. Si‐karay naydaokan jo et piyan kon eg kayo ma‐edinan.
16 Ikowan jo so ira nonta eg emati sota esel nen Apo Shiyos pangkep son Cristo, say meẃad‐an ngo ira ni biyag. No sajay i pesing jo, ebadeg aliy imdeng ko nem ka‐onoran alin timpon imotok nen Cristo, ta si‐katoy pengamta‐an ko ma ni nanbanagan ni obdak, ono nandigatan kon engitosho son si‐kayo.
17 Angken bono‐en sha‐ak, man‐imdengak pay laeng. Arig toy ogadi min Hodiyos, ja no mandeton kami ni animal son Apo Shiyos, mika iso‐jat met laeng sota shaleto nodta bakdang ton emankaileton say ma‐enay. Jet singa inges to ngo sota shalak, ja si‐kato ngoy mayso‐jat nodta daton jo. Nem sota mismon daton jo, si‐kato sota joka pandigdikat ni maypangkep ni pamatiyo. Siya, man‐imdengak et meki‐imdeng kayo ngo son si‐kak.
18 Piyan kon man‐imdeng kayo koma ngo pangkep ni sajay, ja inges toy naka pan‐imdeng.
Ibetkag ko la si Timoteo, asan si Ipaprodito
19 Jet niman, naka namnama‐a ey no ipalobos nen Apo Jesus, ibetkag ko len shagos si Timoteo son si‐kayo, ta piyan kon amta‐en kon mismo i maypangkep son si‐kayo, say man‐imdengak.
20 Enshiy eshom ma toon maka‐inges ni naka pengisekit son si‐kayo, nem eg si Timoteo bengat.
21 Emin ira sota eshom, say shaka nemnemnema, sota bakdang sha bengat, aliẃen sota maypangkep so nen Jesucristo.
22 Nem si Timoteo, amtayo met ey ẃaray nanbanagan ni obda to. Timolong pay son si‐kak ja engitosho nonta mapteng nga shamag maypangkep so nen Jesucristo, ja inges toy itsora ni tolong ni sakey ya anak so ni ameto.
23 Isonga naka namnama‐a ey ibetkag ko len shagos si Timoteo son si‐kayo. Nem asen ko nin no ngarantoy panbenagan niya kasok.
24 Nem ẃaray namnamak ey ipalobos nen Apo Shiyos ja ondawak den shagos son si‐kayo.
25 Ninemnem ko pay ey mesepol la ibetkag ko la si Ipaprodito ja on‐oli shita kadnan jo. Ta naka ikari ey si‐kato, epateg ga agik shi pamati, tan sakey pay, etoled ja kadẃak ni mika pansilbi so nen Jesucristo. Salamat ta inbetkag jo di, ta ebadeg i tolong to son si‐kak.
26 Nem niman, eg maynemneman tep shinemag to ey inamta‐an jo kono ey emansekit, isonga piyan ton pasiya ja on‐akad da.
27 Agpayso noman ja nansakit, jet istay pay ya metey, nem si Apo Shiyos, kinaasi‐an to. Jet aliẃen si‐kato bengat i kinaasi‐an nen Apo Shiyos, no diket angken si‐kak, ta no etey si Ipaprodito, istay ma‐shoman pay sota digat ko, ta mandeshingitak kabol son si‐kato.
28 Isonga angken si‐kak, piyan kon pasiya da ja angken on‐akad si Ipaprodito shita kad‐an jo, say man‐imdeng kayo mowan ni i‐asas jo son si‐kato. Jet no man‐imdeng kayo, singa onka‐jas may naka pannemnem son si‐kayo.
29 Pa‐sas jo son si‐kato i ebadeg ga imdeng jo no onmotok da, ta si‐kato, agi tayo shi pamati et anam ton rispito‐en jon emin ira sota inges nen Ipaprodito, ja epateg i dingka to.
30 Ta say kabol la istay keteyan to, sota obda ton embel‐at maypangkep so nen Cristo. Inposta toy biyag to ja timolong son si‐kak, ta sota obden kowan jo ey itolong jo son si‐kak, si‐kato noman i dimaga so.