2 JOHN
Hini omaꞌ-atan tay an libju
Hitay me-aggwa an tulaꞌ John ja mitolong ay ni pfupfai an pinilin Apo Jos ja hana empfapfalay na. Mapfalin an hay etalaton tay pfupfai ja hini oha an iglesia. Ja hana ayya empfapfalay na ja chicha hana kamkameng na.
Hitay ja oha an tukhun hi hay aton cha an mumpepennohhochan. Ja itukhun khu John hay hana namati ta achi cha ma-allilaw hay hana khun muntudtuchu hi nehahalla.
1
1 Ha-in hi John an oha an pangpangulun chi namati. Tayya an muntula-aꞌ ay he-a an pfupfai an pinilin Apo Jos, ja hay hana khu empfapfalay mu. Umannung an podpodhoꞌ chaꞌju, ja an amin hana nanginnila ay ni umannung an Tukhun Apo Jos ja podpodhoꞌ khu chaꞌju.
2 Khun ta-o mumpepennohhochan, ti gawwacha ay chita-o hini umannung an Tukhun Apo Jos ja ingkhana.
3 Hi Apo Jos an Ama ta-o ja hi Hesu Kristo an Empfalay na chi mangkhohkhohan ja munnignikha ay chita-o, ja mangchat hi pomhochan chi piꞌtakhuwan ta-o. Hay hato chi akhajaon ta-o an namati an khun umunud ay ni umannung an Tukhun, ja an nagwachaan hi pamhod an narpu ay Apo Jos.
4 Mun-an-anlaaꞌ ti impa-annila cha ay ha-in hini amatan cha nuy uchumna an empfapfalay mu, ja niya an khun cha unuchon hini umannung an tukhun an hija chin in-urchin Apo Jos ay chita-o.
5 Ad ugwani ja gwa han podhoꞌ an itukhun ay chaꞌju. Mahapor an mumpepennohhochan ta-o. Achi angkhay ad ugwani chi pangngolam ay tay an ni-urchin, ti khun mituchu nete-a chin namatiyan ta-o.
6 Ja matikhaw hini pamhod ta-o ay ni pangunuchan ta-o hay hana Urchin Apo Jos. Ja hitay chi in-urchina chin pengpenghana an mahapor an mumpepennohhochan ta-o.
7 Epanomnom u hay hato ay chaꞌju khapo ta cho-or gwot hana numpangoy hi apfuglapfuglay an mangulaw hana tatakhu. Achi cha apfuluton an hi Kristo ja numpfalin hi takhu. Hay hato hana mangallilaw an pfumuhur ay Kristo.
8 Hotti pa-ennongan ju ta achi ma-utaw hana na-unglan ju ta michat ay chaꞌju an amin hana enchaag Apo Jos an lagpfu ju.
9 Hini takhu an achi mangtortoloy an miꞌ-unud ay ni tudtuchun Kristo ta una hurpfuchan, ja matikhaw an ma-id hi Apo Jos ay hija. Hini ayya muntortoloy an miꞌ-unud ay ni tudtuchun Kristo ja ma-innila an gwa ay hija hi Jos Ama ja hi Hesu Kristo an Empfalay na.
10 Hotti nu gway umali hina an muntudtuchu ja pfu-un hini tukhun Kristo chi ituchu cha, achi ju mangiliyon ja achi ju lamon an i miꞌhaphapit ay chicha.
11 Ti nu mangiliyon ju chicha ja hihiya an nidchum aju ay ni napukhit an khun cha aton.
12 Cho-or pay hana podhoꞌ an allon ay chaꞌju muti achiꞌ podhon an itulaꞌ. Ti hay nenomnom u ja umaliyaꞌ an manggwangar ay chaꞌju ta munhahhahapit ta-o. Hot munnaud chi i ta-o pun-an-anlaan nu muntitinnikhaw ta-o.
13 Omod a anu an allon hato empfapfalay tay ibpfam an pfupfai, an pinilin khu Apo Jos.