19
1 Amat hichi ja impahuplit Pilato hi Hesus.
2 Pfinalengawngaw hachi hinchalo han pagwit ja impihuꞌlub cha chin ulun Hesus an amat hi korona. Ja impilopfong cha han mumpfolah an lopfong an amat hi lopfong chi ari,
3 ja numpenpenalog cha an mehnot ay hija an mangali hi, “Madaydayaw a, he-a an Arin chi Hudju,” hon henaplat cha.
4 Pfimmutay khu hi Pilato ja inali na hachi Hudju hi, “Tayya an ipapfutay u hija ta panginnilaan ju an ma-id chi machakngaꞌ hi hay panghiꞌ-ingan hi pangchaloman ay hija.”
5 Amat hichi ja impapfutay cha hi Hesus an nunlolopfong hichin mumpfolah, ja inhuhuꞌlub na chin pagwit an korona. Ja inalin Pilato hachi tatakhu hi, “Tayya, ta emohchong ju hitay an takhu.”
6 Unot emmohchong hachi khun munggwarja hichi Templo ja hachi a-ap-apon chi papachi hi Hesus, ja at cha hi nangiꞌgwap an nangali hi, “Epepfakhat mu hija! Epepfakhat mu hay kros!” Ja inalin Pilato hi, “Hotti tayya, ikhad aju an i mangpfakhat. Ti tan ay ha-in ja ma-id mangkay oh-ohhah chinakngaꞌ hi panghiꞌ-ingan hi pangchaloman ay hija.”
7 Muti himmapit hachi Hudju ja inali cha hi, “Achi, ti gwa han urchin mi an inlukhangeh na hi nangarjana hi un hija hini Empfalay Apo Jos. Ja hini dusan ni manglukhangeh ay tay an urchin ja mahapor an matoy.”
8 Unagkhu chengngor Pilato hichin inali cha ja emmom-omod chin ta-ot na.
9 Amat hichi ja himmikhop khu ay chuy punhumarjaan ja inali na ay Hesus hi, “Chaad chi narpugwam?” Muti agkhuy tenomtompfar hi Hesus.
10 Ja inalin Pilato hi, “Anagkha ta achiyaꞌ topfalon ay he-a? Anilam, ha-in chi gway apfalinana an mangpfu-aan ay he-a ja an mangpapfakhat ay he-a.”
11 Tempfar Hesus ja inali na hi, “Aa, muti ma-id ayya hini apfalinam an inchat Apo Jos ay he-a ja un chah la-ahnaon gway ma-at mu ay ha-in? Hotti hini takhu an nangpulang ay ha-in ay he-a, ja hijay machamchamot chi pfahor na.”
12 Unagkhu chengngor Pilato chin inalin Hesus ja ente-a na an munnomnom hay atona an mangpfu-aan ay hija. Muti impapilit hachi Hudju an nangiꞌgwap hi, “Nu ipfu-aam ayya hitay an takhu, ja hijay panginnilaan mi an achim apfuluton hini Emperador ad Rome! Hini mangali hi hijay oha an ari ja pfuhur ni Emperador!”
13 Unot chengngor Pilato hichin inali cha ja impapfutay na khu hi Hesus, ja i inumpfun ay chuy umpfunan chi hugi ay chuy nachaꞌcha-an an nginadnan hachi Hudju hi Gabata.
14 Ja ay chuy ja arkhaw an Punhakhanaan cha ay ni Pfehtan chin Nalohan chin Angher Apo Jos. Gwa an mahaꞌ-ad ja inalin Pilato hachi Hudju hi, “Tayya, emohchong ju hitay an Ari ju.”
15 Muti iniꞌgwap cha an nangali hi, “Epapatoy mu! Epapatoy mu! Epepfakhat mu hi kros.” Ja inalin Pilato hi, “Un ju chah podhon an epepfakhat u hitay an Ari ju?” Tempfar hachi a-ap-apon chi papachi ja inali cha hi, “Hini Emperador ad Rome chi ari mi ja ma-id uchumna!”
16 Hotti inunud Pilato hini penhod hachi tatakhu ja impulang na hi Hesus hachi mangpfakhat ay hija.
Chin nangpfakhatan cha ay Hesus
Amat hichi ja initnud hachi hinchalo hi Hesus
17 ja impapi-ug cha hichin kros ay hija. Ja emmatam cha ay chuy pfulludna an nangadnan hi Golgota ay ni hapit chi Hudju, an hay podhona an allon ja pfulludna an amat hi ulun chi paang.
18 Ay chuy an lukhar chi nangpfakhatan cha ay hija ay chuy kros. Ja gwa han chugwa an neꞌchehhan an nepfakhat, ja khinakhawwa cha chin kros Hesus.
19 Ja gwa han intulaꞌ Pilato han tabla ja empepfakhat na ay chuy kros Hesus. Hay intulaꞌ na ja, “Hitay hi Hesus an eNazaret, an Arin chi Hudju.”
20 Chin lukhar an nangpfakhatan cha ay Hesus ja nehnot ad Jerusalem, hotti cho-or chin Hudju hi naloh an namaha chin intulaꞌ Pilato. Nitulaꞌ hi toloh kalahen chi hapit, an hapit chi Hudju ja Griego ja Latin.
21 Unagkhu angkhay ay chuy nitulaꞌ ja khun mungngulungur hachi a-ap-apon chi papachi ja icha inali ay Pilato hi, “Agkhuy mu koma intulaꞌ an hija hini Arin chi Hudju. Hay intulaꞌ mu koma ja ‘Inalin tay chi hija hini Arin chi Hudju.’ ”
22 Tempfar Pilato ja inali na hi, “Hichuy chi enat u an nangtulaꞌ, hotti achi mahukatan.”
23 Napfalin an empfakhat cha hi Hesus ja enalan chin apat an hinchalo hachi enaan cha an lopfong na, ja en-ap-apong cha. Enala cha khu chin ohan lopfong na an na-apfor an ma-id nunchaꞌ-itana.
24 Ja inalin hachi hinchalo hi, “Achi ta-o koma i-ittangon hitay ta un ta-o pumpfilingan ta nangamong hay mangala.” Enat cha ja nipa-annung hitay nitulaꞌ an Hapit Apo Jos hi nangarjana hi,
“Khinakhaggwa cha hana lopfong u,
ja numpfipfilingan cha hini na-apfor an lopfong u.”
25 Ja timmataꞌchug hi inan Hesus ja han ibpfan ina na an pfupfai, ja hi Mary an ahagwan Klopas, ja hi Mary Magdalen, an nenehnot cha ay chuy kros na.
26 Unot inudhungan Hesus chin ammod na ja chin ohan adalana an penenpenhod na an niꞌtataꞌchug, ja inali na chin ammod na hi, “Ina, hinuy adalan u chi ipfilang mu hi empfalay mu ad ugwani.”
27 Ja inali na khu ay chuy an adalana hi, “Ipfilang mu hija hi inam.” Hotti nete-a ay chuy ja in-anamut chuy adalana hi Mary ta mihihidchi pfalay cha.
28 Inannilan Hesus an napfalin an amin hini nichat an tamuwana heto lota, ja inali na hi, “Tayya an na-ugagaꞌ.” Inali na hitay ta mipa-annung chin nitulaꞌ an Hapit Apo Jos.
29 Ja gwa han malokong hichi an nanapnu hi pfajah an pfimmanger. Hotti enalan hachi hinchalo ja entamor cha han omaꞌ-at hi apoh ay chuy an pfajah ja empa-aw na han paor, ja intumuꞌ cha ay chuy ta-o na ta inumona.
30 Unot hinihip Hesus hichuy pfimmanger an pfajah ja inali na hi, “Tan napfalin hini tamuwaꞌ heto lota.” Injungjung na ja na-ongoh chin hochohcha na.
Chin nanuhakhan cha chin taglang Hesus
31 Amat hichi ja immuy hachi a-ap-apon chi Hudju ay Pilato an i nangippug ta ipa-ipong cha hachi hu-in hachi tolo an takhu an nepfapfakhat ay chuy kros cha, ta gway aton cha an matoy ja un cha opahon chicha. Hay nangatan cha ja Alemana an arkhaw chi punhakhanaan cha ay ni pfehta, ja Hapfachu an ngilin chi Hudju chin nun-inggwiꞌgwiit, hotti ma-id koma mepfapfakhat hi takhu ay chuy an Hapfachu, om-omod ay chuy an pfehta.
32 Inapfulut Pilato hotti immuy hachi hinchalo an i numpangipong hachi hu-in hachi chugwa an neꞌchehhan ay Hesus an nepfakhat.
33 Muti un chaagkhu nehnot ay Hesus ja tinnig cha an natoy, hijaot un cha agkhuy niꞌ-ipong chin hu-i na.
34 Oha ay cha chuy hinchalo chi nangchuhag ay chuy huꞌ-ud na chin taglang Hesus ja immajuh hachi chala ja chanum.
35 Ha-in an nangtulaꞌ ay tay ja alloꞌ ay chaꞌju hi umannung hitay intulaꞌ u, ti ha-in chi oha an nannig ay tay an na-at ay Hesus. Enhamad u an nanihtikhuwan ay tay umannung an na-at ta gway aton ju khu an mamati.
36 Ti na-at hay hato ta mipa-annung hini nitulaꞌ an Hapit Apo Jos hi nangarjana hi, “Ma-id oh-ohhah ma-ipong ay ni tungar na.”
37 Ja gwa khu han oha an nitulaꞌ an Hapit Apo Jos hi nangarjana hi, “Tikhagwun cha hichuy an takhu an chinuhag cha.”
Chin nilub-an Hesus
38 Napfalin hay hato ja gwa han oha an lala-e an immuy ay Pilato an hi Josep an e-Arimatea. Hitay an lala-e ja oha an disipolon Hesus muti agkhuy na impa-innila khapo hi ta-ot na hachi a-ap-apon chi Hudju. Immuy ay Pilato an i nangippug ta i na ilupfuꞌ chin achor Hesus, ja inapfulut Pilato. Hotti enala na chin achor Hesus.
39 Ja niꞌjuy hi Nikodemus an chin i niꞌhapit ay Hesus chin ohan nadhom. Ja inugnana han mumpfango an porpoh an mira an nala-okan hi aloes, an nahulok hi tolompoloh kilo.
40 Amat hichi ja enekak cha chin achor Hesus ja i cha enala han pfakhu an maphod an pfinacha. Khun cha ittugwan hi porpoh hon enlepfod cha chin achor na, ti hijah tay chi ugalin chi Hudju nu gway ilupfuꞌ cha hi natoy.
41 Ay chuy pangnger chin nangpfakhatan cha ay Hesus ja gwa han na-alu-an an agwachaan han paꞌ-ephod an lupfuꞌ an lijang an ma-id pay i nilupfuꞌ.
42 Ay chuy ja arkhaw an Punhakhanaan chi Hudju chin umali an Hapfachu ja khapo ta gwa an machakngan chin ngilin, ja hitay nenehnot an lupfuꞌ chi nang-ajan cha chin achor Hesus.