9
1 Ja en-ang-angonoh Hesus an nangali hi, “Umannung hitay alloꞌ an gwacha hana uchumna ay chaꞌju an achi matoy hot ah-upan cha hini ete-aan ni Pun-ap-apugwan Apo Jos hi tatakhu ay tay lota an gwachaan hi apfalinan.”
Chin narmanan chin tikhaw Hesus
2 Nalahin chi unum hi arkhaw ja initnud Hesus hi Peter ja hi James ja hi John hotti un cha emma-angkhay an nunti-id han pfuludna. Unagkhu la-ahna ja tinnig cha hi Hesus an narman chin tikhaw na,
3 ja pomooꞌ chin pinuchaw chin lopfong na, an ma-id chi ipadchungan chin pinuchaw na heto lota.
4 Tinnig cha khu ja gawwacha cha Elijah ay Moses an khun cha miꞌhapit ay Hesus.
5 Himmapit hi Peter ja inali na ay Hesus hi, “Apo, maphod ta immali ta-o heto. Mun-ephod ami hi tolo hi apfong ta henohha aju ay cha Moses ja hi Elijah.”
6 Ma-id maptoꞌ hi i na hapiton ti nang-entata-ot cha.
7 Unagkhu himpfumagkha ja gwa han pfonot an nunliꞌnup ay chicha. Ja gwacha han hapit an narpu ay chuy pfonot an allona hi, “Hitay hini podpodhoꞌ an Empfalay u. Hotti egngor ju hija!”
8 Un chaagkhu munlengngalengngaw ja himpfumagkha ja nama-id chin numpun-ibpfan Hesus an un angkhay hija.
9 Amat hichi ja empacheh cha an nunchayyu ja khun allon Hesus ay chicha hi, “Achi ju epfaꞌpfaag hitay an tinnig ju ingkhana hi mummahuwaꞌ an Na-ilangitan an Takhu.”
10 Inunud cha hitay inali na muti khun cha haphapiton nu ngay podhona an allon ay ni nangarjana hi mummahu hija.
11 Ja inali cha ay Hesus hi, “Anagkha mah, Apo, ta hachi memehtolon chi urchin Moses ja ituchu cha an mahapor an mahhun hi Elijah an umali ja un umali hini Mamahhod?”
12 Tempfar Hesus ja inali na hi, “Umannung an mahapor an mahhun hi Elijah an umali an manghakhana hana tatakhu ja un umali hini Mamahhod. Muti gwacha khu hini Hapit Apo Jos an nitulaꞌ hi nangarjana hi, ha-in an Na-ilangitan an Takhu ja cho-or chi uy u hortapon hi likhat ja chuꞌkhonaꞌ hay hana tatakhu.
13 Ja alloꞌ ay chaꞌju hi immali mahpay hi Elijah ja enat cha an amin hana napukhit an penhod cha an aton ay hija, ti hijah tay chi inalin ni Hapit Apo Jos an ma-at ay hija.”
Chin nangpakakan Hesus han napukhit an ispiritu an khun meh-ap han unga
14 Emmatam cha Hesus ay chuy agawwachaan hachi uchumna an disipolo na ja tinnig cha hachi cho-or an tatakhu an nangakhawwong ay chicha. Ja gawwacha hachi memehtolon chi urchin ja khun cha miꞌhanu an miꞌhahapit hay hachi disipolo.
15 Unagkhu tinnig hachi tatakhu hi Hesus ja nanor cha ja temmagtag cha an i mang-alaw an mangali ay hija hi, “Maphod ta immali a.”
16 Ja empfokhan Hesus hay hachi disipolo na hi, “Ngachah ni khun ju piꞌhahannugwan ay chicha?”
17 Ja gwa han lala-e ay cha chuy tatakhu an tenompfar ja inali na hi, “Rabbi! In-aliꞌ ay he-a hitay empfalay u an lala-e an un la-ahnaon naheꞌpan hi napukhit an ispiritu, hijaot un makalud.
18 Gwa ayya ta neh-ap hini ispiritu hon numpfitug ja mungngelot chi pfapfa na hon immupag hini ta-o na hon nangu-ulajat. Ja un u agkhu inali ay cha tay disipolom hi pakakon cha ja ma-id olog cha.”
19 Ja inalin Hesus hi, “Munlinapoh aju kaykhu an tatakhu. An akamoh an unaꞌ napfajag an gawwacha ay chaꞌju ja inanuhaꞌ chaꞌju, ja un kaykhu la-ahna ja ingkhana ad ugwani ja ma-id pammati ju. Ijali ju heto hini unga.”
20 In-uy cha ja unagkhu tinnig chuy neh-ap an ispiritu hi Hesus ja enggwakhot na chin unga ja pimmanullipullig ja immupag chin ta-o na.
21 Ja empfokhan Hesus ay chuy aman chuy unga hi, “Aꞌ-anunay nangte-aana hi amatana heto?” Tempfar na ja inali na hi, “Nete-a chin a-ung-ungnga na.
22 Empachapachan ni ispiritu an mamatoy ay hija hi khuna pangpulu-an hi apoy ja pangtuuchana hi gwanggwang. Hotti ka-ahiyan chaꞌmi adniꞌ, Apo, ja tinulungan chaꞌmi ta alom adniꞌ ja gway apfalinam.”
23 Ja inalin Hesus hi, “Anagkha ta allom hi, nu gway apfalinaꞌ? Mapfalin an amin ay ni takhu an gway pammati na ay Apo Jos.”
24 Ja munluluwa an nangiꞌgwap hichuy ammod chuy unga hi, “Gwa hitay pammatiꞌ muti tan un ad-adchi hotti un mu adniꞌ ug-ugman!”
25 Tinnig Hesus an cho-or hachi tatakhu an umuy ay chicha ja henonglar naot hichuy napukhit an ispiritu ja inali na hi, “He-a an napukhit an ispiritun chi po-it ja kalud, alloꞌ ay he-a hi makak a ay tay unga ja achi a mumpfangpfangngad!”
26 Nungkii chin neh-ap an ispiritu ja mun-a-ajog-og chin unga hi akakan chin ispiritu. Amat hi un natoy chin tikhaw chuy unga hotti inalin hachi tatakhu hi, “Chiya an natoy.”
27 Muti penchon Hesus ja pfinangona ja impataꞌchug na hichuy unga.
28 Napfalin ja himmikhop cha Hesus ay chuy pfalay an nunhihittugwan cha ta immi-igway cha ja un allon hachi disipolo na hi, “Anagkha ta ma-id olog mi an mangpakak ay nuy napukhit an ispiritu?”
29 Tempfar Hesus ja inali na hi, “Hinuy an kalahen chi ispiritu ja achi makak nu achi ta mungkalalag ay Apo Jos.”
Chin me-aggwa hi nangpa-innilaan Hesus hi atajana ja amahuwana
30 Empacheh cha Hesus ja enenggwa cha ad Galilee. Penhod Hesus an ma-id manginnila ay chuy agawwachaan cha
31 ti khuna tuchugwan chin disipolo na. Ja inali na ay chicha hi, “Ha-in an Na-ilangitan an Takhu, ja achi mapfajag hot michataꞌ hana pfuhur u hot patajonaꞌ. Muti ay ni me-atloh arkhaw hot mummahuwaꞌ.”
32 Muti agkhuy cha na-awatan hitay an inali na ja mun-okhon cha an manghanhan.
Intuchun Hesus nu ngachah chi napfagpfagto
33 Amat hichi ja emmatam cha Hesus ad Kapernaum. Unagkhu gwa an himmikhop cha han pfalay ja empfokhan Hesus hachi disipolo na hi, “Ngachah ni khun ju punhahannugwan ay nuy chalan hi khun ta-o umaliyan?”
34 Muti pfimma-in cha an mampfar ti chin khun cha haphapiton ja nu ngachah chi napfagpfagto ay chicha.
35 Inumpfun hi Hesus ja enajakhana hachi himpolo ta chugwa an adalana ja inali na ay chicha hi, “Hini mamhod an mamangulu ja mahapor an na-upfay ja hijay mi-ud-uchichi, ja tomolong an amin hi tatakhu.”
36 Penchon Hesus han ung-ungnga ja impataꞌchug na. Len-om na ja inali na ay chicha hi,
37 “Hini mangakhamid hi takhu an nabnababba an amat ay tay unga khapo hi pammati na ay ha-in ja ma-id uchumna hi inakhamid na nu pfu-un ha-in. Ja hini mangakhamid ay ha-in ja pfu-un ha-in ja angkhay chi inakhamid na, ti inakhamid na khu hi Ama an nannag ay ha-in.”
Hini achi pfumuhur ja hihiya na ay chita-o
38 Inalin John ay Hesus hi, “Apo, tinnig mi han ohan takhu an khun mangpakak hi napukhit an ispiritu ay ni apfalinan ni ngachan mu. Ja inhingar mi ta epokhong na, ti agkhuy nidchum ay chita-o.”
39 Ja inalin Hesus ay chicha hi, “Achi ju epagwa. Ma-id chi hay mangat hi milagro ay ni apfalinan ni ngachan u, ja napfalin ja gway i na agkhu allon hi napukhit ay ha-in.
40 Ti chicha ja un hihiya na ay chita-o nu achi cha pfumuhur.
41 Ja umannung hitay alloꞌ ay chaꞌju an hini takhu an magmagkhohkhoh ay chaꞌju khapo hi nidchuman ju ay ha-in, anong un himpfahpfahhu hi chanum chi ichat na hi inumon ju, ja gwachay linagpfu na ay nuy an enat na.
42 Muti hini takhu an chimmalat hi pfimmahulan chi oha an nabnababba an namati ay ha-in, ja madusa. Toꞌ-onot un ekho-od hay machamot an pfato ay ni pfokhang na ja intuud hichi baybay ta marteng, mu hini un hijay chumalat hi pfumahulan.
43-44 Hotti nu hini ngamoy mu chi chumalat hi pfumahulam ja toꞌ-onot un mu potnan! Ti anongkay ja oh-ohha hini ngamoy ja akhaja ta miꞌtakhu taot niꞌ ad langit. Ti anong un chugway ngamoy ja mituud a chamchama hichi impferno an gawwachaan chi apoy an achi madmachop.
45-46 Ja nu hini hu-im chi chumalat hi pfumahulam ja toꞌ-onot un mu potnan! Ti anongkay ja oh-ohha hini hu-i ja akhaja ta miꞌtakhu taot niꞌ ad langit. Ti anong un chugway hu-i ja mituud a chamchama hichi impferno.
47 Ja nu hini matam chi chumalat hi pfumahulam ja toꞌ-onot un mu u-iton! Ti anongkay ja oh-ohha hini mata ja akhaja ta miꞌtakhu taot niꞌ ad langit. Ti anong un chugway mata ja mituud a chamchama hichi impferno.
48 Hini omaꞌ-atana hichi impferno ja mun-apfighan cha hi pfekheh an achi matmatoy, ja mapleng cha hi apoy an achi madmachop.”
49 Ja inalin khu Hesus hi, “An amin chi tatakhu ja mahapor an metnob cha hi likhat ta gway aton cha an pomhod. An amat ay ni anun an midaton, an mahapor an gway ahina ja un akhajaon Apo Jos.”
50 Ja inalin khu Hesus hi, “Maphod hini ahin muti penomhaw ayya ja achi mumpfangngad hini tatam na. Hotti amat aju koma hi maphod an ahin ta mun-oh-ohha aju.”